Wan Taem Blong Givim Nambawan Witnes Long Ol Man
1. ?Tok blong Memoriol wetem wanem narafala samting bakegen i save gat paoa long ol man we oli kam long Memoriol? Eksplenem.
1 ?Hemia wetaem? Hemia long naet blong Memoriol. Yumi stap traehad bigwan blong singaot ol man oli kam joen wetem yumi long taem ya. Ol tok we ol man oli harem long taem ya i save gat bigfala paoa long olgeta, be i no hemia nomo. Wan woman we i go long Memoriol i tokbaot samting we hem i luk long taem ya. Hem i luk we evriwan oli joen gud mo oli kaen, mo hem i luk Haos Kingdom we ol volontia oli wokem mo oli lukaot gud long hem. Haos Kingdom i naes mo i klin. Taswe, i no brata ya nomo we i givim tok, we i givim witnes long taem ya. Yumi evriwan i mas wok wanples blong givim wan bigfala witnes long taem ya we i impoten moa long ol narafala taem blong yia.—Efes. 4:16.
2. ?Yumi wanwan i save mekem wanem blong givim witnes long ol man we oli kam long Memoriol?
2 I Gud Yumi Talem Halo Long Ol Man Mo Yumi Kaen Long Olgeta: Taem yumi smael long ol man we oli kam long Memoriol mo yumi talem halo long olgeta long fasin we i soemaot se yumi glad blong luk olgeta, samting ya i save givim witnes long olgeta. (Jon 13:35) Nating sipos yu no save toktok long olgeta man we oli stap, yu save soemaot se yu kaen taem yu talem halo long olgeta we oli sidaon klosap long yu, mo yu talem nem blong yu long olgeta. (Hib. 13:1, 2) I gud yu traem luksave man we i no save narafala long miting ya. Ating hem i kasem wan pepa taem yumi mekem spesel wok ya blong singaot ol man oli kam long Memoriol. Yu save askem long hem se, ‘?Hemia fas taem blong yu blong kam long ples ya?’ Yu save askem long hem sipos hem i wantem sidaon wetem yu, mo yu save talem long hem se sipos hem i gat sam kwestin bambae yu glad blong ansa long olgeta. Sipos kongregesen blong yu i mas aot kwiktaem afta long Memoriol blong wan narafala kongregesen i mekem Memoriol, yu save talem long hem se: “Mi wantem tumas blong save tingting blong yu long tok we yumi harem. ?I gat rod blong yumitu save storian bakegen long wan narafala taem?”
3. ?Yumi save mekem wanem blong welkamem ol pablisa we oli no moa prij?
3 Welkamem Ol Pablisa We Oli No Moa Prij: Ol pablisa we oli no moa prij bambae oli stap tu long Memoriol. Maet sam long olgeta oli joen wetem kongregesen wan taem nomo evri yia, hemia long Memoriol. I gud yu welkamem olgeta, mo yu talem long olgeta se yu glad tumas blong luk olgeta. (Rom 15:7) Smoltaem afta long Memoriol, i gud sipos ol elda oli go visitim ol pablisa ya we oli no moa prij, mo oli talem ol gudfala toktok long olgeta blong pulum olgeta blong joen wetem kongregesen oltaem. Yumi stap prea se, ol tok we ol man oli harem wetem ‘ol gudfala wok blong yufala we ol man oli luk,’ bambae i mekem se plante long olgeta oli wantem leftemap nem blong God.—1 Pita 2:12.