?Kongregesen Blong Yufala i Gat Wan Bigfala Teritori?

¹ Jisas i givim wan gudfala witnes long wan bigfala teritori long Isrel bifo, i stat long ol taon long Judia i go kasem ol ples long Galili we oli farawe long ol taon. (Mak 1⁠:​38, 39; Luk 23⁠:⁠5) Yumi tu yumi mas traehad blong kasem olgeta man wetem gud nius. (Mak 13⁠:10) Be, samting ya i no isi. ?From wanem?

² Plante kongregesen long Pasifik, wetem sam ples long Vanuatu, oli gat plante teritori long bus, maet i kavremap plante handred kilometa. Ol brata mo sista long Port-Vila mo Luganville oli prij long taon, mo antap long hemia, oli gat plante teritori long bus. ?Yumi save mekem wanem blong givhan long ol man we oli stap farawe, blong oli kasem save long trutok long saed blong Jeova, Jisas, mo Kingdom blong God?

³ Mekem Gudfala Plan: Elda we i lukaot long wok blong prij wetem brata we i lukaot long teritori oli mas wok tugeta blong mekem se traehad blong olgeta long kongregesen bambae i no blong nating nomo. Ating oli save makemaot sam Sarede we bighaf blong kongregesen i save spenem ful dei long wok blong prij. Taem yufala i prij long ol teritori farawe, i gud blong spenem longfala dei long wok blong prij. Karem kakae blong dina i go wetem yufala. Maet yufala i mekem miting blong prij long eli moning, blong i gat taem blong ron i go kasem teritori ya, no maet yufala i mekem miting blong prij taem yufala i kasem ples we bambae yufala i prij long hem. I gud moa sipos yufala i no fulumap tumas man long wan trak, olsem nao, evriwan i save stap bisi long wok blong prij. Mekem plan blong go long ol ples long bus taem weta i gud mo rod i gud.

⁴ Mekem sua se yufala i karem naf buk mo magasin. Sipos yufala i no stap wok plante long teritori ya, maet i gud blong lego wan traket no wan olfala magasin i stap long ol haos we yufala i no faenem wan man long hem. Sipos yufala i gat traket ya Would You Like to Know More About the Bible? long lanwis blong ples blong yufala, yufala i save givim long evri man we yu mitim mo lego wan i stap long ol haos we yufala i no faenem wan man long hem.

⁵ Wok Gud Tugeta: Blong kavremap wan bigfala teritori, evriwan long kongregesen oli mas wok gud tugeta. Sipos yufala i mas ron longwe long trak, olgeta long trak oli save serem praes blong bensin. Mo tu, yufala i mas gat fasin luksave taem yufala i faenem ol man we oli glad blong storian. Tingbaot se yufala i wantem kasem olgeta man long teritori ya, mo tu, tingbaot olgeta we maet oli stap wet long trak. Sipos yu wantem storian moa wetem wan man we i intres gud, maet olgeta long trak oli save gohed nomo, oli no wet long yu.

⁶ Mekem wan plan blong givhan moa long ol man we oli intres. Raetem nem mo adres blong olgeta mo traem kasem wan telefon namba we yu save toktok i go long olgeta bakegen. Sipos ol rod oli no gat nem, yu save dro wan map no raetemdaon olsem wanem blong faenem bakegen ples blong man ya we i intres.

⁷ !Yumi gat wan nambawan blesing blong obei long ol tok ya blong Jisas se: “Taem yufala i go long wan taon no wan vilej, yufala i mas faenem wan gudfala man we i glad blong yufala i go stap wetem hem”! (Mat. 10⁠:11) !Jeova bambae i blesem ol traehad blong yu sipos yu glad blong yusum taem mo paoa blong yu long wok ya we i karem bigfala pei!