Bambae Yumi Harem Gud Tumas Long Tri Dei Blong Distrik Asembli
1. ?Distrik asembli we i stap kam klosap, bambae i mekem wanem long yumi?
1 Long wol ya blong Setan we i olsem wan draeples, Jehova i stap gohed blong mekem ol man blong hem oli harem gud. (Aes. 58:11) Wan samting we Jehova i mekemrere evri yia blong givim paoa long yumi, hemia distrik asembli. Naoia we distrik asembli blong yia ya i stap kam klosap moa, ?yu save mekem wanem blong yu yu rere blong harem gud long ol gudfala samting we Jehova i givim long taem ya? ?Mo yu save mekem wanem blong givhan long ol narafala tu blong oli harem gud long ol samting ya?—Prov. 21:5.
2. ?Wanem ol plan we yumi mas mekem naoia?
2 Sipos yu no stat yet, i gud yu stat naoia blong jenisim program blong yu mo program blong wok blong yu, blong yu save stap long trifala dei blong asembli ya. ?Olsem wanem? ?Yu yu tingbaot finis, hamas minit no aoa bambae yu nidim evri dei blong go long ples blong asembli, mo blong sidaon rere bifo we program i stat? !Yu no mas mestem wan smol haf blong nambawan kakae ya we Jehova i rerem finis blong yumi! (Aes. 65:13, 14) ?Yu yu mekem plan finis long saed blong ples blong slip mo transpot?
3. ?Wanem advaes i save givhan long yumi mo famle blong yumi, blong yumi kasem ol gudfala samting long program blong asembli?
3 ?Wanem i save givhan long yu blong yu lesin gud, mo yu no letem tingting blong yu i flae olbaot? Yu mas spel gud evri naet. Mo tu, taem yu stap lesin, yu mas lukluk stret long brata we i stap givim tok. Yu mas ridim ol vas long Baebol blong yu. Yu save raetem ol smosmol not. I gud we ol famle oli sidaon wanples, olsemia, papa mama i save givhan long ol pikinini blong oli lesin gud. (Prov. 29:15) Long sapa, famle i save joen wanples blong tokbaot ol bigfala poen we oli kamaot long dei ya. Famle i save gohed blong harem gud afta long asembli tu. Long naet blong Famle Wosip, yufala i save tokbaot sam poen we oli bin kamaot long asembli, we yufala i save mekem i wok long laef blong yufala.
4. ?Yumi save mekem wanem blong givhan long sam narafala long kongregesen, blong olgeta tu oli kasem ol gudfala samting long asembli?
4 Yumi Givhan Long Narafala Blong Hem Tu i Harem Gud: Yumi wantem we ol narafala tu oli kasem ol gudfala samting long asembli mo harem gud long hem. Maet i gat sam olfala pablisa no sam narafala long kongregesen, we oli nidim help blong kam long asembli. ?Olsem wanem? ?Yu yu naf blong halpem olgeta? (1 Jon 3:17, 18) Ol elda, antap moa olgeta we oli lukaot long ol grup wanwan, oli mas meksua se ol pablisa olsem oli kasem help we oli nidim.
5. ?Wanem plan we bambae yumi folem blong givimaot ol pepa blong singaot ol man oli kam long asembli? (Lukluk bokis antap.)
5 Olsem long ol yia we oli pas finis, long yia ya tu bambae yumi mekem wan spesel wok blong singaot ol man oli kam long asembli ya. Bambae yumi statem wok ya tri wik bifo long asembli. Ol kongregesen oli mas traehad blong seremaot olgeta pepa we oli kasem, mo blong singaot olgeta man long ples blong olgeta. Be, taem wok ya i finis, maet famle blong yu i gat sam pepa oli stap yet. Ale, yu save karem ol pepa ya oli kam long asembli wetem yu, blong yusum taem yu tekem janis blong prij long taon we asembli i stap long hem. Long Fraede blong asembli, bambae yumi kasem moa save long saed blong ol pepa ya. Sipos yu no ting se bambae yu yusum olgeta pepa ya, yu save karem olgeta we bambae yu no yusum oli go long ples blong asembli, mo yu save givim long wan man blong welkam. Plis, yu mas holem wan kopi blong yu wan, from we bambae yu mas yusum pepa ya long las tok long Sande.
6. ?Wanem ol gudfala fasin blong soemaot respek we yumi save mekem long asembli?
6 Man We i Gat Respek i Mekem Narafala i Harem Gud: Tede, plante man oli “tingbaot olgeta nomo,” oli no kea long narafala. !Be yumi harem gud tumas blong stap wetem ol Kristin brata mo sista blong yumi, we oli traehad blong mekem ol gudfala fasin blong soemaot respek! (2 Tim. 3:2) Yumi soemaot respek sipos yumi no mekem noes taem yumi kam insaed long haos asembli, afta we doa i open long haf pas 7 long moning. Mo yumi soemaot respek taem yumi blokem jea blong olgeta nomo we oli stap long haos blong yumi, olgeta we oli kam long trak blong yumi, mo olgeta we yumi stap stadi wetem olgeta. Yumi obei taem jeaman i askem long yumi blong sidaon mo lesin long miusik we i statem asembli long moning mo aftenun. Mo tu, sipos yumi gat respek, bambae yumi mekem se mobaelfon blong yumi i no ring long taem we asembli i stap gohed. Olsemia, bambae yumi no spolem olgeta we oli stap traehad blong lesin. Mo bakegen, taem program i stap gohed, yumi soemaot respek sipos yumi no toktok, sanem mesej long mobaelfon, kakae, mo wokbaot blong nating nomo.
7. ?Yumi save mekem wanem blong harem gud long kampani blong ol brata mo sista, mo blong mekem olgeta tu oli harem gud?
7 Yumi Harem Gud Blong Kampani Wetem Ol Narafala: Long Distrik Asembli, yu yu gat janis blong joen gud wetem plante brata mo sista, mo yu save harem gud long kampani blong olgeta. (Sam 133:1-3) I gud yu traem “go moa,” blong storian wetem sam brata mo sista blong ol narafala kongregesen tu. (2 Kor. 6:13, NW) Maet yu traem blong mitim wan defren man no famle evri dei. Yu gat janis blong mekem samting ya, taem yumi spel long medel dei blong kakae. I gud yu karem smol kakae nomo i kam, ale taem yu stap kakae, yu save storian wetem ol narafala long ples blong asembli. Hemia i moa gud i bitim we yu go pem kakae long stoa, no yu go kakae long wan narafala ples. Taem yu storian gud wetem ol narafala, yu save faenem ol niufala fren we bambae oli stap longtaem olsem fren blong yu.
8. ?From wanem yumi mas volontia blong wok long asembli? ?Yumi save mekem samting ya olsem wanem?
8 !Yumi harem gud tumas blong joen wetem ol narafala man blong God blong mekem tabu wok blong hem! ?Olsem wanem? ?Yu yu glad blong volontia blong mekem wan wok long asembli? ?Yu yu save halpem kongregesen blong yu blong klinim ples? (Sam 110:3) Sipos yu no gat wan wok yet, plis tingbaot blong go luk brata we i lukaot long Ol Volontia long asembli. Taem plante man oli joen blong wok, evriwan oli glad, mo wok i no hevi.
9. ?From wanem yumi mas lukaot gud long fasin blong yumi mo klos mo hea blong yumi, long olgeta dei blong asembli?
9 Gudfala Fasin Blong Yumi i Mekem Man We i Luk Yumi i Harem Gud: I no long taem ya nomo we program i gohed, we yumi mas lukaot gud long fasin blong yumi. Be yumi mas mekem samting ya oltaem long ol tri dei blong asembli ya. Evri dei, afta we program blong asembli i finis, ol man we oli lukluk yumi long taon, oli mas luksave se fasin blong yumi i defren long fasin blong ol man we oli no Witnes. (1 Pita 2:12) Klos mo hea blong yumi long asembli, mo long ples blong slip, mo long restoron, mo long taon, oli mas leftemap nem blong Jehova. (1 Tim. 2:9, 10) Sipos yumi werem baj blong asembli, ol man bambae oli save se yumi Witnes blong Jehova. Samting ya i save openem rod blong yumi tokbaot asembli long olgeta, mo blong yumi prij moa long olgeta.
10. ?Wanem stori i soemaot se gudfala fasin blong ol Kristin i leftemap nem blong Jehova?
10 ?Gudfala fasin blong yumi i save mekem wanem long narafala? Wan niuspepa i talem tok blong maneja blong wan haos we ol brata oli mekem asembli long hem. Man ya i talem se: “Olgeta oli gat respek. Mifala i glad tumas we oli kam long ples ya evri yia.” Las yia, wan man we i no wan Witnes, i lusum paos blong hem long hotel we ol brata mo sista oli stap long hem. Oli faenem paos blong hem, mo oli givim long maneja blong hotel. I no gat wan mane i lus long paos ya. Taem maneja i givimbak paos ya long man we i lusum, hem i talem se: “Laki we ol Witnes blong Jehova oli stap mekem asembli klosap ya, mo oli kam fulumap hotel ya. Sipos no, ating yu no save luk paos blong yu bakegen.”
11. ?Taem Distrik Asembli i kam klosap moa, wanem tingting we yumi mas gat?
11 Distrik Asembli blong yia ya i stap kam klosap. Ol brata mo sista oli spenem plante taem mo oli wok had blong mekem gud ples blong asembli mo program, blong yumi evriwan i save harem gud long hem. Yu mas plan naoia blong stap long trifala dei ya evriwan. Yu mas rere from ol samting we Jehova mo ogenaesesen blong hem bambae oli givim long yu. Yu mas gat strong tingting blong soemaot respek, yu mas glad blong kampani wetem ol narafala Kristin, mo yu mas gat gudfala fasin. Ol samting ya bambae oli mekem ol narafala oli harem gud. Nao yu mo ol narafala bambae yufala i harem olsem wan woman we i go long asembli las yia. Hem i raetem se: “!Mi mi no save tingbaot wan narafala taem we mi mi harem gud moa!”
[Tok blong makem poen long pej 4]
Olsem long ol yia we oli pas finis, long yia ya tu bambae yumi mekem wan spesel wok blong singaot ol man oli kam long asembli ya. Bambae yumi statem wok ya tri wik bifo long asembli
[Tok blong makem poen long pej 6]
Klos mo hea blong yumi long asembli, mo long ples blong slip, mo long restoron, mo long taon, oli mas leftemap nem blong Jehova
[Tok blong makem poen long pej 7]
Yu mas gat strong tingting blong soemaot respek, yu mas glad blong kampani wetem ol narafala Kristin, mo yu mas gat gudfala fasin
[Bokis blong pija long pej 4-7]
Ol Samting Blong Tingbaot Long Saed Blong Distrik Asembli 2011
◼ Taem Blong Program: Long ol trifala dei, program bambae i stat long 20 minit pas 8 long moning. Bambae oli openem doa blong haos asembli long haf pas 7 long moning. Taem jeaman i talemaot se bambae i gat miusik blong statem program, yumi evriwan i mas go sidaon. Olsemia, yumi soemaot se yumi gat respek. Long Fraede mo Sarede aftenun, program bambae i finis long 5 minit bifo 4 klok, mo long Sande aftenun, bambae i finis long 20 minit bifo 3 klok.
◼ Ol Jea: Yu save blokem jea blong olgeta nomo we oli stap long haos blong yu, olgeta we oli kam long trak blong yu, mo olgeta we yu stap stadi Baebol wetem olgeta.—1 Kor. 13:5.
◼ Kakae Long Medel Dei: Plis, i moa gud yu karem smol kakae i kam long ples blong asembli, i bitim we yu go samples blong kakae long medel dei. Yu save karem kakae long wan smol eski mo putum aninit long jea blong yu. I tabu blong karem ol bigbigfala eski mo ol glas botel oli kam long haos asembli.
◼ Presen Mane: Taem yu putum presen mane long bokis long haos asembli blong givhan long wok blong Kingdom long fulwol, yu stap talem tangkiu from asembli ya. Sipos yu wantem raetem wan jek blong givim olsem presen, yu mas mekem jek ya i go long “ASTJ” no “Les Témoins de Jéhovah.”
◼ Aksiden Mo Sik: Sipos i gat wan aksiden no wan sik i kamaot long ples blong asembli, yu save talem long wan man blong welkam. Bambae hem i hareap blong singaot olgeta we oli lukaot long ol sikman, blong oli luk wanem help we sikman ya i nidim. Sipos i gat nid, bambae oli singaot ambulans i kam.
◼ Meresin: Sipos yu mas dring meresin oltaem from wan sik, plis yu meksua se yu karem naf meresin i kam wetem yu, from we bambae i no gat meresin ya long asembli.
◼ Ol Kat Blong Bebi: Yu no mas karem ol kat blong bebi oli kam insaed long haos asembli. Be yu save karem jea blong bebi, sipos hem i kaen ya we yu save fasem long wan jea klosap long yu.
◼ Pepa Blong Fulumap (S-43): Taem yu tekem janis blong prij long ples blong asembli, maet yu faenem wan man we i wantem save moa. Sipos i olsem, yu mas raetem ol save long saed blong hem long pepa ya Please Follow-Up (S-43). I gud we ol pablisa wanwan oli karem wan no tu pepa olsem i kam long asembli. Taem yu fulumap pepa ya finis, yu save givim long brata we i stap long Ples Blong Ol Buk long asembli. Sipos no, yu save givim long sekretari blong kongregesen, taem yu gobak long ples blong yu.—Yu save lukluk Kingdom Wok Blong Yumi, Novemba 2009, pej 4.
◼ Restoron: Yu mas tingbaot se gudfala fasin blong yu long ol restoron i save leftemap nem blong Jehova.
◼ Ol Volontia: Bambae yu glad moa long asembli sipos yu volontia blong mekem wan wok. (Wok 20:35) Brata no sista we i wantem mekem olsem, i mas go luk brata we i lukaot long Ol Volontia long asembli. Ol yangfala we oli no gat 16 yia yet, oli save wok wetem papa mama blong olgeta, no wetem wan narafala bigman we papa mama blong olgeta oli agri long hem.
[Bokis blong pija long pej 5]
?Bambae Yumi Talem Wanem Blong Givimaot Pepa Blong Singaot Man i Kam Long Asembli?
Yumi wantem singaot olgeta man long ples blong yumi, from samting ya, yumi no mas toktok longtaem tumas. Maet yu talem ol sot tok olsem: “Halo. Mifala i stap joen long wan wok we i stap gohed long fulwol, blong givimaot pepa ya blong singaot yu yu kam long wan spesel asembli. Hemia nao pepa blong yu. Ol save we yu nidim i stap insaed long pepa ya.” Samting we man i luk long fored blong pepa ya, bambae i pulum tingting blong hem. Taswe, taem yu givimaot pepa ya long wan man, yu mas meksua se hem i save luk fored blong hem. Yu mas toktok wetem glad. Sipos yu givimaot pepa ya long wiken, yu mas soem ol magasin tu, taem yu luk se i stret blong mekem olsem.