Tijim Olgeta We Oli Gat Tingting Daon Blong Oli Wokbaot Long Rod Blong God
1. ?Yumi mas mekem wanem blong givhan long ol narafala blong oli kam disaepol?
1 Baebol i tokbaot ol disaepol blong Jisas long faswan handred yia se oli stap folem “Rod blong Masta.” (Wok 9:2) Trufala Kristin Skul i gat paoa long olgeta haf blong laef blong wan man. (Prov. 3:5, 6) Taswe, taem yumi mekem ol Baebol stadi, i no naf blong givimaot stret save blong ol tijing blong Baebol nomo. Yumi mas halpem ol Baebol studen tu blong oli wokbaot long rod blong Jeova.—Sam 25:8, 9.
2. ?Wanem samting i save pulum wan Baebol studen blong folem loa blong God?
2 Givhan Long Olgeta Blong Oli Lavem Jeova Mo Jisas: !I hadwok blong ol man we oli no stretgud olgeta oli mekem tingting, toktok, mo fasin blong olgeta i laenap wetem ol samting we God i wantem! (Rom 7:21-23; Efes. 4:22-24) Be olgeta we oli gat tingting daon oli letem lav we oli gat long Jeova mo long Pikinini blong hem i pulum olgeta blong oli mekem jenis ya. (Jon 14:15; 1 Jon 5:3) ?Olsem wanem yumi save givhan long ol Baebol studen blong yumi blong oli wokem lav ya?
3. ?Olsem wanem yumi save givhan long ol studen blong oli lavem Jeova mo Jisas?
3 Givhan long studen blong yu blong i kasem save long ol fasin blong Jeova. Wan brata i eksplenem se: “Ol man oli no save laekem wan man we oli no save hem. Taswe, taem oli stat blong stadi, mi yusum Baebol blong tijim olgeta long nem blong God mo mi tekem evri janis blong tokbaot ol fasin blong Jeova.” Tokbaot eksampol blong Jisas, hemia nao wan nambawan rod blong pulum olgeta blong lavem Jeova mo Jisas. (Jon 1:14; 14:9) Mo tu, yusumgud bokis blong tingtingbak we i stap long en blong wanwan japta blong buk ya Baebol Tijim, blong givhan long studen blong i tingting gud long ol nambawan fasin blong Jeova mo Pikinini blong hem.
4. (a) ?From wanem plante studen oli faenem se i hadwok blong joen long wok blong prij? (b) ?Olsem wanem yumi save givhan long ol studen blong yumi blong oli joen long wok blong prij?
4 Tijim Olgeta Tru Long Eksampol Blong Yumi: Yumi olsem ol tija blong ol studen mo yumi lidim olgeta tu, taswe yumi mas soemaot long olgeta tru long ol aksin blong yumi se i minim wanem blong wokbaot long rod blong God. (1 Kor. 11:1) Olsem nao, i wan niufala samting long bighaf blong ol Baebol studen blong oli tokbaot bilif blong olgeta long ol strenja. Taswe, i nidim longfala tingting mo gudhan blong givhan long olgeta blong oli wokem lav, bilif, mo fasin no fraet. Hemia ol fasin we oli nidim sipos oli wantem joen long wok blong prij mo mekem disaepol. (2 Kor. 4:13; 1 Tes. 2:2) Yumi wantem tumas blong lidim ol studen blong yumi, mo hemia bambae i pusum yumi blong stap wetem olgeta taem oli stat blong joen long wok blong prij.
5. ?Olsem wanem wan gudfala eksampol i save givhan long ol studen blong oli luksave mining blong folem loa blong God?
5 Eksampol we yu soemaot, i save tijim ol studen long sam narafala impoten samting we wan Kristin i mas mekem. Taem yu go luk ol sikman mo taem yu glad blong talem halo long ol narafala long ol miting blong kongregesen, ol studen oli luk se lav i wok olsem wanem. (Jon 15:12) Taem yu joen blong klinim Haos Kingdom mo yu mekem sam samting blong givhan long ol narafala, yu stap tijim olgeta blong oli mekem wok blong ol narafala. (Jon 13:12-15) Taem ol studen oli luk se yu yu gat wan laef we i no fasfas, oli kasem save se i minim wanem blong ‘lukaot Kingdom blong God fastaem.’—Mat. 6:33, NW.
6. ?Wanem frut i kamaot taem yumi givhan long ol man we oli gat tingting daon blong oli mekem wok blong Jeova?
6 I nidim bigfala traehad blong mekem wok ya blong tijim ol narafala long Tok blong God mo mekem disaepol. !Be yumi glad tumas taem yumi luk ol man we oli gat tingting daon oli ‘stap folem rod blong trutok’!—3 Jon 4.