Ol Gudfala Fasin We Oli Leftemap Nem Blong God
1. ?Wanem i mekem se plante man oli save se ol Witnes blong Jehova oli gat wan asembli?
1 Taem yumi go long ol bigfala asembli blong yumi, yumi pulum ae blong plante man. Long plante taon we yumi mekem asembli long hem, ol niuspepa mo radio oli talemaot long ol man se yumi stap mekem asembli long ples blong olgeta. Mo tu, ol man oli luksave yumi from we yumi stap werem ol baj blong asembli. Taswe, i gud yumi tingbaot bakegen sam fasin we yumi mas mekem blong leftemap nem blong God taem yumi stap long taon ya we asembli i stap long hem.—1 Pita 2:12.
2. ?Olsem wanem blong leftemap nem blong God wetem ol klos blong yumi?
2 Klos We i Stret: Taem yumi stap long ples blong asembli, i stret nomo we yumi putum ol gudfala klos. Be yumi mas putum klos we i stret tu, taem yumi wokbaot long taon blong go kakae, go long stoa, mo mekem ol narafala samting bakegen. Samting ya i save givim gudfala tingting long ol man we oli luk yumi. Nating se yumi no werem ol klos blong asembli taem yumi stap wokbaot, be yumi mas tingbaot yet se ol klos blong yumi oli mas stret, mo oli mas soemaot se yumi gat respek. Ol man we oli luk yumi oli mas luksave se yumi defren long ol man blong wol. (Rom 12:2) Mo tu, i gud yumi tingbaot blong werem baj blong asembli. Baj ya i pulum ae blong ol man mo i givim janis long yumi blong tokbaot asembli long olgeta.
3. ?Wanem i soemaot se yumi gat longfala tingting mo respek?
3 Longfala Tingting Mo Respek: Long wol tede, plante man oli tingbaot olgeta nomo mo oli no save talem tangkiu. Taswe taem yumi gat longfala tingting mo respek, yumi mekem ol narafala raonabaot long yumi oli harem gud. (2 Tim. 3:1-5) Taem yumi blokem ol jea blong yumi long ples blong asembli, no taem yumi laenap blong go karem ol niufala buk we oli kamaot long asembli, yumi no mas tingbaot yumi nomo, be yumi mas tingbaot ol narafala. (1 Kor. 10:23, 24) Wan man we i fastaem blong hem blong kam long wan asembli, i talem se: “Mi fogetem finis ol tok we mi harem long dei ya, be mi stap tingbaot yet ol gudfala fasin blong ol Witnes.”
4. ?Sipos yumi naf, from wanem i gud yumi mekem wan wok long asembli?
4 Ol Volontia We Oli Glad Blong Mekem Wok: Fasin ya we man i glad blong mekem wok, hem i wan mak blong ol tru Kristin. (Sam 110:3) ?Yu yu save putum nem blong yu blong mekem wan wok long asembli? Long wan asembli, i gat samwe long 600 brata mo sista we oli volontia blong klinim ples we bambae oli mekem asembli long hem. Ol man we oli wok long ples ya, oli sapraes long samting ya. Oli talem se: “!Mifala i neva luk wan samting olsem! Mifala i no save bilif se olgeta man ya oli wok fri nomo.” !Tru ya, yumi wantem tumas blong stap long ol bigfala asembli blong yumi long 2013! Long ol asembli ya, bambae yumi save lesin mo lanem samting, be tu, bambae yumi gat janis blong leftemap nem blong God.
[Bokis blong pija long pej 3]
Ol Samting Blong Tingbaot Long Asembli Blong 2013
◼ Taem Blong Program: Long ol trifala dei, program bambae i stat long 20 minit pas 8 long moning. Bambae oli openem doa blong haos asembli long 7 klok long moning. Taem jeaman i talemaot se bambae i gat miusik blong statem program, yumi evriwan i mas go sidaon. Olsemia, yumi soemaot se yumi gat respek. Long Fraede mo Sarede aftenun, program bambae i finis long 5 minit bifo 4 klok, mo long Sande aftenun, bambae i finis long 20 minit bifo 3 klok.
◼ Ol Jea: Yu save blokem jea blong olgeta nomo we oli stap long haos blong yu, olgeta we oli kam long trak blong yu, mo olgeta we yu stap stadi Baebol wetem olgeta.—1 Kor. 13:5.
◼ Kakae Long Medel Dei: Plis, i moa gud yu karem smol kakae i kam long ples blong asembli, i bitim we yu go samples blong kakae long medel dei. Yu save karem kakae long wan smol eski mo putum aninit long jea blong yu. I tabu blong karem ol bigbigfala eski mo ol botel glas oli kam long haos asembli.
◼ Presen Mane: Taem yu putum presen mane long bokis long haos asembli blong givhan long wok blong Kingdom long fulwol, yu stap talem tangkiu from asembli ya. Sipos yu wantem raetem wan jek, yu mas mekem jek ya i go long “A.S.T.J.” no “Les Témoins de Jéhovah du Vanuatu.”
◼ Aksiden Mo Sik: Sipos i gat wan aksiden no wan man i sik, yu save talem long wan man blong welkam. Bambae hem i singaot olgeta we oli lukaot long ol sikman. Sipos i gat nid, bambae oli singaot ambulans i kam.
◼ Meresin: Sipos yu mas dring meresin oltaem from wan sik, plis yu meksua se yu karem naf meresin i kam wetem yu, from we bambae i no gat meresin ya long asembli. Sipos yu gat sik suga mo yu yusum stik meresin, plis yu no mas sakem ol stik meresin ya long ol tin doti olbaot long asembli.
◼ Man We i No Save Harem Klia: Program blong asembli bambae i kamaot tu long FM radio. Sipos yu wantem lesin long FM radio ya, yu save karem wan mobaelfon no smol radio we i gat iafon blong hem.
◼ Pepa Blong Fulumap (S-43): Taem yu tekem janis blong prij long ples blong asembli, maet yu faenem wan man we i wantem save moa. Sipos i olsem, yu mas raetem ol save long saed blong hem long pepa ya Please Follow-Up (S-43). Taem yu fulumap pepa ya finis, yu save givim long brata we i stap long Ples Blong Ol Buk long asembli. Sipos no, yu save givim long sekretari blong kongregesen, taem yu gobak long ples blong yu.
◼ Ol Volontia: Brata no sista we i wantem wok long asembli i mas go luk brata we i lukaot long Ol Volontia. Ol yangfala we oli no gat 16 yia yet, oli save wok wetem papa mo mama blong olgeta, no wetem wan narafala bigman we papa mo mama blong olgeta i agri long hem.