Kamgud Moa Long Wok Blong Prij—Taem Yu Soem Intres Long Man

?From Wanem i Impoten?: Jisas i luk mo i lavem olgeta man wanwan, mo hem i soem intres long olgeta. Eksampol, wan taem Jisas i luk wan man we i no save toktok gud, mo sora blong hem i fas. Hem i kasem save filing blong man ya, ale hem i tekem man ya tufala i gowe long ol man. Nao taem tufala nomo i stap, Jisas i mekem man ya i kam gud bakegen. (Mak 7:31-35) Jisas i tingbaot ol disaepol blong hem, taem hem i luksave samting we oli no naf blong kasem save, mo hem i no givim plante save long olgeta wantaem. (Jon 16:12) Nating se Jisas i king long heven, be hem i gohed blong soem intres long man. (2 Tim. 4:17) Yumi ol man blong Jisas, taswe yumi wantem folem fasin blong hem. (1 Pita 2:21; 1 Jon 3:16, 18) Mo tu, bambae yumi karem gudfala frut long wok blong prij, taem yumi soem intres long man, mo taem yumi kasem save ol trabol, ol samting we hem i intres long hem, mo ol samting we hem i stap wari long hem. Bambae i isi moa blong hem i lesin, taem hem i luksave we yumi no jes kam blong givimaot magasin no blong storian nomo, be yumi soem intres long hem.