Leta Blong Branj Ofis

Ol Gudfala Pablisa Blong Kingdom:

Mifala i wantem talemaot tangkiu from wok we yufala i mekem long ol aelan blong Niukaledoni, Vanuatu, mo Walis mo Futuna long sevis yia 2006. Mifala i no gat ful ripot blong sevis yia yet, be i gat plante samting finis we yumi save glad from.

Long Eprel 12, 2006, yumi kasem niufala namba blong ol man we oli kam long Memoriol long Niukaledoni mo Vanuatu. Long Niukaledoni, i bin gat 5,506 man, long Vanuatu 2,534 man, mo long Walis mo Futuna, i bin gat 339 man. Fulnamba hemia 8,379. Namba ya i 10 pesen antap long hemia blong las yia. Plante man oli stap tekem aksin taem oli harem tok we i pulum olgeta blong oli ‘kam fren blong God.’ (2 Kor. 5:20) Long trifala kantri ya, i bin gat 3,130 Baebol stadi long manis Eprel. Mifala i talem gudfala toktok long yufala from fasin kea mo intres we yufala i gat long ol gudfala man ya.

Ol disasta oli kasem plante ples long wol. Ol trabol ya oli givim janis long yumi blong soem trufala Kristin lav. Long Amerika, wan brata we i mas ronwe i go long wan narafala taon from hariken Katrina, i talem se: “Mifala i kam wetem ol klos nomo we mifala i werem. Kwiktaem nomo ol brata sista oli tekem aksin. Oli mekem welkam long mifala. Oli wantem se mifala i stap wetem olgeta.”

Bitim 8,000 brata mo sista oli stap wok wetem 60 Komiti Blong Bildim Ol Haos Kingdom. Ol brata sista ya oli givim taem, mane, mo gudhan we oli gat, blong mekem wok blong givhan long ol narafala. Oli givhan blong riperem no bildim bakegen 86 Haos Kingdom mo 4,178 haos. !Yumi evriwan i talem bigfala tangkiu from wok we oli mekem blong soem lav!—1 Tes. 5:18.

Mifala i save se bambae yufala i gohed blong prea from kampani blong ol brata sista long fulwol, mo blong Jeova i blesem wok blong yumi blong mekem ol disaepol.

Ol brata blong yufala,

Betel Blong Niukaledoni