Toktokgud Long Yufala Blong Mekem Yufala i Kam Strong Moa
1 Aposol Pol i traem bes blong hem blong mekem ol Kristin fren blong hem oli kam strong moa. (Wok 14:19-22) Long sem fasin, yumi tingbaot ol brata sista blong yumi, mo yumi wantem givhan long olgeta taem oli kasem hadtaem. Baebol i soemaot se i no ol elda nomo we oli mas intres long ol narafala, be yumi evriwan. (Rom 15:1, 2) Tingbaot tu rod we yumi save folem blong obei long tok ya we Pol i talem wetem lav: “Yufala i mas stap toktok gud long yufala blong mekem tingting blong yufala i strong, mo yufala i mas givgivhan long yufala, olsem we yufala i stap mekem naoia.”—1 Tes. 5:11.
2 Luksave Nid Blong Ol Narafala: Baebol i tokbaot Dokas se, “oltaem hem i stap mekem ol gudfala wok, mo i stap givhan long ol puaman.” (Wok 9:36, 39) Hem i luksave olgeta we oli gat nid, mo hem i traem bes blong hem blong givhan long olgeta. !Hemia wan nambawan eksampol we yumi save folem! Maet yu harem oli talem se i nidim wan we i gat trak blong go tekem wan olfala i kam long miting. Maet i gat wan paenia we i nidim wan fren blong prij wetem hem long wan aftenun. Tingbaot: !Sipos yu luksave wan we i gat ol nid olsem mo yu givhan long hem, samting ya bambae i rili leftemap tingting blong hem!
3 Tokbaot Ol Samting Long Saed Blong Spirit: Mo tu, ol toktok blong yumi i save mekem ol narafala oli kam strong moa. (Efes. 4:29) Wan elda we i gat ekspiriens i talem se: “Sipos yu wantem leftemap tingting blong narafala, yu mas tokbaot ol samting long saed blong spirit. Blong statem wan storian we i save mekem narafala i kam strong, maet yu save askem wan isi kwestin olsem, ‘?Yu yu kasem trutok olsem wanem?’ ” Soemaot se yu rili intres long ol yangfala long kongregesen. Soem intres long olgeta we tingting blong olgeta i foldaon, mo long olgeta we oli gat fasin blong sem. (Prov. 12:25) Yu no mas tekem tumas taem blong storian wetem ol Kristin fren blong yu long saed blong ol pleplei blong wol mo ol sinema, ale yufala i no moa gat taem blong tokbaot ol gudfala samting long saed blong spirit.—Rom 1:11, 12.
4 ?Yu save tokbaot wanem samting blong mekem ol narafala oli kam strong? ?Taem yu stap folem program blong ridim Baebol no blong stadi yu wan, yu yu faenem wan rul blong Baebol we i mekem se lav blong yu long Jeova i kam moa strong? ?Yu harem wan poen long pablik tok no long Wajtaoa stadi we i tajem hat blong yu? ?Stori blong wan brata no sista i mekem bilif blong yu i strong moa? Sipos yu tinghae long ol sas samting ya long saed blong spirit, oltaem nomo bambae yu gat sam gudfala samting blong tokbaot wetem ol narafala.—Prov. 2:1; Luk 6:45.
5 I gud yumi gohed blong mekem ol narafala oli kam strong moa, tru long fasin blong yumi blong toktokgud long olgeta mo givhan long olgeta.—Prov. 12:18.