Givhan Long Studen Blong Gat Tangkiu From Ol Nambawan Fasin Blong Jeova
1 Taem yumi prij mo mekem disaepol, yumi stap tijim ol stamba trutok blong Baebol long ol narafala. Be yumi no mekem hemia nomo. Yumi givhan long ol man tu blong oli save Jeova olsem wan man we i laef i stap, mo blong oli gat tangkiu from ol nambawan fasin blong hem. Taem ol man we hat blong olgeta i stret oli lanem trutok long saed blong God, hemia i gat bigfala paoa long olgeta, i pusum olgeta blong jenisim sam samting long laef blong olgeta ‘nao bambae oli save mekem laef blong olgeta i kam stret gud olsem we [Jeova] i wantem.’—Kol. 1:9, 10; 3:9, 10.
2 Niufala Buk Blong Stadi: Long stat blong buk ya Baebol Tijim, hem i pulum tingting blong man i go long ol nambawan fasin blong Jeova, mo hem i gohed olsem gogo kasem en blong hem. Faswan japta blong buk ya i givim ansa long ol kwestin ya: ?God i rili kea long yu?, ?God i olsem wanem?, mo ?I gat rod blong kam klosap long Jeova? Mo tu, japta ya i tokbaot klin fasin blong Jeova (haf 10), stretfasin blong hem mo fasin blong hem blong tingbaot yumi (haf 11), lav blong hem (haf 13), paoa blong hem (haf 16), mo fasin sore, fasin blong givhan long man long gladhat blong hem, fasin fogif, longfala tingting mo fasin blong hem blong stap tru long ol man blong hem (haf 19). Haf 20 i ademap olgeta poen i se: “Moa we yu lanem samting long saed blong Jeova, moa we bambae hem i kam olsem wan trufala man long tingting blong yu. Ale bambae yu lavem hem moa mo yu harem se yu stap klosap long hem.”
3 ?Olsem wanem yumi save yusum buk ya Baebol Tijim blong givhan long ol Baebol studen blong oli kam klosap long Jeova? Afta we yumi stadi long wan haf we i tokbaot ol nambawan fasin blong God, yumi save askem long studen se: “?Haf ya i talem se Jeova i wanem kaen man?” no “?Olsem wanem haf ya i soemaot se God i intres long yu?” Sipos yumi yusum ol kwestin olsem long stadi, yumi stap tijim ol studen blong yumi blong oli tingting dip long ol samting we oli lanem, mo yumi givhan long olgeta blong oli gat moa tangkiu from ol nambawan fasin blong Jeova.
4 Yusum Bokis Blong Tingtingbak: Long en blong ol wanwan japta, askem long studen blong i tokbaot long prapa tok blong hem ol wanwan poen insaed long bokis ya “Samting We Baebol i Tijim.” Pulum tingting blong hem i go long ol vas blong Baebol we oli stap. Blong pulum studen blong talemaot samting we i stap long hat blong hem, maet yu save askem se: “?Wanem filing blong yu long samting we Baebol i tijim long poen ya?” Sipos yu mekem olsem, yu makemgud long tingting blong studen ol bigfala poen blong japta, mo tu yu luksave wanem samting we studen i rili bilif long hem. Hemia bambae i givhan long studen ya blong i stat wokem fasin fren blong hem wetem Jeova.