Wokem Fasin Blong Folem Gudfala Program, Mo Kasem Plante Blesing From

1. ?From wanem i gud we yumi jekemap program long saed blong wosip we yumi stap folem oltaem?

¹ Taem yu jes kam wan Kristin, i sua se yu traehad bigwan blong gat wan program we i fulap long ol samting we oli joen wetem wosip blong Jeova, olsem Baebol stadi, ol Kristin miting, wok blong prij, mo prea. Jeova i blesem traehad blong yu, nao yu yu kam klosap moa long Jeova. Ating naoia yu baptaes plante yia finis. ?Olsem wanem? ?Yu yu stap holemtaet yet gudfala program ya we yu bin folem taem yu jes kam wan Kristin?

2. ?Olsem wanem fasin blong ridim Baebol evri dei i save givhan long yumi?

² Jekemgud Program Blong Yu: ?Yu yu gat fasin ya blong ridim wan haf blong Tok blong God evri dei? !Sipos yumi mekem olsem, bambae yumi kasem plante blesing! (Jos. 1⁠:8; Sam 1⁠:​2, 3) Long Isrel bifo, wanwan king i mas ridim kopi blong Loa “oltaem long laef blong hem.” ?Wanem gudfala samting i kamaot from? King ya bambae i gat tingting daon mo bambae hem i lanem blong fraet long Jeova nao i no save tanem baksaed long ol loa blong God. (Dut. 17⁠:​18-20) Tede tu, fasin blong ridim Baebol evri dei i givhan long yumi blong mekem tingting blong yumi i stap klin gud long wol ya we i nogud mo i kruked, nao bambae i no gat man we i gat poen agens long yumi. Fasin ya i givhan long yumi tu blong yumi savegud ol rod blong mekem ol gudfala wok taem yumi prij.​—⁠Fil. 2⁠:15; 2 Tim. 3⁠:⁠17.

3. ?Wanem ol blesing we yumi kasem taem yumi joen oltaem long ol miting?

³ Jisas i gat fasin ya blong go oltaem long haos blong prea, ples ya we ol man oli stap tokbaot Baebol. (Luk 4⁠:16) I sua se samting ya i givim paoa long hem blong winim ol traem we biaen hem i kasem. Ol tijing blong Baebol oli save givim paoa long yumi tu. Yumi kasem ol tijing ya long ol miting blong kongregesen mo taem yumi joen wetem ol brata sista ale, ‘bilif blong olgeta i givhan long yumi, olsem we bilif blong yumi i givhan long olgeta.’ (Rom 1⁠:12) Taem yumi joen wanples wetem ol brata sista blong yumi, hemia i givhan long yumi blong stanap strong tru long ol trabol long ol las dei ya. (Hib. 10⁠:​24, 25) ?Olsem wanem? ?Yu yu folem fasin ya yet blong joen long olgeta miting?

4. ?Sipos yumi joen long wok blong prij evri wik, olsem wanem hemia i save karem blesing long yumi?

⁴ Baebol i talem se ol aposol oli joen blong talemaot gud nius “evri dei, long haos blong God, mo insaed long ol haos blong ol man.” (Wok 5⁠:42) Maet yumi no naf blong prij evri dei, be i gud yumi folem fasin ya blong joen long wok blong prij evri wik. Sipos yumi mekem olsem, bambae yumi gat gudhan blong yusum Baebol, mo bambae yumi kasem ol gudfala frut taem yumi talemaot trutok blong Baebol long ol narafala.

5. ?From wanem i impoten blong prea long Jeova oltaem?

⁵ Profet Daniel i kasem bigfala blesing from we long ful laef blong hem, hem i mekem wok blong Jeova ‘long olgeta tingting blong hem.’ Hemia i min se hem i prea oltaem long Jeova. (Dan. 6⁠:​10, 16, 20) Long sem fasin, sipos yumi prea oltaem long Jeova wetem ful hat blong yumi, hem bambae i givim tabu spirit long yumi olsem wan blesing. (Luk 11⁠:​9-13) Antap moa, bambae Jeova i kam klosap moa long yumi, bambae hem i letem blong yumi kam fren moa wetem hem. (Sam 25⁠:14; Jem. 4⁠:⁠8) !Hemia i wan bigfala presen! Taswe, i gud yumi wokhad blong holem wan gudfala program long saed blong wosip, mo kasem ol bigfala blesing we Jeova i givim.