?Olsem Wanem Yumi Save Givhan?

¹ Taem ol Witnes blong Jeova oli harem se wan disasta i spolem sam kantri, plante taem oli askem kwestin ya: “?Olsem wanem yumi save givhan?” Olsem Ol Wok 11⁠:​27-30 i soemaot, ol Kristin blong faswan handred yia oli givim presen mane blong givhan long ol brata long Judia we oli kasem trabol taem kakae i sot.

² Tede, loa i letem se ogenaesesen blong yumi i save yusum mane long ol wok we i givhan long ol narafala. Mo yumi save yusum blong givhan long olgeta we oli kasem trabol from ol disasta long saed blong weta, no from ol disasta we man i mekem, mo blong givhan long sam narafala bakegen we oli gat nid.

³ Olsem nao, las yia, plante brata sista oli givim presen mane blong givhan long ol brata long Saot Esia we taetal wef i spolem olgeta. I gud tumas blong luk we ol brata sista ya oli glad blong givim presen mane wetem fulhat blong olgeta, blong ogenaesesen i save yusum blong halpem ol narafala we oli trabol. Be sam brata we oli givim presen mane, oli talemaot nem blong kantri we wan disasta i spolem, se mane ya i blong givhan long ol brata long ples ya. Long sam kantri, loa i talem se ol ogenaesesen we oli kasem ol presen mane olsem, oli mas yusum folem tingting blong hemia we i givim, mo oli mas yusum bifo wan stret taem we oli makem, nating sipos ol brata long kantri ya oli kasem help finis.

⁴ From samting ya, sipos samfala oli wantem givim presen mane blong givhan long olgeta we oli kasem trabol from disasta, i moagud we oli joenem mane ya wetem presen mane blong sapotem wok blong prij long fulwol. Mane ya, ogenaesesen i yusum blong givhan long olgeta we oli kasem trabol from ol disasta, mo hem i yusum tu blong givim ol samting long saed blong spirit we ol Kristin brata sista oli nidim. Sipos wan man i no wantem joenem presen mane blong givhan long olgeta we oli kasem trabol from wan disasta, wetem hemia blong sapotem wok blong prij long fulwol, bambae mifala i save akseptem mane ya mo yusum long taem blong disasta long eni ples long wol. Be i moagud sipos oli no talemaot se presen mane ya i blong givhan long ol brata blong wanem kantri, mo olsem wanem ogenaesesen i mas yusum.

⁵ Sipos yumi joenem evri presen mane wetem presen mane blong sapotem wok blong prij long fulwol, bambae i gat moa mane we ogenaesesen i save yusum long olgeta wok blong Kingdom, mo i no nid blong holem i stap gogo wan disasta i kamaot. Hemia i laenap wetem tingting we i stap long Efesas 4⁠:​16, se taem yumi wok tugeta blong givim samting we narafala i nidim, ‘yumi mekem we bodi ya blong Kraes i save gru, mo taem yumi lavlavem yumi, bodi ya i save kam strong moa.’