Wan Taem Blong Yumi Lefleftemap Tingting Blong Yumi
1. ?Ol visit blong seket elda oli givim spesel janis long yumi blong mekem wanem?
1 Aposol Pol i raet i go long kongregesen long Rom, hem i se: ‘Mi mi wantem tumas blong kam luk yufala, blong bambae God i yusum mi blong givhan long yufala blong yufala i kasem paoa ya we tabu spirit i stap givim, blong mekem yufala i strong. Mo bakegen, mi wantem kam joen long yufala, blong bambae bilif blong yufala i save givhan long mi, olsem we bilif blong mi tu i save givhan long yufala.’ (Rom 1:11, 12) Long taem blong yumi, ol visit blong ol seket elda oli givim janis tu blong yumi lefleftemap tingting blong yumi.
2. ?From wanem ol brata oli talemaot wik blong visit blong seket elda longtaem bifo?
2 Kongregesen: Klosap oltaem, tri manis bifo we seket elda i visitim kongregesen, ol brata oli talemaot wik we bambae hem i kam. Samting ya i givim taem long yumi blong jenisim program blong yumi, blong yumi joen fulwan long visit blong seket elda. (Efes. 5:15, 16) Sipos yu wok, maet yu save askem sam dei blong spel, blong yu save joen long wok blong prij long wik. Sam brata sista oli plan blong mekem wok blong haftaem paenia long manis we seket elda i visitim kongregesen. ?Sipos yu yu bin plan finis blong go samples, yu save jenisim plan blong yu blong mekem se yu stap long wik we seket elda i kam?
3. ?Long taem blong visit blong seket elda, yumi wanwan i save mekem wanem blong hem i leftemap tingting blong yumi?
3 Wan bigfala risen from wanem seket elda i kam, hem i blong leftemap tingting blong ol brata sista wanwan mo trenem olgeta long wok blong prij. ?Olsem wanem? ?Yu save putum nem blong yu blong prij wetem hem, no wetem waef blong hem sipos hem i mared? Seket elda i laekem blong prij wetem ol defdefren pablisa, i minim tu olgeta we oli stat blong prij i no longtaem mo olgeta we oli wantem gat gudhan long wok blong prij. Yumi evriwan i save lan from fasin blong hem blong prij. Mo sipos hem i givim sam advaes blong halpem yumi, i gud yumi folem. (1 Kor. 4:16, 17) Taem yu singaot hem blong kam kakae wetem yu, hemia wan narafala janis blong haremgud blong kampani tugeta. (Hib. 13:2) Lesingud long ol tok blong hem from we hem i rerem ol tok ya folem nid blong kongregesen blong yu.
4. ?Olsem wanem yumi save leftemap tingting blong seket elda blong yumi?
4 Seket Elda: Aposol Pol i sem mak long ol brata sista we hem i visitim olgeta, hem tu i gat ol traem mo ol wari mo hem i haremgud tumas taem narafala i leftemap tingting blong hem. (2 Kor. 11:26-28) Taem ol brata sista long kongregesen blong Rom oli kasem nius se Pol, we hem i kalabus long taem ya, bambae i kam long ples blong olgeta, oli wokbaot i go blong mitim hem long haos maket blong Apias. !Hemia wan wokbaot blong 74 kilometa! “Taem Pol i luk olgeta, hem i talem tangkiu long God from, mo tingting blong hem i kam strong moa.” (Wok 28:15) Yu tu yu save leftemap tingting blong seket elda blong yu. Yu save “ona gud” long hem taem yu soem se yu glad blong sapotem fulwan visit blong hem. (1 Tim. 5:17) Long toktok mo fasin blong yu, soemaot we yu rili gat tangkiu from traehad we seket elda i mekem blong givhan long yu. Hem mo waef blong hem bambae tufala i glad tumas blong luk bilif mo lav blong yu mo fasin blong yu blong stanap strong longtaem.—2 Tes. 1:3, 4.
5. ?Long taem blong yumi, from wanem yumi evriwan i nidim narafala blong leftemap tingting blong yumi?
5 Long taem ya we ‘laef long wol i kam strong tumas,’ yumi evriwan i nidim narafala blong leftemap tingting blong yumi. (2 Tim. 3:1) Tekem desisen naoia blong joen fulwan long spesel program long wik we seket elda i kam. Yumi evriwan—ol seket elda mo ol pablisa—i save wok blong lefleftemap tingting blong yumi mo haremgud from. Sipos yumi mekem olsem, oltaem bambae yumi ‘toktok gud long yumi blong mekem tingting blong yumi i strong, mo blong givgivhan long yumi.’—1 Tes. 5:11.