Ansa Long Wan Kwestin

◼ ?I stret blong mekem fanresing blong givhan long kongregesen?

Ol jos oli mekem ol defdefren fanresing blong kasem mane. Long ol fanresing ya, oli salem kakae, oli salem ol defren samting, mo oli mekem ol lafet. Samfala oli ting se fanresing olsem i gud from we i blong halpem jos. Be ol samting ya oli rili wan rod blong askem mane long ol man. Ol Witnes blong Jeova oli no folem rod ya blong kasem help long saed blong mane.

Namba tu Wajtaoa we oli printim long Ogis, 1879, i tokbaot from wanem yumi no folem fasin blong ol jos blong askem mane, i se: “Mifala i bilif se JEOVA nao i sapotem ‘Zion’s Watch Tower,’ mo sipos hem i gohed blong sapotem, bambae mifala i neva askem no pulum ol man blong oli givim mane long mifala. Jeova nao i talem se: ‘Olgeta silva mo gol we oli stap long ol hil oli blong mi.’ Sipos mifala i no moa kasem naf mane blong wokem magasin ya, bambae mifala i kasem save se i taem nao blong mifala i no moa wokem magasin ya.”

Yumi gohed blong folem rul ya blong Baebol: “Evri man oli mas givim sam samting, olsem we olgeta wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem, from we God i lavem man we i save givim samting long gladhat blong hem.” (2 Kor. 9:7) Insaed long Haos Kingdom, i gat ol bokis blong presen mane. Sipos ol man oli wantem givim presen mane, oli save putum mane insaed long ol bokis ya. (2 King 12:9) Yumi no askem ol man blong oli givim mane. Mo tu, yumi no givim mane wetem tingting ya se yumi mas kasem samting from.