‘Hem i Givim Paoa Long Olgeta We Oli Taed’
1 Samtaem yumi harem se yumi taed. Maet yumi kam taed from wok no sam narafala samting long saed blong bodi, be i no hemia nomo. Yumi kam taed tu from ol trabol we yumi fesem long taem naoia we ‘laef i kam strong tumas.’ (2 Tim. 3:1) ?Olsem wanem yumi ol man blong wok blong Jeova, yumi save kasem paoa long saed blong spirit blong no kam slak long wok blong prij? Yumi save mekem samting ya taem yumi dipen fulwan long hemia we “paoa blong hem i strong we i strong,” Jeova God. (Aes. 40:26) Hem i save gud ol nid blong yumi mo hem i wantem tumas blong givhan long yumi.—1 Pita 5:7.
2 Ol Samting We Jeova i Givim Blong Halpem Yumi: Jeova i mekem yumi strong tru long tabu spirit blong hem, semfala bigfala paoa ya we hem i yusum blong mekem heven mo wol. Tabu spirit ya blong God bambae i halpem yumi, i mekem yumi “strong bakegen” taem yumi kam slak. (Aes. 40:31) I gud yumi askem yumi wan se, ‘?Wetaem mi mi bin prea from tabu spirit blong mekem mi mi strong blong finisim ol Kristin wok blong mi?’—Luk 11:11-13.
3 Sipos yumi ridim mo tingting dip long Baebol evri dei, mo yumi kakae gud long saed blong spirit taem yumi stadi yumi wan long ol buk we oli tokbaot Baebol, bambae yumi kam olsem ‘wan tri we i gru long saed blong wota we i stap ron, we i stap karem frut long stret taem blong hem, mo lif blong hem i no save drae.’—Sam 1:2, 3.
4 Jeova i yusum ol Kristin brata sista blong ‘mekem yumi harem gud,’ no blong mekem yumi strong bakegen. (Kol. 4:10, 11) Long ol Kristin miting, olgeta ya oli mekem yumi strong taem oli storian blong leftemap tingting, taem oli givim ol ansa, mo taem oli givim ol tok. (Wok 15:32) Mo ol Kristin elda nao oli halpem yumi moa long saed blong spirit, mo oli talem ol tok we i leftemap tingting.—Aes. 32:1, 2.
5 Wok Blong Prij: !Sipos yu harem long yu wan se yu taed, yu no mas stop blong prij! Wok ya i defren long ol narafala wok. Hem i save givim paoa long yumi sipos yumi joen oltaem long hem. (Mat. 11:28-30) Taem yumi talemaot gud nius blong Kingdom, samting ya bambae i givhan long yumi blong tingbaot Kingdom blong God oltaem, mo blong no fogetem hop blong laef we i no save finis wetem ol nambawan blesing blong hem.
6 I gat plante tumas wok blong mekem naoia, bifo we rabis fasin blong wol ya i lus. From ol risen ya, yumi mas holem strong long wok ya, mo dipen long “paoa we God i givim” long yumi. (1 Pita 4:11) Tru long help blong Jeova yumi save finisim wok we hem i givim from we ‘hem i givim paoa long olgeta we oli taed.’—Aes. 40:29.