Edukesen We i Lidim Man i Go Long Laef
1 !I gud tumas blong luk olsem wanem fes blong ol man i glad taem oli kasem save trutok blong Baebol! Taem yumi serem save wetem ol narafala, long saed blong God mo stamba tingting blong hem long ol man, yumi kasem trufala glad. Edukesen olsem i save lidim wan man blong kasem laef we i no save finis.—Jon 17:3.
2 ?From Wanem Edukesen Ya i Hae Moa?: Tede, ol man oli save kasem edukesen long plante rod mo long saed blong evri samting. (Pri. 12:12) Be yumi no save skelem ol save ya wetem ‘ol bigbigfala wok we God i mekem.’ (Wok 2:11) ?Olsem wanem? ?Edukesen we wol i givim, i pulum ol man blong oli go klosap moa long God, mo blong oli save moa long stamba tingting blong hem? ?Edukesen ya i givhan long ol man blong oli kasem save wanem samting i hapen taem yumi ded mo from wanem fulap man oli safa tumas? ?Hem i givim hop long ol man? ?Hem i givhan blong mekem famle laef i kam moagud? Nogat. Edukesen ya nomo we God i givim, i save givhan long ol man blong oli faenem ol trufala ansa long ol impoten kwestin blong laef.
3 Edukesen we i kamaot long God, i givim samting we wol ya i no save givim nating, hemia se, i mekem fasin blong man i kam moagud. Tok blong God i save gat paoa long hat blong olgeta we oli bilif long hem, mo we oli mekem ol tijing blong hem i wok long laef blong olgeta. Tok ya i save tekemaot ol nogud fasin olsem fasin blong seraot from kala blong skin, laen, mo kantri. (Hib. 4:12) Hem i save pusum man blong lego evri kaen fasin raf, mo blong ‘putum niufala laef olsem prapa klos blong olgeta.’ (Kol. 3:9-11; Maeka 4:1-3) Mo tu, edukesen blong God i givim paoa long plante milian man blong oli winim ol fasin mo tingting we oli stap folem longtaem finis i kam, mo we God i no glad long olgeta.—1 Kor. 6:9-11.
4 ?From Wanem Edukesen Ya i Impoten Naoia?: Bigfala Tija blong yumi i wekemap tingting blong yumi long saed blong mining blong taem blong yumi tede. Ol mesej blong jajmen insaed long ol profet tok blong hem oli stret long taem blong yumi, mo yumi mas talemaot ol tok ya long olgeta ples blong wol. (Rev. 14:6, 7) Jisas i stap rul finis long heven, klosap nao bambae olgeta giaman skul oli lus olgeta, mo Kingdom blong God i rere blong spolem olgeta gavman blong wol. (Dan. 2:44; Rev. 11:15; 17:16) Taswe, i impoten we naoia nomo ol man oli mas luksave King ya we God i putumap, mo singaot wetem bilif long nem blong Jeova. (Sam 2:11, 12; Rom 10:13; Rev. 18:4) I gud we yumi joen fulwan blong givim edukesen ya we i save lidim man blong kasem laef.