Givhan Long Ol Narafala Blong Oli Gat “Fasin Blong Obei We i Kamaot Long Hat”
1. ?Jeova i askem wanem samting long ol man we oli wosipim hem?
1 Sipos yumi wantem se Jeova i agri long wosip blong yumi, i impoten blong gat fasin obei. (Dut. 12:28; 1 Pita 1:14-16) Klosap nao, God bambae i mekem jajmen i kamtru long ‘olgeta we oli no save ona long Hem, mo long olgeta we oli no save obei long gud nius.’ (2 Tes. 1:8) ?Olsem wanem yumi save halpem ol man blong oli gat “fasin blong obei we i kamaot long hat,” long saed blong ol tijing blong Baebol?—Rom 6:17, NW.
2. ?From wanem i impoten blong givhan long ol man blong oli wokem strong bilif?
2 Givhan Long Narafala Blong Wokem Bilif Mo Lav: Long Baebol, fasin blong obei i joen wetem bilif. Aposol Pol i tokbaot ‘tok blong God ya we i stap oltaem nomo, we i talem long olgeta man blong oli save bilif long hem, oli save obei long hem.’ (Rom 16:26) Hibrus japta 11 i tokbaot fulap man we oli soemaot bilif. Plante long olgeta, Jeova i talem long olgeta wanem we oli mas mekem, nao oli mas tekem aksen folem samting we Jeova i wantem. (Hib. 11:7, 8, 17) Be man we i no obei, Baebol i soem se hem i sot long bilif. (Jon 3:36; Hib. 3:18, 19) Yumi mas lanem blong gat gudhan blong yusum Baebol, olsem nao yumi save givhan long ol man blong oli wokem bilif ya we i pusum olgeta blong obei.—2 Tim. 2:15; Jem. 2:14, 17.
3. (a) ?Olsem wanem fasin blong obei i joen wetem lav? (b) ?Olsem wanem yumi save givhan long ol Baebol studen blong oli lavem Jeova?
3 Fasin blong obei i joen tu wetem lav we man i gat long God. (Dut. 5:10; 11:1, 22; 30:16) Fas Jon 5:3 i talem se: “Sipos yumi lavem God, hemia i min se yumi stap folem ol tok blong hem. Mo ol tok blong hem i no strong tumas blong folem.” ?Olsem wanem yumi save givhan long ol Baebol studen blong oli lavem Jeova? Long taem blong stadi, yumi mas tekem evri janis blong mekem tangkiu we oli gat from ol gudfala fasin blong Jeova, i kam bigwan moa. Soemaot bigfala tangkiu we yu yu gat long God. Halpem ol studen blong oli kam fren blong Jeova. Bitim olgeta narafala samting, lav long Jeova nao bambae i pusum olgeta—wetem yumi tu—blong gat fasin blong obei we i kamaot long hat.—Mat. 22:37.
4. (a) ?From wanem eksampol blong yumi i impoten? (b) ?Yumi mas mekem wanem blong gat ‘wan hat we i save mekem yumi obei’?
4 Tru Long Eksampol Blong Yumi: Wan bigfala samting we i save givhan long ol narafala blong oli obei long gud nius, hemia eksampol blong yumi. Be i nidim bigfala traehad oltaem blong yumi save gat ‘wan hat we i mekem yumi obei.’ (1 King 3:9, NW; Prov. 4:23) ?Taswe, yu mas mekem wanem? Oltaem yu mas fidimgud hat blong yu, hemia se yu mas mekem taem blong stadi Baebol mo joen long ol miting. (Sam 1:1, 2; Hib. 10:24, 25) Joen wetem olgeta we hat blong olgeta i fulwan long trufala wosip. (Prov. 13:20) Joen oltaem long wok blong prij, wetem tingting ya we yu wantem tumas blong givhan long ol man long ples blong yu. Prea long Jeova blong i lidim yu taem yu traehad blong gat wan gudfala hat. (Sam 86:11) Blokem ol samting we oli save spolem hat blong yu, olsem ol vidio kaset mo sinema we oli soemaot rabis fasin long saed blong seks mo raf fasin. Mekem ol samting we oli givhan long yu blong kam klosap moa long God, mo we oli mekem se yu fren moa wetem hem.—Jem. 4:7, 8.
5. ?Olsem wanem olgeta we oli obei oli kasem blesing?
5 Jeova i talem long ol man blong hem bifo se sipos oli lesin long tok blong hem, bambae oli kasem fulap blesing. (Dut. 28:1, 2) Long sem fasin, tede tu Jeova i stap givim ol bigfala blesing long “ol man we oli obei long hem.” (Wok 5:32) Taswe, tru long tijing mo eksampol blong yumi, yumi save halpem ol narafala blong oli gat fasin blong obei we i kamaot long hat blong olgeta.