!I Impoten Tumas Blong Mekem Famle Baebol Stadi Mo Stadi Yu Wan!
1. ?Hed Kampani i stap traehad blong mekem wanem tede, mo from wanem?
1 Tede, Hed Kampani i stap traehad long evri rod blong lukaotgud long ol man blong Jeova. Hemia i sem fasin we Hed Kampani long faswan handred yia i gat. (Wok 15:6, 28) Yumi luksave klia se taem blong bigfala trabol i klosap tumas, taswe i impoten we olgeta pablisa blong Kingdom oli gat wan fasin fren wetem Jeova we i no save seksek. Bifo, yumi bin makemaot taem evri wik blong mekem Buk Stadi blong kongregesen. ?Naoia, bambae yu yusum taem ya olsem wanem? I gud we yumi evriwan i yusum taem ya blong mekem famle wosip. Sipos yu waes, bambae yu yusum taem ya blong stadi dip long Tok blong God, blong kasem plante moa tijing blong Baebol we i olsem wota blong laef.—Sam 1:1-3; Rom 11:33, 34.
2. ?Yu save mekem wanem plan blong gat wan naet blong famle wosip?
2 Naet Blong Famle Wosip: Hed blong ol wanwan famle i gat wan wok blong mekem long fes blong Jeova, hemia blong meksua se famle i folem wan program blong Baebol stadi evri wik, mo blong mekem se stadi ya i givhan gud long famle. (Dut. 6:6, 7) Ol brata sista we oli no mared mo oli no gat pikinini, oli save yusum taem ya blong lukaot moa save, mo blong mekem prapa Baebol stadi blong olgeta. I impoten we yumi evriwan i ‘pemaot taem’ (NW) blong stadi mo tingting dip, from we long rod ya, bambae yumi frengud wetem Jeova oltaem, mo bambae yumi naf blong stanap strong tru long taem ya we “ol fasin nogud oli gat paoa.”—Efes. 5:15, 16.
3, 4. ?Wanem save we yumi save stadi long hem? ?Yumi mas gat wanem tingting long saed blong ol samting we yumi lanem?
3 ?Yumi Save Stadi Long Wanem?: Watch Tower Publications Index mo Watchtower Library long CD-ROM i save givhan long yu blong faenem plante save we bambae yu harem gud tumas blong stadi long hem. Ol famle oli save stadi long sam haf blong Wajtaoa, maet long ol haf we oli kamaot long evri Wajtaoa, olsem “Keys to Family Happiness,” (“Ol Stamba Rod Blong Mekem Famle i Glad”), “Teach Your Children” (“Tijim Ol Pikinini Blong Yu”), mo “For Our Young People” (“Samting Blong Ol Yangfala Blong Yumi”). Mo tu, ol famle oli save stadi long sam haf blong Wekap! olsem haf ya “Ol Yangfala Oli Askem,” mo sam narafala haf we oli tokbaot ol nambawan samting we God i wokem raonabaot long yumi.
4 Sipos famle i tekem taem blong ridim Baebol tugeta mo blong tokbaot ol samting we oli ridim, ol save ya bambae oli kasemgud tingting mo hat blong olgeta, mo bambae oli lidim olgeta long ol fasin mo desisen blong olgeta. (Hib. 4:12) Sam samtaem, maet famle i lukluk wan DVD we ogenaesesen blong Jeova i wokem, mo biaen oli save tokbaot ol samting we oli lukluk. I gat plante defdefren save blong stadi long hem, mo plante defren rod blong mekem save ya i pulumgud tingting blong evriwan long famle. I gud yu askem long olgeta long famle wanem samting we oli laekem blong stadi long hem.
5. ?From wanem stadi wanwan mo famle Baebol stadi i impoten tumas naoia?
5 ?From Wanem Samting Ya i Impoten Naoia?: Sipos yumi wok strong blong fren moa wetem Jeova naoia, bambae yumi reregud blong ‘stanap strong mo luk ol samting we Jeova bambae i mekem blong sevem yumi.’ (Eks. 14:13) Ol papa mama oli nidim advaes blong halpem olgeta blong tijimgud ol pikinini blong olgeta, we oli laef “long medel blong ol man we oli kruked mo krangke nomo.” (Fil. 2:15, NW) Yumi mas givhan long ol pikinini blong yumi blong stanap strong agensem ol rabis fasin we naoia oli kam plante long skul. (Prov. 22:3, 6) Ol mared man mo woman, oli mas mekem se “rop ya we oli tantanem tri rop i go wanples” i stap strong, i min se tufala i mas wok had oltaem blong fren moa wetem Jeova. (Pri. 4:12) Yes, yumi mas yusum taem we i stap yet long waes fasin, hemia blong wok strong blong ‘mekem bilif blong yumi i kam strong moa.’—Jud 20.