Traehad Blong Kasem Mak Ya Blong Mekem Baebol Stadi
1 “Yufala i traem lukluk long ol kakae long garen. Naoia lif blong olgeta i drae finis, i taem blong go tekem kakae nao.” (Jon 4:35) Ol tok ya we Jisas Kraes i talem, oli stret long ol Kristin we oli stap mekem wok blong prij tede.
2 I gat plante man yet we oli laekem trutok mo we oli wantem tumas blong kasem save long ol rod blong Jeova. Yumi luksave samting ya long namba blong ol niufala disaepol we oli baptaes evri yia. ?Sipos yu rili wantem gat wan Baebol stadi, maet yu save mekem wanem?
3 Putum Mak: Fastaem, yumi mas putum mak ya blong statem Baebol stadi wetem wan man mo gohed long stadi ya. Yumi no mas fogetem mak blong yumi taem yumi prij. Kristin wok blong yumi i blong prij be blong tijim ol man tu, taswe yumi evriwan i mas traem faenem rod blong mekem Baebol stadi wetem ol man.—Mat. 24:14; 28:19, 20.
4 Ol Narafala Poen Blong Tingbaot: Ol man blong talemaot Kingdom oli mas prea wetem fulhat blong olgeta. Samtaem yumi faenem sam man we oli bin prea from we oli wantem kasem save long God. !I wan blesing taem Jeova i yusum yumi blong faenem mo tijim ol man olsem!—Hag. 2:7; Wok 10:1, 2.
5 Wan sista i prea blong gat wan Baebol stadi, nao hem i putum traket ya ?Yu Yu Wantem Save Moa Long Saed Blong Baebol? long wan klia ples long wok blong hem blong ol man oli save luk. Wan woman i tekem traket ya mo i ridim, nao hem i stap fulumap lashaf blong traket ya blong askem wan fri Baebol stadi, ale sista ya i storian wetem woman ya mo i gat janis ya blong statem stadi wetem hem.
6 Sipos yumi kampani oltaem wetem ol pablisa we oli gat gudhan blong statem Baebol stadi, samting ya bambae i givhan long yumi blong kasem mak ya blong gat wan Baebol stadi. Yumi mas prea long God wetem fulhat blong yumi blong hem i givim wan Baebol stadi long yumi, mo yumi mas wok strong blong kasem mak ya. Maet i no longtaem bambae yu glad blong gat wan Baebol stadi.