Presem Jeova Long Medel Blong Bigfala Kongregesen
1, 2. ?Distrik asembli i givim wanem janis long yumi, mo long wanem rod yumi save mekem olsem?
1 Distrik asembli we yumi gat evri yia, i givim nambawan janis long yumi blong presem nem blong Jeova. Long teritori we branj ofis blong yumi i lukaot long hem, faswan distrik asembli long yia ya bambae i stat long Vanuatu long Ogis 26-28. Biaen, bambae i gat tu asembli long Niukaledoni long Septemba 16-18 mo Septemba 23-25, mo biaen bakegen, long Walis mo Futuna, long Oktoba 1-2. Filing blong yumi i sem mak long hemia blong Deved, we i singsing se: “Nao bambae mi talem tangkiu long yu [“long medel blong bigfala kongregesen,” NW ] bambae mi presem yu long fes blong olgeta evriwan.” (Sam 35:18) ?Long Distrik Asembli ya “Obei Long God,” olsem wanem yumi save meksua se yumi evriwan yumi joengud olsem wan, blong presem nem blong Jeova?
2 Wan rod blong mekem olsem, hemia tru long ol fasin blong yumi. Bos blong wan haos we i bin gat asembli long hem, i talem se: “Afta long asembli blong yufala, mifala i bin talem long ol narafala grup blong jos we oli wantem rentem ples ya, se oli mas kam luk olsem wanem ol Witnes blong Jeova oli rerem ol asembli blong olgeta, from we oli folem wan nambawan plan.” Wanwan long yumi i save givhan blong pulum ol man blong talem ol gudfala tok olsem, we i rili mas go long God blong yumi blong presem hem. Yumi mekem olsem, tru long ol klos mo hea blong yumi, long fasin blong yumi blong wokgud wetem ol narafala, mo long ol narafala fasin blong yumi.—1 Pita 2:12.
3, 4. ?Olsem wanem tingting daon bambae i halpem yumi blong putum ol klos we i stret long wan Kristin, long taem blong asembli mo long en blong dei afta we asembli i finis?
3 Klos Mo Hea Blong Yumi: I nidim tingting daon blong mekem se ol klos mo hea blong yumi i presem Jeova. (1 Tim. 2:9) Long pej 132 blong buk ya Ministry School, i talem se: “Wan man we i gat tingting daon, i tingbaot se hem i no wantem mekem samting we narafala i save harem nogud long hem, mo i no wantem pulum ae blong ol narafala.” Long plante kantri, ol man oli ting nating long ol klos we oli sot no we oli soem bodi. Be yumi mekem Jeova i glad taem yumi traehad blong putum ol klos we oli stret long man we i holem nem blong Hem. (Wok 15:14) Nating sipos asembli i stap long wan stadium no long wan ples blong pleplei, be long ol trifala dei blong asembli ya, ol man we oli hivap long ples ya oli kam “bigfala kongregesen” blong yumi. Taswe, taem yumi joen wanples long fored blong Jeova, yumi mas putum ol klos we oli soemaot bigfala respek long Man ya we i hae moa long ol narafala long heven mo wol.—1 Kron. 29:11.
4 Yumi mas lukaotgud tu long wanem klos we yumi putum afta we asembli i finis evri dei. Maet yumi wantem putum ol klos blong spel nomo taem yumi wokbaot no yumi go kakae long restorong. Be long taem ya tu, i impoten we ol klos mo hea blong yumi oli stret long olgeta “we oli stap talem se oli lavem God.” (1 Tim. 2:10) Yumi no mas lukluk ol stael we ol man blong wol oli laekem, blong jusum wanem klos i stret. (1 Jon 2:16, 17) Ol Kristin buk blong yumi oli save givhan long yumi, from oli gat ol naes pija blong ol man mo woman we oli stap long ol defren ples, be oli putum ol klos we oli gud mo oli stret. Taem yumi werem baj blong yumi long taon we asembli i stap long hem, hemia bambae i mekem yumi tingbaot se yumi stap olsem ol Kristin man blong wok oltaem nomo.—2 Kor. 6:3, 4.
5, 6. ?Olsem wanem yumi save soemaot se yumi gat respek long tebol blong Jeova long saed blong spirit?
5 Respektem Tebol Blong Jeova: Haefala Masta blong heven mo wol i putum wan bigfala lafet long fored blong yumi. (Aes. 25:6; 1 Kor. 10:21) Sipos yumi rili tinghae long blesing ya blong gat wan ples long tebol blong Jeova long saed blong spirit, bambae yumi putum mak ya se yumi mas stap long ol trifala dei blong asembli ya. ?Yu yu faenem finis wan ples blong slip, transpot blong go long asembli, mo yu askem finis sam dei blong spel long wok? ?Yu yu makemaot naf taem blong jenis mo wokbaot i go long ples blong asembli, blong yu save kasem ples ya eli mo faenem jea, storian wetem ol brata mo sista, mo joen wetem olgeta long faswan singsing mo prea blong presem Jeova?—Sam 147:1.
6 Respek we yumi gat long tebol blong Jeova, bambae i pusum yumi blong lesingud taem program i stap gohed, mo blong no toktok wetem ol narafala, no kakae, mo no wokbaot. Tru long slef we i stret mo waes, Jeova i stap givim ol kakae long saed blong spirit we yumi rili nidim tede. (Mat. 24:45, NW ) Yumi no mas mestem wan long ol kakae ya. Ol papa mama oli mas sidaon wetem ol pikinini blong olgeta mo halpem olgeta blong oli kasem olgeta kakae ya we i save givhan bigwan long olgeta.—Dut. 31:12.
7. ?I gud yumi mekem wanem long medel dei, mo from wanem?
7 I gud we yumi tekem kakae long ples blong asembli nomo, sipos no, yumi karem prapa kakae blong yumi i kam. Be yumi no mas lego ples blong asembli long medel dei blong go kakae long haos. I gud tumas we bighaf blong olgeta we oli joen long asembli las yia oli folemgud advaes ya. !I gud tumas sipos long yia ya evriwan oli mekem sem mak bakegen! (Hib. 13:17) Rod ya i givim janis long yumi blong joengud wetem ol brata sista, blong lefleftemap tingting blong yumi, mo blong mekem se pis mo fasin joengud i stap. Fasin ya i save karem ona i go long Jeova.—Sam 133:1.
8, 9. ?Wanem narafala janis blong presem Jeova we asembli i givim long yumi?
8 Tekem Janis Blong Prij: Taem yumi stap go mo kambak long ples blong asembli, yumi gat plante janis blong presem Jeova wetem maot blong yumi. (Hib. 13:15) Nomata wanem ples we yumi stap long hem, yumi mas lukaotem rod blong prij long ol man. Tingting mo hat blong yumi bambae i fulap long ol sas samting long saed blong spirit we yumi kasem long asembli. Yumi mas tekem janis blong serem ol gudfala samting ya wetem ol narafala.—1 Pita 3:15.
9 Yumi wet wetem bigfala glad long janis ya blong presem Jeova “long medel blong kongregesen.” (Sam 26:12, NW ) I gud we yumi evriwan i gat wan tingting nomo blong presem Jeova long Distrik Asembli ya “Obei Long God.”
[Bokis blong pija long pej 4]
Ol Samting Blong Tingbaot Long Taem Blong Distrik Asembli
◼ Taem Blong Program: Long trifala dei ya, program blong moning bambae i stat long haf pas 9. Doa bambae i open long 8 klok long moning. Sam minit bifo we asembli i stat, jeaman bambae i sidaon long platfom mo ol Kingdom miusik bambae i stat. Long taem ya, yumi evriwan i mas sidaon rere long jea blong yumi, blong mekem se program i save stat long fasin we i gat oda mo i soem respek. Program bambae i finis long faef pas faef long Fraede mo Sarede aftenun, mo long ten pas fo long Sande aftenun.
◼ Paking: Long olgeta ples blong asembli we oli gat paking, ol trak we oli kam fastaem bambae oli fulumap ol ples ya. Olgeta we oli gat pepa blong soemaot se oli handikap, olgeta nomo bambae oli save putum trak blong olgeta long paking we i blong ol handikap. From we plante taem ples blong paking i smol, i moagud we plante man oli joen tugeta long wan trak, i bitim we i gat wan no tu man nomo long wan trak.
◼ Blokem Jea: Yu save blokem jea blong olgeta nomo we oli kam long trak blong yu mo olgeta we oli stap long haos blong yu.
◼ Presen Mane: Oli spenem plante mane blong mekem rere wan distrik asembli. Yumi save soemaot tangkiu taem yumi givim presen mane long Haos Kingdom blong yumi no long asembli, blong sapotem wok blong yumi long fulwol. Sipos yumi raetem wan jek olsem presen, yumi mas makem nem ya “A.S.T.J.” long hem.
◼ Travel: Ol wanwan man mo ol famle oli mas mekem plan kwiktaem blong faenem rod blong go long asembli mo blong faenem ples blong slip.
◼ Kakae Long Medel Dei: Plis tekem kakae nomo long ples blong asembli no karem kakae i kam, i bitim we yu aot long ples blong asembli long medel dei blong go kakae. Yu save karem kakae long wan smol eski mo putum aninit long jea blong yu. I tabu blong karem ol bigfala eski, ol glas, mo ol dring we i gat alkol long hem, oli kam long ples blong asembli.
◼ Rikoding: Yu no mas yusum lektrik long ples blong asembli blong rikodem samting, mo sipos yu rikodem ol tok, yu no mas mekem noes we i spolem ol narafala.
◼ Mobael Fon: Yu mas mekem se oli no spolem ol narafala.
◼ Aksiden Mo Sik: Ofis blong Dokta i komplen se samfala oli kam singaot olgeta from ol samting we oli no impoten nating. Sipos wan aksiden no wan sik i kamaot long ples blong asembli, plis go talem long man blong welkam we i stap stanap klosap long yu, mo hem bambae i go long ofis blong dokta kwiktaem blong dokta i save luk sipos trabol ya i bigwan we i nidim help kwiktaem. Sipos i nidim, bambae oli singaotem ambulans.
◼ Long Taem Blong Asembli: Ol papa mama oli no mas letem ol pikinini blong olgeta oli ronron olbaot, be oli mas wajemgud olgeta blong meksua se fasin blong olgeta i soemaot se oli obei long God.—Prov. 29:15.