Oli Soemaot Wan Eksampol Blong Fasin Blong Holemstrong
1 Long 1937 wan niufala rod blong prij fultaem i stat—wok blong spesel paenia. Ol man mo woman we oli naf, mo we oli bin mekem wok blong prij plante yia finis, oli glad nomo blong go wok long eni ples we ogenaesesen i askem olgeta blong go long hem. Tede, afta we plante yia i pas, ol spesel paenia oli gohed yet blong soemaot gudfala eksampol long fasin blong holemstrong we yumi mas folem.—Hib. 6:12.
2 Oli Lidim Wok: Long stat, ol spesel paenia oli lidim wok blong prij taem oli yusum wan fonograf we oli karem i go long doa blong man. Mo tu, oli yusum samting olsem kaset we oli rikodem ol tok long hem. Oli yusum ol kaset ya blong tokbaot Baebol taem oli gobak blong luk ol man. Oli mekem samting ya long ol bigfala taon we i gat kongregesen finis long olgeta. Biaen, oli sanem ol spesel paenia oli go long ol ples we i nidim moa pablisa. Oli gohed blong visitim olgeta we oli intres mo mekem ol Baebol stadi. Frut we oli kasem from traehad blong olgeta, hemia se plante handred kongregesen i stat. Wok blong talemaot gud nius we oli gohed nomo blong mekem, i givhan bigwan blong mekem se ogenaesesen i gru i kam bigwan kasem mak we yumi luk tede. (Aes. 60:22) Ol spesel paenia oli gohed blong mekem wan impoten wok taem oli gohed blong talemaot gud nius “long olgeta man long wol.”—Kol. 1:23.
3 Gudfala Eksampol We Yumi Mas Folem: Sam spesel paenia oli bin spenem plante yia long fultaem wok blong prij. Long ol yia we i pas, ol man mo woman ya we oli stap tru long God, oli kasem plante traem long laef blong olgeta we i mekem bilif blong olgeta i kam strong moa. (1 Pita 1:6, 7) Olgeta oli bin lego ol sas samting blong oli save go wok long ol ples we i gat nid. Naoia sam long olgeta oli olfala finis mo oli gat problem long helt blong olgeta, no oli fesem sam narafala trabol bakegen. (2 Kor. 4:16, 17) Nating se i olsem, be “oli strong olsem olfala tri we lif blong hem i stap grin oltaem.” (Sam 92:14) Olgeta oli trastem Jeova mo oli kasem blesing blong hem.—Sam 34:8; Prov. 10:22.
4 I stret we yumi soem lav mo talem ol gudfala tok long ol spesel paenia. Sipos kongregesen blong yu i gat blesing ya blong gat ol spesel paenia, yu mas yusum janis ya blong spenem taem wetem olgeta mo haremgud long ol samting we yu save lanem from olgeta. Soem tangkiu from wok we oli mekem olsem ol man we oli holemstrong long wok blong talemaot Kingdom. Kasem paoa from fasin blong olgeta blong stanap strong. Jeova bambae i glad mo i blesem olgeta we oli folem bilif blong ol spesel paenia ya from we ‘hem i glad long olgeta we oli stap holemstrong long hem.’—Prov. 12:22.