Yumi Brekemdaon Ol Giaman Toktok We Oli Olsem Ol Strong Ples Blong Haed
1 Longtaem finis i kam, Setan i yusum ol giaman tijing mo sam narafala samting blong trikim plante man mo blong satem tingting mo hat blong olgeta. Hem i pulum plante man blong bilif long ol tijing olsem, Triniti, Sol we i no save ded samtaem, mo helfaea. Hem i leftemap tingting ya se God i no stap mo i pulum ol man blong oli no bilif se Baebol i kamaot long God. Samting we Setan i yusum blong satem tingting blong ol man blong oli no luksave trutok, hemia flas tingting from kala blong skin mo kantri. (2 Kor. 4:4) ?Olsem wanem yumi save brekemdaon ol bilif we oli olsem ol strong ples blong haed blong Setan?—2 Kor. 10:4, 5.
2 Filing We Man i Gat Long Bilif Blong Hem: Plante taem bilif we ol man oli holem plante yia finis i gat bigfala paoa long filing blong olgeta. Samfala oli holem ol giaman bilif stat taem oli smol i kam. Blong halpem ol man olsem, yumi mas toktok long fasin we i soem respek long tingting blong olgeta.—1 Pita 3:15, 16a.
3 Yumi save soem respek long ol man olsem, taem yumi givim janis long olgeta blong eksplenem bilif blong olgeta mo from wanem oli bilif olsem. (Jem. 1:19) Maet oli bilif strong long tijing blong sol we i no save ded samtaem, from we oli lusum wan famle long ded mo oli wantem tumas blong luk hem bakegen. No maet oli joen long ol lafet blong wol from we ol lafet ya oli givim janis long olgeta blong spenem moa taem wetem famle blong olgeta. Taem yumi lesin long olgeta, samting i save givhan long yumi blong kasem save long filing blong olgeta mo i save halpem yumi blong ansa long wan fasin we i save karem gudfala frut.—Prov. 16:23.
4 Folem Eksampol Blong Jisas: Jisas i givim wan gudfala eksampol long yumi taem hem i ansa long kwestin blong wan man we i savegud loa. Sipos Jisas i talem stret long man ya samting we hem i mas mekem maet man ya i no wantem lesin long toktok blong Jisas, from we man ya i tinghae long bilif blong hem. Taswe Jisas i no mekem olsem. Hem i yusum ol vas blong Baebol, i pulum man ya blong talemaot tingting blong hem, mo i talem wan pijatok blong halpem man ya blong tingting gud long poen we hem i tokbaot.—Luk 10:25-37.
5 Baebol i gat paoa blong mekem se ol man oli lego ol giaman bilif blong olgeta. (Hib. 4:12) Taem yumi mekem tingting blong yumi i longfala, samting ya i save mekem man i sakemaot ol giaman tijing we oli stap long hat blong olgeta mo oli folem trutok we i save mekem olgeta oli fri.—Jon 8:32.