Jisas i “Lanem Fasin Blong Obei”

Jisas i obei oltaem long Jehova. (Jon 8:29) ?Be from wanem Baebol i talem se: “Hem i lanem fasin blong obei, taem ol samting oli mekem hem i safa”?—Hib. 5:8.

Taem Jisas i stap long wol, hem i fesem plante samting we hem i no bin fesem taem hem i stap long heven. Hem i gruap long wan famle we papa mo mama blong hem i lavem Jehova, be tufala i sinman. (Luk 2:51) Hem i mas stanap strong from we long taem ya, ol lida blong skul oli gat ol nogud fasin, mo ol haeman oli rul long fasin we i no stret. (Mat. 26:59; Mak 15:15) Antap moa, hem i ded long wan fasin we i nogud olgeta. Be Baebol i talem se: “Hem i mekem tingting blong hem i stap daon, mo i obei long God long evri samting, nating se hem i mas ded from.”—Fil. 2:8.

Tru long olgeta samting ya, Jisas i lanem fasin ya blong obei long Jehova, from we hem i neva fesem ol samting ya long heven. Taswe, hem i save kam wan gudfala King mo Hae Pris we bambae i kasemsave gud long yumi mo i sore long yumi. (Hib. 4:15; 5:9) Jehova i tinghae moa long Jisas mo i yusum hem moa, taem i luk we Jisas i lanem fasin ya blong obei tru long olgeta samting we i mekem hem i safa. Yumi tu, sipos yumi gohed blong obei long Jehova nomata wanem trabol yumi fesem, bambae hem i tinghae moa long yumi mo i save yusum yumi moa long wok blong hem.—Jem. 1:4.