?Olsem Wanem Blong Givhan Long Olgeta We Oli Kam Long Memoriol?
1. ?Wanem bigfala witnes we plante man bambae oli kasem long Maj 22, 2008?
1 Long Maj 22, 2008, plante milan man long olgeta ples blong wol bambae oli luk wan samting we i givim bigfala witnes long olgeta. Olgeta we oli kam long Memoriol, bambae oli harem tok long saed blong bigfala lav we Jeova i gat taem hem i givim wan ransom blong olgeta man long wol. (Jon 3:16) Bambae oli lanem long saed blong Kingdom, mo olsem wanem Jeova bambae i yusum Kingdom ya blong mekem samting we hem i wantem i kamtru long wol. (Mat 6:9, 10) Bambae olgeta wanwan oli luksave lav mo fasin joengud we ol man blong God oli gat, mo haremsave gudfala fasin blong mekem welkam long man.—Sam 133:1.
2. ?Wanem samting yumi save mekem blong halpem ol Baebol studen we oli kam long Memoriol?
2 Ol Baebol Studen: Sam long olgeta we bambae oli kam, oli ol studen we yumi jes stat blong stadi Baebol wetem olgeta. Yumi save tekem olgeta blong mitim ol brata sista. Tokbaot ol miting we yumi gat evri wik, mo tekem olgeta oli go blong lukluk raon long Haos Kingdom. Long taem we brata i mekem tok, bambae hem i leftemap tingting blong ol studen ya blong oli gohed blong fren moa wetem Jeova. Biaen, yu save yusum ol tok blong hem blong leftemap tingting blong olgeta blong gohed gud.
3. ?Olsem wanem yumi save leftemap tingting blong ol pablisa we oli no moa prij we oli kam long Memoriol?
3 Ol Pablisa We Oli No Moa Prij: Sam long olgeta we bambae oli kam, hemia olgeta we oli no moa prij. Yu no mas wet, yu mas go sekhan long olgeta mo welkamem olgeta. Yu no mas askem kwestin long saed blong laef blong olgeta, no talem wan samting we i save mekem olgeta oli sem. Afta long Memoriol, ol elda oli mas visitim kwiktaem olgeta we oli no moa prij we oli bin kam long Memoriol, oli mas leftemap tingting blong olgeta from traehad blong olgeta blong kam, mo wetem kaen fasin, oli mas askem olgeta blong kam long nekiswan miting blong kongregesen.
4. ?Wanwan long yumi i save mekem wanem blong halpem olgeta we oli no Witnes blong Jeova?
4 Olgeta We Oli No Witnes Blong Jeova: Sam long ol man ya we yumi singaot olgeta oli kam, maet oli ol fren no ol memba blong famle. Sam narafala oli kam from we yumi bin givim pepa blong singaot olgeta long taem blong spesel kampen. Sipos yumi no luksave sam man, yumi mas kwik blong go sekhan long olgeta. Talem nem blong yumi mo talem se yumi glad blong luk olgeta. Maet oli no bin kam long wan miting bifo. Taem yumi storian wetem olgeta, ating yumi save faenemaot ples we oli stap long hem. Sam dei afta long Memoriol, yumi save go luk olgeta no toktok i go long olgeta long telefon, blong traem pulum olgeta blong kasem moa save, mo blong askem olgeta sipos oli glad blong stadi Baebol.
5. ?Maet yumi save talem wanem blong statem wan Baebol stadi?
5 Taem yumi go blong mekem visit, yumi save yusum ol save long tok blong Memoriol blong statem wan storian long buk ya Baebol Tijim. Eksampol: Long Memoriol, brata we i mekem tok bambae i ridim Aesea 65:21-23. Taem yu go long wan visit, yu save tokbaot tok ya we i bin kamaot, mo yu save talem olsem: “Mi glad blong soem long yu sam narafala blesing we bambae oli kamaot from ransom.” Nao openem buk ya Baebol Tijim i go long pej 4 mo 5, mo tokbaot ol save long tufala pej ya. Narafala rod we yu save yusum, hemia: “Plante man oli stap tingting se wetaem profet tok blong Aesea bambae i kamtru.” Nao tokbaot japta 9, long paragraf 1-3. Narafala rod i blong storian long ol samting we brata i tokbaot long Memoriol, ale nao yu save go stret long buk ya Baebol Tijim mo soem olsem wanem blong mekem stadi.
6. ?Wanem janis we yumi gat taem yumi obei long oda blong Jisas blong tingbaot ded blong hem?
6 Yumi evriwan i mas lukaot janis blong givhan long ol Baebol studen, olgeta we oli no moa prij, mo olgeta we oli no Witnes yet, we bambae oli kam long Memoriol. (Luk 22:19) Bambae Jeova i blesem yumi taem yumi mekem moa long wok blong Kingdom.