Yumi Presem Jeova
1 Man blong raetem Ol Sam i talem se: “!Olgeta man long wol! !Yumi sing long Hae God! . . . Bambae yumi talemaot paoa blong hem long ol man blong ol narafala kantri. Bambae yumi talemaot ol bigbigfala wok blong hem long fes blong olgeta man.” !Taem yumi tingbaot ol samting we Jeova i mekem finis, mo we i stap mekem naoia, mo we bambae i mekem blong yumi, hat blong yumi i pusum yumi blong presem hem!—Sam 96:1, 3.
2 Long Wok Blong Prij: Ol Witnes blong Jeova oli gat blesing ya blong karem nem blong God mo blong presem hem long fored blong olgeta man long wol. (Mal. 1:11) !Hemia i defren olgeta long ol lida blong Krisendom! !Olgeta oli tinghae long olgeta, ale taem oli tanem Baebol i go long narafala lanwis, oli tekemaot nem blong God long Baebol ya! Ol man oli mas bilif mo singaot long nem blong God, nao hem i save sevem olgeta tru long bigfala trabol ya we i stap kam. Be taem blong givhan long ol man blong oli kasem save long nem ya i sot. (Rom 10:13-15) Mo tu, nem blong God i mas kam klin blong i save gat pis long heven mo wol, mo long medel blong ol man. Yes, evri wok we God i mekem oli joen wetem nem blong hem.
3 “Hae God i hae we i hae, mo yumi mas presem hem, yumi mas leftemap nem blong hem.” Blong ol man oli “presem hem,” oli mas save trutok long saed blong hem. (Sam 96:4, 8) Be samfala oli talem se i no gat God. (Sam 14:1) Sam narafala oli tok nogud long God se hem i no gat paoa, mo samfala bakegen, oli talem se God i no intres long ol samting we ol man oli mekem. Taem yumi givhan long ol man we hat blong olgeta i stret, blong oli kasem stret save blong God ya we i wokem yumi, mo ol stamba tingting blong hem, mo ol gudgudfala fasin blong hem, long taem ya yumi stap presem Jeova.
4 Long Ol Fasin Blong Yumi: Yumi presem Jeova taem yumi mekem laef blong yumi i laenap wetem ol stret rul blong hem. Ol narafala oli lukluk ol gudfala fasin blong yumi. (1 Pita 2:12) Maet samfala oli talem ol gudfala tok taem oli luk we klos mo hea blong yumi i klin mo i stret, mo hemia i givim janis long yumi blong tokbaot gudfala frut we yumi kasem taem yumi mekem laef blong yumi i laenap wetem ol rul blong Baebol. (1 Tim. 2:9, 10) !Yumi glad tumas taem ol narafala oli ‘luk ol gudgudfala wok we yumi stap mekem, nao oli leftemap nem blong Papa blong yumi, we i stap long heven’!—Mat. 5:16.
5 Evri dei yumi mas presem nambawan God blong yumi tru long ol toktok mo fasin blong yumi. Sipos yumi mekem olsem, yumi mekem samting we gudfala tok ya i talem, se: “!Yumi sing long Hae God! !Yumi leftemap nem blong hem! Evri dei bambae yumi talemaot gud nius ya we hem i sevem yumi.”—Sam 96:2.