Distrik Asembli i Nambawan Rod Blong Talemaot Trutok
1. Long ol lafet blong ol man Isrel, ?oli tingbaot mo tokbaot wanem?
1 Tri taem long wan yia ol man Isrel oli joen wanples long ol lafet blong olgeta. Jehova i talem se ol papa oli mas go long ol lafet ya, be plante taem ful famle i wokbaot i go long Jerusalem blong joen long ol hapi taem ya. (Dut. 16:15, 16) Evriwan oli gat janis blong tingbaot mo tokbaot ol impoten trutok blong God. ?Wanem sam long ol trutok ya? Wan trutok, se Jehova i lavem ol man blong hem mo i givim plante samting long olgeta long gladhat blong hem. (Dut. 15:4, 5) Narafala trutok, se oli save trastem hem blong i lidim olgeta mo i lukaot gud long olgeta. (Dut. 32:9, 10) Ol man Isrel oli save tingbaot tu se Jehova i jusumaot olgeta blong oli kam ol prapa man blong hem, taswe oli mas soemaot stret fasin blong hem. (Dut. 7:6, 11) Yumi tokbaot ol gudfala samting ya tu long ol distrik asembli blong yumi.
2. Long distrik asembli, ?wanem samting bambae i mekem trutok i saenaot?
2 Ol Tok Long Asembli Oli Mekem Trutok i Saenaot: Long distrik asembli, bambae i gat plante samting we oli mekem ol bigfala trutok blong Baebol i saenaot. I gat ol tok, mo samfala oli aktem sam stori blong Baebol. Samfala oli aktem samting we i hapen long wok blong prij no long laef blong olgeta. Mo samtaem brata i singaot samfala oli kam antap, nao i askem kwestin long olgeta. (Jon 17:17) Ogenaesesen blong Jehova i mekem plante wok finis blong rerem ol save we ol man long olgeta ples blong wol oli nidim. (Mat. 24:45-47) ?Olsem wanem? ?Yu yu wantem lukluk mo harem ol samting we bambae oli kamaot long asembli ya?
3. Sipos yumi wantem kasem ol gudfala samting long asembli ya, ?yumi mas mekem wanem?
3 Sipos yu wantem kasem ol gudfala samting long asembli ya, yu mas stap long ol tri dei blong hem mo yu mas lesin gud. Sipos yu no askem spel long wok yet, i gud yu askem naoia. Yu mas slip gud long naet blong yu save lesin gud long ol tok we i kamaot. Plante man oli lesin gud taem oli lukluk stret long man we i givim tok mo oli raetem ol bigfala poen long pepa. Yumi mas mekem we mobaelfon blong yumi i no ring, olsemia, bambae yumi no spolem olgeta we oli stap traehad blong lesin. I nogud yumi toktok, sanem mesej long mobaelfon, mo kakae, taem ol tok oli stap gohed.
4. ?Ol papa mama oli save mekem wanem, blong ol pikinini blong olgeta oli kasem ol gudfala samting long asembli?
4 Evri seven yia, long Lafet blong ol Wansaed Haos, ol pris oli ridimaot Loa. Ol man Isrel oli karem “ol pikinini” blong olgeta oli kam tu, blong “oli save harem tok ya, mo blong oli save lanem” samting. (Dut. 31:12) !Long Distrik Asembli, i gud tumas blong luk ol famle oli sidaon wanples, we ol pikinini oli stap wekap mo lesin gud! Long naet, yumi save lukluk bakegen long ol gudfala save we yumi raetemdaon long dei. Yumi save tokbaot ol samting we yumi laekem moa. Baebol i talem se, oltaem pikinini i save mekem ol krangke samting we hem i no tingbaot. From samting ya, taem yumi spel long dina mo long en blong dei, i nogud yumi letem pikinini i mekem ol samting we hem nomo i wantem. Yumi mas lukaot gud long ol pikinini blong yumi, wetem ol yangfala blong yumi tu.—Prov. 22:15; 29:15.
5. Taem yumi stap long hotel no long haos blong wan famle, ?gudfala fasin blong yumi i save mekem wanem?
5 Gudfala Fasin Blong Yumi i Leftemap Trutok: Taem yumi stap long ples blong asembli, gudfala fasin blong yumi i save leftemap trutok. (Taet. 2:10) Ol man we oli wok long hotel, oli makem fasin blong yumi, we yumi no kam kros taem yumi mas wet, mo yumi toktok gud long olgeta. (Kol. 4:6) Wan bos long wan hotel i talem se: “Mifala i laekem tumas fasin blong yufala. Yufala i kaen, yufala i toktok gud long mifala, yufala i gat respek, mo yufala i no spolem ol samting long hotel.” Sipos yumi slip long haos blong wan famle blong yumi no haos blong ol brata sista, long taem ya tu, yumi mas gat gudfala fasin.
6. ?Yumi save mekem wanem blong leftemap trutok long taon we asembli i stap long hem?
6 Baj we yumi werem long taem blong asembli i talemaot asembli long ol narafala, mo i mekem se ol man long asembli oli save nem blong yumi. Be baj ya i talemaot trutok long ol man we oli no stap long asembli tu. Ol man ya bambae oli luk se olgeta we oli werem baj oli jenis gud mo oli klin. Bambae oli luk se yumi no olbaot mo yumi no folem ol stael blong wol we oli pulum ae blong ol man mo soemaot bodi. (1 Tim. 2:9, 10) Ale, yumi mas lukaot gud long stael blong klos mo hea blong yumi. Long aftenun, taem asembli i finis, maet yumi wantem go kakae long restoron no wokbaot long taon. Be yumi mas tingbaot yet se yumi stap long wan asembli, mo yumi no mas putum ol klos we oli olbaot nomo.
7. ?Wanem samting bambae i mekem se yumi harem gud moa blong joen wetem ol brata mo sista long asembli?
7 Ol man Isrel bifo oli harem gud blong joen wanples wetem ol man blong wosipim Jehova, we oli kam long ol narafala ples long kantri blong olgeta mo long wol. Hemia i givhan long olgeta blong oli gat wan tingting nomo. (Wok 2:1, 5) Yumi olsem wan famle long fulwol, mo long ol distrik asembli, olgeta man oli luksave samting ya. Oli sapraes blong luk se yumi joen gud mo harem gud olsem we yumi stap finis long wan paradaes. (Sam 133:1) Taswe, i gud yumi tekem janis long dina blong storian wetem ol brata sista we oli sidaon klosap long yumi. I moa gud yumi karem smol kakae i kam wetem yumi, i bitim we yumi aot blong go pem kakae long stoa.
8. ?From wanem i gud we yumi wok long asembli, sipos yumi naf?
8 Plante man blong wol oli sapraes we ol man oli wok gud blong mekem distrik asembli blong yumi i ron gud. Antap moa, oli sapraes we ol man blong wok oli no kasem pei. ?Olsem wanem? ?Yu yu “glad blong kam joen” wetem ol narafala blong wok? (Sam 110:3) Long plante famle, evriwan oli wok, mo long rod ya ol papa mama oli save tijim ol pikinini blong olgeta blong oli givhan long narafala. Sipos yu yu sem, i gud yu wok long asembli, nao bambae yu mitim plante narafala brata sista. Wan sista i talem se: “Mi mi no save plante brata sista long asembli. Mi save nomo ol famle blong mi wetem sam fren. Be taem mi givhan blong klinim ples, mi mitim plante brata sista. !Mi mi gat gudtaem!” Yes, taem yumi wok long asembli, yumi faenem ol niufala fren, mo samting ya i mekem se yumi glad. (2 Kor. 6:12, 13) Sipos yu no wok yet long wan asembli, yu traem askem long ol elda wanem samting yu mas mekem blong yu tu yu save wok.
9. ?Bambae yumi mekem wanem blong singaot ol man oli kam long asembli?
9 Singaot Ol Narafala Blong Oli Harem Trutok: Olsem long ol yia we oli pas finis, long yia ya tu bambae yumi mekem wan spesel wok blong singaot ol man oli kam long asembli. Bambae yumi statem wok ya tri wik bifo long asembli. Ol kongregesen oli mas traehad blong singaot olgeta man long ples blong olgeta. (Plis ridim bokis ya, “?Bambae Yumi Talem Wanem Blong Givimaot Pepa Ya?”) Sipos i gat sam pepa oli stap, yu save karem olgeta oli kam long asembli. Olgeta we oli stap long asembli bambae oli yusum ol pepa ya taem oli tekem janis blong prij long taon we asembli i stap long hem.
10. Yu traem talem stori we i soemaot se samfala we yumi givim pepa long olgeta oli kam long asembli.
10 ?Olsem wanem? Sam man we yumi singaot olgeta, ?oli kam? Yu traem tingbaot samting we i hapen long wan asembli. Man blong welkam i soemaot ples blong sidaon long wan man wetem woman blong hem. Tufala i talem long brata se oli kasem pepa ya mo i pulum tingting blong tufala. !Ale, tufala i draevem trak bitim 320 kilometa blong kam long asembli! Long wan narafala ples, wan sista we i stap prij long evri haos i givim pepa long wan man. Hem i luk se man ya i wantem save moa, ale hem i tokbaot pepa ya smoltaem. Sam dei biaen, hem i luk man ya long asembli. !Man ya i kam wetem wan fren blong hem, mo tufala i holem niufala buk we i jes kamaot long asembli!
11. ?From wanem i impoten blong kam long distrik asembli?
11 Ol lafet blong ol man Isrel bifo, oli olsem presen we Jehova i givim long olgeta. Hem i lavem olgeta mo hem i wantem we oli ‘stap tru long hem, mo tingting blong olgeta i stap strong long hem oltaem.’ (Jos. 24:14) Long sem fasin, distrik asembli blong yumi evri yia i wan impoten haf blong wosip blong yumi. Hem i givhan long yumi blong yumi ‘stap folem ol tok we i tru long laef blong yumi.’ (3 Jon 3) Ol man we oli laekem trutok, oli traehad blong kam long asembli mo kasem ol gudfala samting long hem. !Jehova bambae i blesem olgeta!
[Tok blong makem poen long pej 4]
Taem yumi stap long ples blong asembli, gudfala fasin blong yumi i save leftemap trutok
[Tok blong makem poen long pej 5]
Tri wik bifo long asembli, bambae yumi mekem wan spesel wok blong singaot ol man oli kam long asembli
[Bokis blong pija long pej 3-6]
Ol Samting Blong Tingbaot
◼ Taem Blong Program: Long ol trifala dei, program bambae i stat long 20 minit pas 8 long moning. Bambae oli openem doa blong haos asembli long 7 klok long moning. Taem jeaman i talemaot se bambae i gat miusik blong statem program, yumi evriwan i mas go sidaon. Olsemia, yumi soemaot se yumi gat respek. Long Fraede mo Sarede aftenun, program bambae i finis long 5 minit bifo 4 klok, mo long Sande aftenun, bambae i finis long 20 minit bifo 3 klok.
◼ Ol Jea: Yu save blokem jea blong olgeta nomo we oli stap long haos blong yu, olgeta we oli kam long trak blong yu, mo olgeta we yu stap stadi Baebol wetem olgeta.—1 Kor. 13:5.
◼ Kakae Long Medel Dei: Plis, i moa gud yu karem smol kakae i kam long ples blong asembli, i bitim we yu go samples blong kakae long medel dei. Yu save karem kakae long wan smol eski mo putum aninit long jea blong yu. I tabu blong karem ol bigbigfala eski mo ol glas botel oli kam long haos asembli.
◼ Presen Mane: Taem yu putum presen mane long bokis long haos asembli blong givhan long wok blong Kingdom long fulwol, yu stap talem tangkiu from asembli ya. Sipos yu wantem raetem wan jek, yu mas mekem jek ya i go long “A.S.T.J.” no “Les Témoins de Jéhovah.”
◼ Aksiden Mo Sik: Sipos i gat wan aksiden no wan man i sik, yu save talem long wan man blong welkam. Bambae hem i hareap blong singaot olgeta we oli lukaot long ol sikman. Sipos i gat nid, bambae oli singaot ambulans i kam.
◼ Meresin: Sipos yu mas dring meresin oltaem from wan sik, plis yu meksua se yu karem naf meresin i kam wetem yu, from we bambae i no gat meresin ya long asembli.
◼ Ol Kat Blong Bebi: Yu no mas karem ol kat blong bebi oli kam insaed long haos asembli. Be yu save karem jea blong bebi, sipos hem i kaen ya we yu save fasem long wan jea klosap long yu.
◼ Pepa Blong Fulumap (S-43): Taem yu tekem janis blong prij long ples blong asembli, maet yu faenem wan man we i wantem save moa. Sipos i olsem, yu mas raetem ol save long saed blong hem long pepa ya Please Follow Up (S-43). I gud we ol pablisa wanwan oli karem wan no tu pepa olsem i kam long asembli. Taem yu fulumap pepa ya finis, yu save givim long brata we i stap long Ples Blong Ol Buk long asembli. Sipos no, yu save givim long sekretari blong kongregesen, taem yu gobak long ples blong yu.—Yu save ridim Kingdom Wok Blong Yumi, Novemba 2009, pej 4.
◼ Restoron: Yu mas tingbaot se gudfala fasin blong yu long ol restoron i save leftemap nem blong Jehova.
◼ Wok Long Asembli: Brata no sista we i wantem wok long asembli i mas go luk brata we i lukaot long ol wok ya. Ol yangfala we oli no gat 16 yia yet, oli save wok wetem papa mama blong olgeta, no wetem wan narafala bigman we papa mama blong olgeta oli agri long hem.
[Bokis blong pija long pej 6]
?Bambae Yumi Talem Wanem Blong Givimaot Pepa Ya?
Yumi wantem singaot olgeta man long ples blong yumi. From samting ya, yumi no mas toktok longtaem tumas. Maet yumi talem olsem: “Halo. Mifala i stap joen long wan wok we i stap gohed long fulwol, blong givimaot pepa ya blong singaot ol man oli kam long wan spesel asembli. Hemia nao pepa blong yu.” Nao yu soem stret ples we i talem taem mo ples blong asembli mo stamba tok blong hem. Yu mas toktok wetem glad. Sipos yu givimaot pepa ya long wiken, yu soem ol magasin tu, taem yu luk se i stret blong mekem olsem.