Givim Hop Long Ol Puaman
1 Jisas i bin soemaot we hem i intres bigwan long ol puaman. Hem i mekem ol merikel blong givim samting we man i nidim long saed blong bodi mo hem i mekem ol sikman oli kam gud bakegen, be stamba samting we hem i mekem hemia blong talemaot “gud nius” long ol puaman. (Mat. 11:5) Long taem blong yumi, Kristin wok ya blong prij i stap gohed blong givhan long ol puaman wetem ol narafala man tu.—Mat. 24:14; 28:19, 20.
2 Trufala Hop: Ol lida blong Krisendom oli promes se sipos ol puaman oli givim plante samting long jos bambae oli kam rij. Be Baebol i tijim se Kingdom blong God nomo bambae i finisim fasin pua mo winim olgeta problem we man i fesem. (Sam 9:18; 145:16; Aes. 65:21-23) Taem yumi givhan long ol puaman blong kasem save long wanem we Baebol i rili tijim, yumi givim hop long olgeta mo yumi halpem olgeta blong kasem samting we oli nidim blong oli save God mo wosipim hem.—Mat. 5:3.
3 Ol Farisi long taem blong Jisas oli tingting nogud long ol puaman, oli singaot olgeta wetem tok ya blong daonem olgeta se ‘am-ha·’aʹrets, no “ol man blong graon.” Be long lukluk blong Jisas, “laef blong ol man” ya i wan samting we i “gud tumas.” (Sam 72:13, 14) Yumi save folem fasin blong Jisas blong “kaengud” long ol puaman taem yumi soem intres long olgeta wanwan mo ol problem we oli fesem. (Prov. 14:31) Yumi neva mas talem ol tok blong daonem ol man we oli laef long ol pua ples mo yumi no mas holembak gud nius blong Kingdom long olgeta. Plante long ol man we oli glad blong harem mesej blong Kingdom oli ol puaman.
4 Givhan Long Olgeta Naoia: Taem yumi tijim ol puaman long ples blong yumi long saed blong ol rul long Baebol, samting ya i save givhan long olgeta blong mekem laef blong olgeta i kam moa gud naoia. Baebol i tok agensem ol fasin olsem fasin blong dring bitim mak, plei laki, fasin les, smok tabak, mo sam narafala fasin bakegen. Hemia ol fasin we oli save mekem se man i kam pua. (Prov. 6:10, 11; 23:21; 2 Kor. 7:1; Efes. 5:5) Baebol i leftemap fasin blong tok tru, fasin blong no stil, mo blong wok wetem “gladhat,” hemia ol fasin we ol bos oli wantem se ol man blong wok oli gat. (Kol. 3:22, 23; Hib. 13:18, NW) Wan ripot i soemaot se bighaf blong ol bos oli ting se fasin we man i tok tru, i no stil, mo i stap tru, i moa impoten bitim ol narafala fasin we oli laekem blong luk long man we bambae oli givim wok long hem.
5 Jeova i luksave we ol puaman oli safa. I no longtaem bambae Jisas Kraes i sevem “ol puaman we oli stap singaot long hem.” (Sam 72:12) Be bifo taem ya we Jisas i tekem aksen, yumi gat spesel janis ya blong givhan long ol narafala, hemia ol puaman tu, blong oli save haremgud long mesej blong hop we Baebol i givim.