?Yu Yu Gat “Wan Hat We i Obei”?
TAEM Solomon i kam king blong Isrel bifo, hem i harem long filing blong hem se hem i no naf. Taswe hem i askem God blong i givim save mo waes long hem. (2 Kronikel 1:10) Solomon i prea tu, se: “Yu mas givim long man blong wok blong yu, wan hat we i obei, blong jajem ol man blong yu.” (1 King 3:9) Sipos Solomon i gat “wan hat we i obei,” bambae hem i folem ol loa mo ol rul blong God, mo bambae hem i kasem ol blesing blong Jeova.
Wan hat we i obei i no wan baden, be stampa blong fasin glad. Aposol Jon i raetem se: “Sipos yumi laekem God tumas, hemia i min se yumi stap folem ol loa blong hem. Mo ol loa blong hem oli no strong tumas blong folem.” (1 Jon 5:3) Tru ya, yumi mas obei long God. Tingbaot, Jeova i Bigfala Man we i wokem yumi. Wol mo olgeta samting we oli stap long hem, olsem selva mo gol, oli blong hem. Taswe yumi no rili gat wan samting blong givim long God, nating se hem i letem yumi blong yusum mane blong soem se yumi laekem hem. (1 Kronikel 29:14) Jeova i wantem se yumi laekem hem mo gat tingting daon blong wokbaot wetem hem, mo mekem ol samting we hem i wantem.—Maeka 6:8.
Taem wan man i askem long Jisas Kraes wanem loa we i hae moa long ol narafala loa, Jisas i talem se: “Yu mas laekem Jeova, God blong yu, long olgeta tingting blong yu, mo long olgeta laef blong yu, mo long olgeta maen blong yu. Hemia loa ya we i hae moa long ol narafala loa, mo i nambawan blong folem.” (Matyu 22:36-38) Wan rod blong soem lav ya, i blong obei long God. Taswe i gud we yumi wanwan, i prea mo askem long Jeova blong i givim long yumi wan hat we i obei.
Oli Gat Wan Hat We i Obei
Baebol i fulap long store blong ol man we oli gat wan hat we i obei. Eksampel, Jeova i talem long Noa blong bildim wan bigfala sip blong sevem laef blong ol man mo anamol. Hemia wan bigfala wok, we i tekem kolosap 40 no 50 yia. Traem tingbaot, nating sipos yumi yusum ol lektrik tul blong tede mo narafala tul we yumi gat naoia, be man i mas gat gudhan mo waes blong bildim bigfala samting ya we i save flot. Antap long hemia, Noa i mas givim woning long ol man long ol man, we i klia se oli stap laf long hem mo jikim hem. Be hem i obei fulwan long Jeova. Baebol i talem se: “Hem i mekem olgeta samting ya we Hae God i talem.” (Jenesis 6:9, 22; 2 Pita 2:5) Noa i soem lav we hem i gat long Jeova, taem hem i obeigud long Hem long plante yia. !Hem i wan nambawan eksampel blong yumi tede!
Tingbaot tu long man ya, Ebraham. God i talem long hem blong aot long rij taon ya Uru blong Koldia, mo blong go stap long wan kantri we hem i no save nating. Ebraham i obei wantaem nomo. (Hibrus 11:8) Go kasem en blong laef blong hem, hem mo famle blong hem, oli laef long ol haos tapolen. Afta we hem i stap plante yia olsem wan strenja long kantri ya, Jeova i blesem hem mo waef blong hem, Sera, we i obei gud tu. Jeova i givim long tufala wan pikinini boe, nem blong hem, Aesak. !Ebraham we i gat 100 yia long taem ya i mas laekem tumas boe ya we hem i gat taem hem i olfala finis! Sam yia biaen, Jeova i askem long Ebraham blong kilim i ded Aesak mo bonem hem olsem wan sakrifaes. (Jenesis 22:1, 2) I sua se Ebraham i mas harem nogud tumas from samting ya. Nating se i olsem, hem i obei from we hem i laekem Jeova, mo i bilif se promes Laen bambae i kam tru long Aesak, nating sipos Jeova i mas mekem hem i laef bakegen long ded. (Hibrus 11:17-19) Be, taem Ebraham i stap rere blong kilim i ded boe blong hem, Jeova i stopem hem mo i talem se: “Naoia mi mi save we yu yu stap ona long God tru, from we pikinini ya blong yu i wan nomo we yu yu gat, be yu no holemtaet hem, yu rere nomo blong letem hem i ded.” (Jenesis 22:12) From we Ebraham we i fraetgud long God i gat fasin obei, ol man oli singaot hem se, “fren blong Jeova.”—Jemes 2:23, NW.
Jisas Kraes i soem beswan eksampel long yumi long saed blong fasin obei. Bifo we hem i kamdaon long wol, hem i glad tumas blong mekem wok blong Papa blong hem long heven wetem fasin obei. (Proveb 8:22-31) Taem hem i laef olsem wan man, Jisas i obei gud long Jeova long evri samting, mo oltaem hem i glad tumas blong mekem ol samting we Jeova i wantem. (Ol Sam 40:8; Hibrus 10:9) Taswe, Jisas i talem tru nomo se: “Mi mi no mekem wan samting nating mi wan. Mi mi stap talemaot ol samting ya nomo we Papa blong mi i tijim mi finis long hem. Hemia we i sanem mi, hem i stap wetem mi. Hem i no livim mi mi stap mi wan, from we oltaem, mi stap mekem ol samting we hem i wantem.” (Jon 8:28, 29) Biaen, blong leftemap hae rul blong Jeova mo blong pemaot ol man we oli obei oli kam fri long sin, Jisas i glad blong givim laef blong hem, nating se hem i mas ded long wan fasin we i daonem hem bigwan mo hem i safa tumas. I tru, hem ‘i mekem tingting blong hem i stap daon blong i obei long God, gogo i ded. Mo ded ya blong hem, ol man oli nilim hem long wan pos.’ (Filipae 2:8) !Hem i rili wan nambawan eksampel blong soem wan hat we i obei!
Yumi Mas Obei Long God Oltaem
Olgeta we oli stap talem se oli obei long God, i no evriwan we i rili obei long hem. Tingbaot King Sol long Isrel bifo. God i givim oda long hem blong kilim i ded olgeta rabis man Amalek. (1 Samuel 15:1-3) I tru se Sol i spolem nesen ya, be hem i no kilim i ded king blong olgeta mo i tekem sam sipsip mo sam buluk blong olgeta. Samuel i askem se: “?From wanem yu no obei long voes blong Jeova?” Sol i ansa se: “Be mi obei long voes blong Jeova . . . Ol man [Isrel] oli tekem sam sipsip mo buluk long ol samting we oli winim long faet, ol beswan anamol . . . , blong mekem sakrifaes long Jeova.” Samuel i soem se i impoten tumas blong obei long Jeova, taem hem i talem se: “?Yu ting se Jeova i glad long ol samting we ol man oli bonem blong givim olsem presen mo sakrifaes? ?No hem i glad moa taem oli obei long voes blong hem? !Yu luk! I moa gud blong obei i bitim blong mekem wan sakrifaes, i moa gud blong lesin i bitim blong givim gris blong man sipsip. From we fasin rebel i sem mak long sin ya we man i wok wetem rabis speret blong talemaot fyuja, mo fasin stronghed i sem mak long fasin blong yusum nakaemas mo ol aedol. From we yu yu sakemaot tok blong Jeova, bambae hem tu i sakemaot yu, blong yu no moa king.” (1 Samuel 15:17-23) !Sol i lusum bigfala samting from we hem i no gat wan hat we i obei!
Waes King Solomon tu, we i bin prea blong kasem wan hat we i obei, i no gohed blong obei long Jeova. Hem i mekem fasin we i defren olgeta long samting we God i wantem. Hem i mared wetem sam woman blong narafala kantri, nao ol woman ya oli pulum hem blong sin agens long God. (Nehemaea 13:23, 26) God i no moa glad long Solomon from we hem i no gohed blong gat wan hat we i obei. !Hemia i rili wan woning long yumi!
Hemia i no minim se Jeova i askem long ol man blong hem blong kam stret gud olgeta. Hem i stap ‘tingbaot we yumi kamaot long ases nomo.’ (Ol Sam 103:14) I sua se yumi evriwan i mestem samtaem. Be God i save luk sipos hat blong yumi i rili pusum yumi blong wantem mekem hem i glad. (2 Kronikel 16:9) Sipos yumi mekem sin, from we yumi no stretgud olgeta, be yumi tanem tingting from sin blong yumi, yumi save askem God blong i fogivim yumi tru long ransom sakrifaes blong Kraes. Yumi save trastem se Jeova bambae i “save fogivim yumi fulwan.” (Aesea 55:7; 1 Jon 2:1, 2) Mo tu, yumi nidim help blong ol Kristin elda we oli gat lav, blong kam strong bakegen long saed blong speret, mo blong gat wan strong bilif mo wan hat we i obei.—Jemes 5:13-15; Taetas 2:2.
?Yu Yu Stap Obei Long God Fulwan?
I sua se plante blong yumi, ol man blong wok blong Jeova, yumi harem long filing blong yumi se yumi gat wan hat we i obei. Be maet yumi stap tingting olsem se: ‘Mi mi joen long wok blong talemaot Kingdom, ?i tru? Mo mi mi stanap strong taem mi kasem sam bigfala traem olsem traem blong no tekem saed long politik no long ol faet. Mo oltaem mi go long ol Kristin miting, olsem aposol Pol i givim oda, ?i tru, no? (Matyu 24:14; 28:19, 20; Jon 17:16; Hibrus 10:24, 25) I tru, hat blong ol man blong Jeova olsem wan grup, i pulum olgeta blong obei long ol impoten fasin ya.
Be, ?olsem wanem long ol fasin long laef blong yumi evridei, ating long ol smosmol samting? Jisas i talem se: “Man we i stap mekem i stret gud long smol samting nomo, hem i save mekem i stret gud long bigfala samting tu. Be man we i stap mekem i no stret long smol samting nomo, hem i save mekem i no stret long bigfala samting tu.” (Luk 16:10) From samting ya, i gud we yumi wanwan i askem long yumi se: ‘?Mi mi gat wan hat we i obei long ol smosmol samting, mo ol samting tu we ol narafala oli no save?’
Man blong raetem Ol Sam i soem se insaed long haos blong hem tu, we ol narafala oli no luk hem, hem i ‘folem ol fasin we oli klin gud long fes blong God.’ (Ol Sam 101:2) Taem yu stap long haos blong yu, maet yu putum televisen, mo yu stat lukluk wan film. Stret long ples ya, fasin obei blong yu i save kasem traem. Ating film ya i soem sam nogud fasin blong seks. ?Bambae yu gohed blong lukluk film ya, wetem tingting se, ‘hemia nao ol samting we ol kaen film tede oli stap soem’? ?No bambae hat blong yu we i gat fasin obei i pusum yu blong folem oda blong Baebol we i talem se: ‘Yufala i no mas tokbaot fasin blong slip olbaot mo ol fasin we oli no klin’? (Efesas 5:3-5) ?Bambae yu stopem televisen, nating se yu intres tumas long store ya? ?No bambae yu jenisim janel blong televisen sipos film ya i stat soem raf fasin? Man blong raetem Ol Sam i mekem singsing ya se: ‘Jeova i stap skelem laef blong olgeta man, ol gudfala man wetem ol man nogud. Mo hem i no laekem nating olgeta we oli laekem tumas blong mekem faet.’—Ol Sam 11:5.
Wan Hat We i Obei i Karem Blesing
I tru se yumi save skelem plante haf blong laef blong yumi, blong luk sipos hat blong yumi i rili pulum yumi blong obei long God. Lav we yumi gat long Jeova i mas pusum yumi blong mekem se hem i glad long yumi, mo mekem ol samting we hem i talem yumi blong mekem, tru long Tok blong hem, Baebol. Wan hat we i obei bambae i givhan long yumi blong holemtaet wan gudfala fasin fren wetem Jeova. Tru ya, sipos yumi obei fulwan, ‘ol tok blong yumi mo ol tingting blong yumi bambae oli stret gud long fes blong Jeova.’—Ol Sam 19:14.
From we Jeova i laekem yumi tumas, hem i tijim fasin obei long yumi blong mekem se yumi haremgud. Mo yumi kasem bigfala blesing taem yumi lesin long tijing blong God wetem fulhat blong yumi. (Aesea 48:17, 18) From samting ya, i gud we yumi glad blong akseptem help we Papa blong yumi long heven i givim long yumi tru long Tok blong hem, speret blong hem, mo ogenaesesen blong hem. Hem i tijimgud yumi, i olsem se yumi harem wan voes biaen long yumi we i talem se: “Hemia rod ya. Ol man blong mi, yufala i wokbaot long hem.” (Aesea 30:21) Taem Jeova i stap tijim yumi tru long Baebol, ol Kristin buk, mo ol miting blong kongregesen, i gud we yumi lesin ol samting we yumi lanem, mo ‘obei long evri samting we hem i talem’—2 Korin 2:9, NW.
Sipos yumi gat wan hat we i obei, bambae yumi kasem bigfala glad mo plante blesing. Mo tu, bambae yumi gat wan tingting we i kwaet, from we yumi save se yumi stap mekem ol samting we Jeova God i haremgud long olgeta, mo yumi mekem se hat blong hem i glad. (Proveb 27:11) Wan hat we i obei bambae i protektem yumi taem wan traem i pulum yumi blong mekem samting we i no stret. Tru ya, yumi mas obei long Papa blong yumi long heven mo yumi mas prea se: “Givim long man blong wok blong yu wan hat we i obei.”
[Foto Credit Line Pija Long Pej 29]
From the Self-Pronouncing Edition of the Holy Bible, containing the King James and the Revised versions