Taem Yumi Prij Long Haos We i No Gat Man
1. ?Wanem traem we yumi fesem taem yumi stap prij long ol haos wanwan?
1 Long plante ples, i hadwok moa blong faenem ol man long haos blong olgeta. Long ol “las dei” ya, fulap man oli mas wok plante aoa blong kasem ol samting we oli nidim. (2 Tim. 3:1, NW ) Maet samfala oli no stap long haos from we go long stoa no oli go spel samples. ?Olsem wanem yumi save kasem ol man olsem wetem gud nius?
2. ?Olsem wanem yumi save meksua se yumi gobak luk olgeta we oli no stap long haos?
2 Meksua Se Yu Raetemdaon: Faswan samting we yumi mas mekem, hemia blong raetemdaon ol haos we i no gat man long olgeta. I impoten tumas blong raetemdaon ol haos we i no gat man long olgeta sipos yufala i prij plante taem long ol teritori blong yufala. ?Olsem wanem? ?Yu yu raetemdaon nem blong rod, namba blong teritori, nem blong yu, mo dei we yu yu prij? Yu save livim sam spes long pepa blong yu, blong raetemdaon sam moa save, taem yu no wan narafala pablisa i gobak long ol haos ya. Afta long wok blong prij, tingbaot blong givim pepa ya long brata we i holem teritori. Sipos no, maet brata ya i agri blong yu gobak bakegen long ol haos ya. I gud we yu yusum wan narafala pepa blong raetemdaon man we i intres, blong yu save gobak visitim hem.
3. ?Wanem sam advaes blong kasem olgeta we oli no stap long haos blong olgeta?
3 Traem Gobak Long Wan Narafala Taem: Ating samfala we oli no stap long haos long ol dei blong wok, oli stap long sapa no long wiken. ?Olsem wanem? ?Yu save jenisim program blong yu blong yu save gobak long wan taem we i stret long olgeta? (1 Kor. 10:24) Sipos yu no naf blong mekem olsem, yu save givim pepa blong yu long wan narafala pablisa we i naf blong go long ol haos ya long wan defren taem. Narafala rod se yu save raetem leta long olgeta ya we oli no stap long haos blong olgeta, no yu save ring long olgeta long telefon. Ating ol pablisa we oli no naf blong prij plante long ol haos wanwan from helt blong olgeta, bambae oli glad blong givhan long yu long wok ya.
4. ?Wanem stori i soem se i impoten blong gobak long ol haos we i no gat man long olgeta?
4 Hemia wan stori we i soem se i impoten blong faenem olgeta we oli no stap long haos. Blong tri yia, ol pablisa oli gobak plante taem long wan haos we i no bin gat man long hem, nao wan dei oli faenem wan woman long haos ya. Bifo we woman ya i muf i kam long haos ya, hem i bin stadi Baebol. Mo long ol trifala yia ya, hem i bin wet blong wan Witnes i kam long haos blong hem, blong hem i save gohed bakegen blong stadi.
5. ?Wetaem yumi save talem se yumi finisim wan teritori?
5 Finisim Teritori: ?Wetaem yumi save talem se yumi finisim wan teritori? Wan teritori i finis afta we yumi traehad long evri rod blong kasem olgeta we oli no stap long haos blong olgeta. Sipos yumi no faenem man long haos, maet i stret we yumi lego wan traket no wan olfala magasin long wan ples we ol man long rod oli no save luk, speseli long ol teritori we yumi no stap prij long hem oltaem. Yumi mas finisim wan teritori long fo manis. Biaen, yumi mas talemaot kwiktaem long brata we i lukaot long ol teritori, blong hem i save raetemdaon long pepa blong hem.
6. ?From wanem yumi mas traem blong talemaot gud nius long evri man long teritori blong yumi?
6 Yumi wantem se plante moa man oli gat janis blong lanem olsem wanem blong singaot long nem blong Jeova, nao Hem bambae i sevem olgeta. (Rom 10:13, 14) Hemia i minim olgeta ya tu we oli no stap long haos blong olgeta taem yumi stap prij. Olsem aposol Pol, yu mas wantem blong “talemaot gud nius ya [“givim gudfala witnes,” NW ] we God i lavem yumi tumas, mo i stap mekem i gud tumas long yumi.”—Wok 20:24.