!Yumi Glad Blong Yusum Laef Blong Yumi Long Wok Blong Jeova!
1 Aposol Pol i glad nomo ‘blong lusum olgeta samting, mo laef blong hem tu,’ blong finisim Kristin wok blong hem. (2 Kor. 12:15) Sem mak tede, plante Kristin oli mekem wok blong paenia. Samfala oli gat bigfala responsabiliti blong lukaot long famle be oli traehad blong prij evri wik. Samfala oli gat problem long saed blong helt blong olgeta, be oli yusum smol paoa nomo we oli gat blong mekem wok blong Kingdom i gru moa. !I nambawan tumas blong luk ol man blong Jeova oli yusum taem blong olgeta long wok blong hem, nomata hamas yia blong olgeta mo wanem problem oli kasem long laef!
2 Lav We Yumi Gat Long Ol Man Raonabaot: Tingting blong yumi i no save jajem yumi from we yumi mekem samting we yumi naf blong mekem blong soemaot se yumi lavem God mo ol man raonabaot long yumi. Pol i yusum ful paoa blong hem long wok blong talemaot gud nius, taswe hem i save talem se: “Mi mi talemaot naoia long fes blong yufala, mo yufala i save witnes long samting ya, se mi mi klin long blad blong olgeta man.” (Wok 20:24, 26, NW; 1 Tes. 2:8) Taswe sipos yumi no wantem gat fol from blad blong ol man, yumi mas joen fulwan long wok ya, go kasem mak we yumi naf blong mekem.—Esik. 3:18-21.
3 Yumi save haremgud sipos yumi wok strong blong givhan long ol narafala. (Wok 20:35) Wan brata i talem se: “Taem mi kambak long aftenun afta long wok blong prij, i tru, mi harem se mi taed. Be mi hapi tumas, mo mi tangkiu bigwan long Jeova we i givim glad ya long mi we i no gat man i save tekemaot.”
4 Lav We Yumi Gat Long God: Bigfala impoten risen from wanem yumi spenem taem blong yumi long wok blong Jeova, hemia blong mekem Papa blong yumi long heven i glad. Lav we yumi gat long God i pusum yumi blong obei long ol loa blong hem, olsem oda ya blong talemaot gud nius mo pulum man i kam disaepol. (1 Jon 5:3) Nating se ol man oli no wantem lesin no oli agensem yumi, yumi glad blong gohed nomo blong wokhad long wok blong Jeova.
5 Naoia i no moa taem blong slak, from we yumi stap laef long taem we ol kakae oli rere finis long garen. (Mat. 9:37) Oltaem, man blong wokem garen i wok strong blong hivimap ol kakae we oli rere finis long garen blong hem bifo we ol kakae ya oli sting. Sem mak tede, ol kakae blong garen long saed blong spirit oli rere finis, taswe yumi mas wok strong blong hivimap olgeta. I gud blong tingbaot se yumi stap laef long wanem taem naoia, ale, samting ya bambae i givhan long yumi blong gohed nomo blong spenem ful paoa blong yumi long wok blong Jeova.—Luk 13:24; 1 Kor. 7:29-31.