Folem Kraes Taem Yumi Gat Ol Fasin We Oli Leftemap Jeova
1. ?Olsem wanem stamba tok blong asembli blong yia ya, bambae i givhan long yumi blong gat fasin we i leftemap Jeova?
1 Baebol i tokbaot Jeova we i Haefala Masta long heven mo wol se haenem blong hem i olsem klos blong hem. (Sam 104:1) Oltaem ol toktok blong Jisas mo fasin blong hem i soemaot se hem i tinghae long Papa blong hem mo ol samting we hem i givim. (Jon 17:4) Wanwan long yumi bambae i gat janis blong folem eksampol blong Jisas mo leftemap nem blong Jeova long taem blong Distrik Asembli we stamba tok blong hem se, “!Folem Kraes!”
2. ?Olsem wanem fasin blong yumi blong rere gud blong stap long taem ya i soem se yumi tinghae long Jeova?
2 Wosip We i Leftemap God: Yumi save soem se yumi tinghae long Jeova, sipos yumi joen fulwan blong kakae nambawan kakae long saed blong spirit we hem i rerem finis. ?Yu toktok finis wetem bos blong yu blong yu save joen long trifala dei blong asembli ya we yu no mestem Fraede tu? ?Yu mekem plan finis blong yu save stap eli mo joen long faswan singsing mo prea? Bambae yu save karem kakae blong yu i kam long taem ya blong yu save kakae wetem ol brata mo sista blong yu. Taem program i stat yumi mas stop blong storian, mo sidaon kwaet blong statem program blong yumi.
3. ?Olsem wanem fasin blong putum tingting blong yumi i stap strong long program ya i leftemap wosip blong yumi?
3 Sipos yumi putum tingting blong yumi i stap strong long program ya, samting ya bambae i leftemap nem blong Papa blong yumi long heven. Wan man blong niuspepa i raetem toktok ya afta we hem i bin joen long wan distrik asembli se: “Olgeta oli ol gudfala eksampol blong ol man we oli stap long taem ya from we oli folemgud samting we oli tijim, oli gat bigfala respek mo oli laekem ol samting long saed blong spirit.” Mo tu, hem i tokbaot ol nambawan fasin we “plante pikinini . . . oli gat taem oli lesin gud, oli gat gudfala fasin mo oli traehad blong faenem ol vas blong Baebol.” Taem program i stap gohed hem i no moa taem blong storian, pasem mesej, kakae, no wokbaot olbaot. Ol pikinini oli mas sidaon klosap long papa mama blong olgeta, olsem nao papa mama i save givhan long olgeta blong lesin gud long program. (Dut. 31:12; Prov. 29:15) Ol traehad ya oli soem respek long ol narafala mo oli soem se yumi gat tangkiu from ol kakae long saed spirit we yumi kasem.
4. ?From wanem klos mo hea i mas leftemap Jeova long taem blong asembli?
4 Klos Mo Hea We i Leftemap Jeova: Fulap oli tingbaot tok ya we i bin kamaot long distrik asembli las yia we stamba tok blong hem se “Soem Respek Long Haenem Blong Jeova Tru Long Ol Fasin Long Laef Blong Yumi.” Hem i tokbaot wanem tingting we ol man blong God oli mas gat long saed blong fasin blong putum klos mo mekem hea. Long yia ya yumi mas traehad blong putum tingting i stap strong long ol samting ya bakegen. Fasin blong yumi bambae i soemaot filing we yumi gat long Jeova mo nambawan blesing we yumi gat blong stap olsem ol Witnes blong hem. Oltaem yumi mas putum klos we i stret long ol man we “oli talem se oli lavem God.”—1 Tim. 2:9, 10.
5. ?Olsem wanem klos mo hea blong yumi i save leftemap Jeova long taem blong spel tu?
5 ?Yumi mas gat ol klos we i leftemap Jeova long ples blong asembli nomo? Yumi mas tingbaot se ol man bambae oli wajem yumi tu taem yumi stap afsaed long ples blong asembli from we yumi werem baj. Fasin blong yumi i mas soemaot se yumi defren long ol narafala. From samting ya, nating se hem i taem blong spel, no yumi go aot blong kakae afta we program i finis, fasin blong yumi i mas soemaot se yumi ol man blong wok blong God we yumi kam blong wan impoten asembli, mo i nogud yumi werem ol klos olbaot. !Hemia bambae i givim bigfala witnes long ol man raonabaot! Jeova bambae i glad tumas sipos fasin blong yumi i soemaot klia se yumi ol man blong wok blong hem.
6. ?Wanem nambawan frut i save kamaot taem yumi soemaot ol fasin we i leftemap Jeova?
6 Gudfala Frut: Sipos yumi wokem ol Kristin fasin long taem blong asembli ya, samting ya bambae i givim janis long yumi blong prij long ol man mo bambae i givim gudfala tingting long ol man long saed blong yumi. Long wan asembli, wan man blong gavman i makem se: “Mifala i neva luk man we i gat gudfala fasin olsemia, fasin blong yufala i laenap gud wetem wanem God i wantem man i mekem.” Moa we yumi gat ol gudfala fasin moa we yumi soem respek mo lav long ol narafala mo yumi leftemap Jeova. (1 Pita 2:12) Fasin ya i soemaot se yumi fraet gud long God mo yumi gat tangkiu long nambawan blesing ya se Jeova i stap tijim yumi. (Hib. 12:28) I gud yumi traehad blong wokem ol fasin we oli leftemap Jeova long Distrik Asembli ya we stamba tok blong hem se “!Folem Kraes!”
[Bokis blong pija long pej 5]
Ol Samting Blong Tingbaot Long Taem Blong Distrik Asembli
◼ Taem Blong Program: Long trifala dei ya, program bambae i stat long twanti pas naen long moning. Ol doa blong haos asembli bambae oli open long 8 klok long moning. Taem ol Kingdom miusik i stat, yumi evriwan i mas sidaon rere, nao program i save stat long fasin we i gat oda mo i soem respek. Program bambae i finis long faef pas faef long Fraede mo Sarede aftenun, mo long ten pas fo long Sande aftenun.
◼ Paking: From we plante taem ples blong paking i smol, i moagud we plante man oli joen tugeta long wan trak, i bitim we i gat wan no tu man nomo long wan trak.
◼ Blokem Jea: Yu save blokem jea blong olgeta nomo we oli kam long trak blong yu mo olgeta we oli stap long haos blong yu.
◼ Kakae Long Medel Dei: Plis tekem kakae nomo long ples blong asembli no karem kakae i kam, i bitim we yu aot long ples blong asembli long medel dei blong go kakae. Yu save karem kakae long wan smol eski mo putum aninit long jea blong yu. I tabu blong karem ol bigfala eski, ol glas, mo ol dring we i gat alkol long hem.
◼ Presen Mane: Oli spenem plante mane blong mekem rere wan distrik asembli. Yumi save soemaot tangkiu taem yumi givim presen mane long Haos Kingdom blong yumi no long asembli, blong sapotem wok blong yumi long fulwol. Sipos yumi raetem wan jek olsem presen, yumi mas makem nem ya “A.S.T.J.” long hem.
◼ Aksiden Mo Sik: Long sam asembli we oli pas finis, ofis blong dokta i bin komplen se samfala oli singaot dokta from ol samting we oli no impoten nating. Sipos wan aksiden no wan sik i kamaot long ples blong asembli, plis go talem long man blong welkam we i stap stanap klosap long yu, mo hem bambae i go long ofis blong dokta kwiktaem, blong oli save luk wanem help we sikman i nidim. Sipos hem i sik tumas, bambae oli singaotem ambulans.
◼ Rikoding: Yu no mas yusum lektrik long ples blong asembli blong rikodem samting, mo sipos yu rikodem ol tok, yu no mas mekem noes we i spolem ol narafala.
◼ Pepa Blong Gobak Luk Man We i Intres: Pepa ya Please Follow-Up (S-43) i blong raetem ol save long saed blong eni man we i soem intres taem yumi tekem janis blong prij long olgeta long taem blong asembli. Yu save kasem pepa ya long Ples Blong Ol Buk. Afta we yu fulumap pepa ya, yu save givim long ol brata long Ples Blong Ol Buk, sipos no, afta long asembli yu save givim long sekretari blong kongregesen blong yu.—Lukluk Kingdom Wok Blong Yumi blong Februari 2005, pej 6.
◼ Ples Blong Slip Mo Transpot: Ol Proveb 3:27 i talem se: “Sipos yu gat janis blong givhan long narafala man, i gud yu gohed, yu mekem i gud long hem, stret olsem we hem i wantem.” ?Olsem wanem yu save mekem i gud long ol narafala long taem blong asembli? Ol pablisa we oli stap longlongwe bambae oli kam long ples blong asembli. Yumi save givhan long olgeta blong mekem plan fastaem blong faenem ples blong slip mo transpot. Ol olfala pablisa, olgeta we oli handikap, olgeta we oli mekem wok blong fultaem paenia, mo sam narafala bakegen oli nidim help long saed blong transpot mo ples blong slip. Ol famle blong olgeta oli mas ol faswan we oli lukaot long olgeta. (1 Tim. 5:4) Be sipos ol famle oli no naf blong givhan, maet ol Kristin brata sista oli save givhan long olgeta. (Gal. 6:10) Ol elda we oli lukaot long ol Buk Stadi, oli mas jekemgud olgeta we oli gat spesel nid long buk stadi blong olgeta, blong meksua se oli mekem gud plan blong olgeta longtaem bifo we asembli i kam.
◼ I gat Pepa Blong Askem Rum Blong Slip blong olgeta we bambae oli joen long asembli. I gud se yumi evriwan i fulumap pepa ya longtaem bifo long asembli blong askem ples blong slip, no blong tekem samfala oli kam slip long haos blong yumi. Sevis Komiti blong kongregesen i mas lukluk gud long fasin blong ol pablisa. Oli mekem ol plan ya blong ol pablisa we oli gat ol gudfala Kristin fasin, mo ol pikinini blong olgeta we oli gat gudfala fasin tu.