Distrik Asembli—Wan Taem Blong Wosipim Jeova Wetem Glad
1. ?Olsem wanem ol lafet blong ol man Isrel oli sem mak long ol distrik asembli blong yumi?
1 Evri yia, Josef, Meri, ol pikinini blong tufala, mo plante narafala man, oli go long ol lafet we oli stap long Jerusalem. Long ol lafet ya, olgeta wetem ol narafala we oli wosipim Jeova, oli traehad blong fogetem ol trabol we oli fesem long laef evri dei. Nao oli putum tingting blong olgeta moa long ol impoten samting long saed blong wosip, we i save givhan long laef blong olgeta. Ol lafet ya oli givhan long olgeta tu blong tingting dip mo blong tokbaot ol gudfala fasin blong Jeova mo blong tingbaot Loa blong Hem. Long distrik asembli we i stap kam, bambae yumi gat janis blong mekem olsem ol man Isrel bifo mo harem gud long wosip we yumi mekem long Jeova.
2. ?Yumi mas mekem wanem blong rere gud from nekis distrik asembli?
2 Yumi Mas Rere: Jisas mo famle blong hem oli mas wokbaot samwe long 120 kilometa, blong go long lafet mo kambak bakegen long Nasaret. Nating se yumi no save hamas brata mo sista we Jisas i gat, yumi save se Josef mo Meri i traehad mo tufala i plan gud blong go long ol lafet ya. ?Olsem wanem? ?Yu tu, yu mekem sam plan finis blong yu save stap long nekis distrik asembli, long trifala dei ya? Maet yu mas tekem spel long wok, no yu mas askem long bos blong yu sipos yu save tekem spel long ol dei blong asembli. Mo yu mas talem long tija long skul, se pikinini blong yu bambae i no kam long skul long taem ya. ?Sipos yu nidim wan ples blong slip, yu mekem plan finis long saed ya? ?Yu yu tekem janis blong givhan long hemia we i gat spesel nid long kongregesen, blong hem tu i save go long distrik asembli?—1 Jon 3:17, 18.
3. ?Olsem wanem ol lafet blong ol man Isrel, i givim janis long olgeta blong leftemap tingting blong olgeta?
3 Fasin Joen i Leftemap Tingting: !Ol lafet blong ol man Jiu, i givim janis long ol man we oli wosipim Jeova blong oli kam wanples mo blong oli leftemap tingting blong olgeta! Ating famle blong Jisas i wantem tumas blong stap long taem ya, blong oli save joen bakegen wetem ol fren blong olgeta we oli save olgeta longtaem finis. Mo tu, taem oli wokbaot i go, mo taem oli stap long Jerusalem blong mekem ol lafet ya, oli joen wetem plante man Isrel mo ol man blong narafala ples tu. Hemia i givim janis long olgeta blong mitim ol narafala man mo blong gat plante niufala fren.
4. ?Olsem wanem yumi soemaot se yumi tinghae long kampani blong ol Kristin brata blong yumi?
4 Wan risen from wanem slef we i stret mo waes i mekem plan blong yumi kam wanples blong lesin long ol tok long distrik asembli, i blong yumi save leftemap tingting blong yumi. Hemia wan rod blong mekem yumi haremgud. From samting ya, slef ya i no wantem givim ol save ya tru long ol buk mo long leta nomo. (Hib. 10:24, 25) I gud yumi mekem plan blong kam eli. Yumi save harem gud long kampani blong ol narafala, bifo we jeaman i askem long yumi blong yumi sidaon mo lesin long program blong miusik. Yumi save karem smol kakae mo stap long ples blong asembli long dina, nao yumi save sekhan long olgeta we oli stap klosap long yumi mo storian wetem olgeta. Ol Kristin brata we oli joengud, oli olsem ol presen we Jeova i givim, taswe yumi mas harem gud long kampani blong olgeta.—Maeka 2:12.
5. ?Wanem samting we bambae i halpem yumi blong harem gud fulwan long program?
5 Taem Blong Lanem Samting: Taem Jisas i wan yangfala nomo, hem i go long ol lafet ya mo i yusum taem ya blong lanem ol samting long saed blong Papa blong hem long heven. (Luk 2:41-49) ?Wanem samting we bambae i halpem yumi mo famle blong yumi, blong harem gud long ol defdefren tok we oli kamaot? Taem ol tok oli stap gohed, i nogud blong wokbaot olbaot mo storian wetem man we i sidaon klosap long yumi long ol samting we oli no impoten. I gud blong ofem ol mobaelfon, mo ol narafala samting we oli save blokem yu mo narafala blong yufala i no lesingud. Lukluk brata we i givim tok mo tekem sam sotfala not. I gud we famle i sidaon wanples, mo yu mas meksua se ol pikinini blong yu oli lesin long ol tok tu. Ale long sapa, yufala i save tekem smol taem blong tokbaot ol poen we yufala i laekem.
6. ?Oltaem yumi mas tingbaot wanem long saed blong ol klos we yumi werem, mo hea blong yumi?
6 Klos Mo Hea Blong Yumi: Long taem bifo, ol bisnesman we oli wokbaot long rod, oli luksave famle blong Jisas mo ol narafala man Jiu we oli wosipim God, we oli stap go mo kambak long ol lafet. Oli luksave olgeta from ol tasel we oli stap hanghang long ol kona blong klos blong olgeta, mo blu rop we i stap long ol tasel ya. (Nam. 15:37-41) Nating we yumi ol Kristin yumi no werem spesel klos, ol man oli save yumi from we yumi putum ol klos we oli stret mo klin. Yumi mas lukaot long klos we yumi werem, speseli taem yumi go mo kambak long asembli, mo taem yumi stap long taon we asembli i stap long hem. Nating sipos yumi jenisim klos blong yumi afta long program blong asembli, be yumi mas werem ol klos we i givim ona long Jeova, mo werem baj blong asembli tu. Long rod ya nao, yumi soemaot se yumi defren long ol narafala we oli no Witnes blong Jeova, mo yumi givim gudfala tingting long ol man we oli lukluk yumi.
7. ?From wanem yumi mas tingbaot wok blong volontia long taem blong distrik asembli?
7 I Nidim Ol Volontia: Blong distrik asembli i rongud, i nidim plante man blong wok. ?Olsem wanem? ?Yu yu save volontia blong mekem wok? (Sam 110:3) Wok we yumi mekem long taem blong distrik asembli i wan haf blong tabu wok blong yumi, mo i save givim wan gudfala witnes long ol man. Long wan kantri, maneja blong haos we oli holem asembli long hem, i sapraes taem hem i luk ol Witnes we oli klinim haos ya. Hem i talem se: “Mi mi wantem talem tangkiu from samting we mi mi neva luk bifo, mo mi sapraes tumas long hem. Oltaem mi harem se ol Witnes blong Jeova oli defren long ol narafala grup, oli gat gudnem from we oltaem oli lego haos we oli holem asembli long hem, i stap klin moa i bitim bifo we oli yusum. Yufala mo ogenaesesen blong yufala, yufala i mekem we ples ya i kam moagud blong ol man long komuniti. Mo grup blong yufala we i mekem samting ya, i moa kaen i bitim olgeta narafala grup.”
8. ?Wanem janis blong prij we bambae yumi gat, taem yumi stap long ples blong distrik asembli?
8 Janis Blong Prij: Plante man we oli kam long distrik asembli bambae oli luk yumi wetem ol klos mo hea we i stret, mo ol baj tu, nao samting ya i save pulum tingting blong olgeta. Mo maet i givim janis long yumi blong tokbaot distrik asembli long olgeta. Wan pikinini we i gat fo yia blong hem, i karem wan niufala buk we i jes kamaot long asembli i go wetem hem long restoron afta long program blong asembli. Hem i soem buk ya long woman we i wok long ples ya. Samting ya i givim janis long papa mama blong hem blong singaot woman ya i kam long distrik asembli.
9. ?Olsem wanem yumi save folem tingting blong famle blong Jisas, taem yumi gat janis blong lanem moa long saed blong Jeova?
9 Ol lafet bifo, oli ol taem blong glad. Mo ol man Jiu we oli wantem lanem moa long saed blong Jeova, oli wantem tumas blong go long ol lafet ya. (Dut. 16:15) Famle blong Jisas i glad nomo blong lego evri samting blong go long lafet mo harem gud fulwan. Tede tu, yumi talem tangkiu from ol distrik asembli blong yumi. Yumi tingbaot ol asembli ya olsem ol presen we oli kam long Papa blong yumi long heven. (Jem. 1:17) !Naoia i taem blong reregud from janis we yumi gat long yia ya blong wosipim Jeova wetem glad!