Soem Intres Long Ol Man—Luksave Nid Blong Olgeta
1 Jeova God mo Jisas Kraes tufala i nambawan long fasin ya blong luksave nid blong ol man mo blong givhan long olgeta. (2 Kron. 16:9; Mak 6:34) Taem yumi prij, yumi mas traem luksave samting we ol man oli intres long hem mo ol wari blong olgeta. Olsem nao, maet bambae yumi save mekem tok blong yumi long saed blong gud nius, i laenap wetem nid blong olgeta.
2 Makemgud Ol Smosmol Samting: Jisas i lukluk evri samting. (Mak 12:41-43; Luk 19:1-6) Long sem fasin, taem yumi stap wokbaot i go long doa blong ol man mo yumi luk we oli putum sam pija no aedol blong flasem haos blong olgeta, no sam raeting long trak blong olgeta, no i gat sam pleplei blong pikinini long yad, ale yumi save yusum ol samting ya blong talemaot gud nius long fasin we i karem frut.
3 Fes mo ol aksen blong wan man i save soemaot filing blong hem. (Prov. 15:13) Maet hem i harem nogud from wan famle no fren blong hem i ded no from hem i kasem wan trabol, nao hem i nidim we narafala i leftemap tingting blong hem. Maet bambae hem i glad sipos yumi ridim sam vas we oli laenap wetem nid blong hem. (Prov. 16:24) ?Olsem wanem? ?Man blong haos i stap hareap blong go samples, no hem i karem wan bebi we i krae? Sipos i olsem, i moagud blong mekem plan blong gobak long wan narafala taem. Sipos yumi tingbaot man ya mo yumi “sore” long hem, samting ya i save pusum hem blong lesin taem yumi gobak.—1 Pita 3:8.
4 Jenisim Tok Blong Yu: Aposol Pol i makem se long taon blong Atens, i gat wan olta we oli raetem long hem se, i blong mekem wosip long ‘wan god we oli no save hem.’ Samting ya i mekem se Pol i jenisim toktok blong hem taem hem i talemaot gud nius. Hem i talem se: “God ya we yufala i stap mekem wosip long hem, we yufala i no save hem, hemia nao God ya we mi mi stap talemaot long yufala.” Taem Pol i toktok long kaen fasin olsem, hemia i pusum plante man blong oli tingting gud long gud nius blong Kingdom mo blong oli bilif long hem.—Wok 17:23, 34.
5 Long sem fasin, taem yumi luksave samting we man i intres long hem, hemia i givhan long yumi blong jenisim toktok blong yumi blong mekem i laenap wetem olgeta. Yusum ol kwestin we oli save pulum man blong haos blong talemaot tingting blong hem. Tingbaot ol vas we yumi save yusum blong mekem intres blong olgeta i gru. (Prov. 20:5) Sipos yumi luksave nid blong ol man mo yumi intres long olgeta, hemia bambae i givhan long yumi blong kamgud moa long fasin blong yumi blong talemaot gud nius.