Yumi Pulum Man Blong i Yusum Tingting Blong Hem
1. ?Wanem fasin blong storian we i gud moa?
1 Long wok blong prij, ?wanem fasin blong storian we i gud moa? ?Yumi talem nomo ol samting we man i mas mekem? ?No yumi pulum hem blong i yusum tingting blong hem blong kasem save long samting we i stret? Taem aposol Pol i toktok long ol man Jiu we oli stap long Tesalonaeka, hem i pulum olgeta blong oli yusum tingting blong olgeta. From samting ya, “sam long olgeta oli harem se tok ya i tru.” (Wok 17:2-4) ?Be yu mas mekem wanem blong pulum ol man blong oli yusum tingting blong olgeta?
2. ?Taem yu talemaot gud nius, yu save mekem wanem blong folem fasin blong Pol?
2 ?Man i Tingting Olsem Wanem, Mo i Gruap Long Wanem Bilif?: Sipos yu wantem pulum ol man long ples blong yumi blong oli yusum tingting blong olgeta, yu mas tingbaot se oli tingting olsem wanem. Long Atens, Pol i toktok long ol man Gris we oli no bilif long tru God. Long stat blong tok we hem i mekem long hil ya Areopagus, hem i tokbaot ol samting we olgeta oli save mo oli agri long hem. (Wok 17:22-31) Taswe, taem yu rerem fastok blong yu, i gud yu tingbaot bilif we ol man long ples blong yumi oli gat mo ol tingting we oli gat agensem narafala. (1 Kor. 9:19-22) Sipos wan man i talem sam tok blong blokem yu, yu traem faenem wan poen we hem i agri long hem, nao yu storian long poen ya.
3. ?Ol kwestin we yu askem, oli save givhan olsem wanem blong pulum man blong i yusum tingting blong hem?
3 Yu Askem Ol Kwestin: Sipos wan turis i wantem go samples nao hem i askem rod long yu, yu mas save ples we hem i wantem go long hem. Sipos no, yu no save givhan long hem. Sem mak, sipos yu no save tingting blong man we yu prij long hem, bambae yu no save givhan long hem. Taem Jisas i wantem pulum wan man blong i yusum tingting blong hem, plante taem hem i askem kwestin blong faenemaot tingting blong man ya. Wan dei, wan man i askem long Jisas se, “?Bambae mi mas mekem olsem wanem blong kasem laef ya we i no save finis?” Jisas i wantem save tingting blong man ya bifo we hem i ansa long hem. (Luk 10:25-28) Wan narafala taem, Pita i givim wan ansa we i rong, ale Jisas i askem plante kwestin long hem blong stretem tingting blong hem. (Mat. 17:24-26) Taswe, sipos man i askem wan kwestin no i talem wan samting we i no stret, yu save askem kwestin long hem blong pulum hem blong i yusum tingting blong hem.
4. ?From wanem yumi mas pulum man blong i yusum tingting blong hem?
4 Taem yumi pulum man blong i yusum tingting blong hem, yumi stap folem fasin blong Bigfala Tija ya Jisas mo ol narafala man bifo, we oli wok strong blong talemaot gud nius. Yumi soemaot long man we yumi prij long hem se yumi tinghae long hem mo yumi respektem hem. (1 Pita 3:15) Nao maet bambae man ya i glad blong yumi kam luk hem bakegen.