Soem Intres Long Ol Man—Askem Kwestin Mo Lesingud
1 Bighaf blong ol man oli laekem talemaot tingting blong olgeta, be oli no glad taem ol narafala oli toktok tumas no oli askem tumas kwestin long olgeta. Taswe, yumi ol Kristin, yumi mas gat gudhan blong yusum ol kwestin blong faenemaot tingting blong ol man.—Prov. 20:5.
2 Ol kwestin blong yumi oli mas pulum man blong tingting, be i no blong mekem oli sem no oli harem nogud. Long wok blong prij long ol haos wanwan, wan brata i stap askem long ol man se: “?Yu yu ting se bambae i gat wan taem we ol man oli save soem ona mo respek long ol narafala?” Sipos man blong haos i talem tingting blong hem, hem i gohed i se: “?Yu yu ting se samting ya i save kamtru olsem wanem?” Sipos no, hem i talem se: “?From wanem yu yu tingting olsem?” Wan narafala brata we i stap tekem janis blong prij mo i stap prij long ol pablik ples, hem i askem long olgeta we oli gat pikinini se: “?Wanem samting i mekem se yu yu glad tumas blong stap olsem wan papa no wan mama?” Biaen, hem i askem se: “?Wanem samting we yu yu wari moa long hem?” Makemgud se ol kwestin ya oli no mekem ol man oli sem no oli harem nogud, be oli pulum olgeta blong oli talemaot prapa tingting blong olgeta. From we laef blong ol man i no sem mak mo ol ples we oli stap long olgeta oli defdefren, maet i nidim we yumi jenisim storian blong yumi mo fasin blong yumi blong askem kwestin, blong mekem i laenap wetem ol man long ples blong yumi.
3 Pulum Ol Man Blong Oli Toktok: Sipos ol man oli glad blong talemaot tingting blong olgeta, yu mas lesingud, be yu no mas katem tok blong olgeta. (Jem. 1:19) Wetem kaen fasin, yu mas talem tangkiu from ansa blong olgeta. (Kol. 4:6) Maet yu save talem se: “Hemia i wan gudfala tingting. Tangkiu blong talemaot long mi.” Sipos tingting blong olgeta i stret, talem ol gudfala toktok long olgeta we i kamaot long hat blong yu. Wetem kaen fasin, askem sam moa kwestin blong faenemaot wanem tingting blong olgeta mo from wanem oli tingting olsem. Traem faenem wan poen we yutufala tugeta i agri long hem. Taem yu wantem pulum tingting blong olgeta i go long wan vas blong Baebol, yu save talem se: “?Yu yu bin tingbaot sipos vas ya i save givhan?” Kwestin blong yu i no mas soemaot se yu wantem winim narafala mo se yu wantem agiu.—2 Tim. 2:24, 25.
4 Ansa blong ol man we yumi prij long olgeta i save dipen bigwan long fasin blong yumi blong lesin. Ol man oli luksave sipos yumi intres long olgeta mo sipos yumi stap lesingud. Wan seket elda i talem se: “Taem yu soem se yu glad blong lesin long ol man, samting ya i save pulum olgeta bigwan, mo hemia i wan nambawan fasin we i soem se yu rili intres long ol man.” Taem yumi lesingud long ol narafala, yumi soem ona long olgeta, mo hemia i save pulum olgeta blong oli lesin long gud nius ya we yumi stap talemaot.—Rom 12:10.