Faenem Rod Blong Prij
1 Ol samting long laef blong ol man long Kristin kongregesen oli defdefren. Be yumi evriwan i joengud from we yumi strong blong presem Jeova. (Sam 79:13) ?Sipos helt blong yumi i nogud no wan narafala traem i mekem se yumi no moa save spenem plante taem long wok blong prij, olsem wanem yumi save faenem rod blong yumi gohed blong prij?
2 Long Evridei Laef: Long evridei laef blong Jisas, hem i tekem janis blong prij long ol man. Hem i toktok long Matiu taem hem i pas long ofis blong pem takis, i toktok long Sakias taem hem i stap wokbaot long rod, mo long wan woman Sameria taem hem i stap spel. (Mat. 9:9; Luk 19:1-5; Jon 4:6-10) Long evridei laef blong yumi tu, taem yumi stap storian wetem ol narafala, yumi save prij long olgeta. Sipos yumi karem wan Baebol wetem sam traket mo buklet, hemia i save mekem se yumi rere blong toktok long ol narafala long saed blong hop blong yumi.—1 Pita 3:15.
3 ?Sik blong yu i mekem se yu no save wokbaot gud blong prij long ol haos wanwan? Stap rere oltaem blong tekem janis blong prij long ol dokta mo ol narafala we oli kam blong luk yu. (Wok 28:30, 31) ?Sipos sam samting long laef blong yu i mekem se yu mas stap oltaem long haos, yu yu traem finis blong prij tru long telefon mo long leta? Wan sista i stap raetem leta i go oltaem long ol famle blong hem we oli no Witnes. Hem i raetem sam gudfala toktok we oli kamaot long Baebol mo ol stori long saed blong wok blong prij.
4 Long Wok Mo Long Skul: Yumi wantem tumas blong presem Jeova, mo hemia bambae i pusum yumi blong faenem rod blong planem ol sid blong trutok long ples blong wok mo long skul. Wan pablisa we i gat eit yia i storian long klas blong hem long ol samting we hem i ridim long Wekap! long saed blong mun. Taem tija blong hem i kasem save weples pablisa ya i faenem ol save ya, hem i stat blong ridim ol Wajtaoa mo Wekap! Long ples blong wok, sipos yu jes putum buk ya Baebol i Tijim long wan ples we ol narafala oli save luk, maet bambae oli askem sam kwestin, mo hemia i save givim janis long yu blong prij long olgeta.
5 ?Yu yu save faenem sam rod long evridei laef blong yu, we i save givim janis long yu blong prij? I gud yumi yusum gud ol janis we yumi gat, mo traehad evri dei blong “leftemap nem blong God.”—Hib. 13:15.