Ansa Long Wan Kwestin

◼ ?I stret we kongregesen no ol man wanwan oli yusum wan pija, saen, no sot nem blong wan kampani we ol Witnes blong Jeova oli yusum folem loa?

Sam kampani oli yusum wan pija, saen, no wan sot nem blong mekem i isi long ol man blong luksave nem blong kampani ya kwiktaem. Olsem pija blong Watch Tower we i minim Watch Tower Bible and Tract Society of Pennsylvania mo sam narafala kampani we ol Witnes blong Jeova oli yusum folem loa. Long ol leta blong ol asosiesen we oli stap aninit long branj ofis, i gat smol pija blong wan Baebol we i open, i stap antap long ol leta ya. Sam narafala kampani we ol Witnes blong Jeova oli yusum folem loa oli gat ol smosmol pija, saen, no sot nem blong soemaot olgeta.

Ol kongregesen mo ol man wanwan oli no mas yusum ol pija, saen, mo sot nem ya, no samting we i klosap sem mak, long Haos Kingdom blong olgeta, long ol saen blong Haos Kingdom, long ol leta blong olgeta, long ol prapa samting blong olgeta, mo long ol narafala samting olsem. Sipos oli yusum, oli save mekem se ol haeman blong wol, ol pablisa, mo ol narafala man, oli konfius se kongregesen i joen olsem wanem wetem ol kampani ya we ogenaesesen i yusum folem loa. Sem mak long ol leta, maet oli ting se ol leta ya oli kam long wol hedkwota no long branj ofis.

Long ol Haos Kingdom we yumi bildim naoia, bambae yumi no moa yusum pija no saen blong Watch Tower no samting we i klosap sem mak, nating se Haos Kingdom ya i blong wan kampani blong Watch Tower. Ol kongregesen we oli gat wan pija no saen finis long Haos Kingdom blong olgeta, oli no nid blong jenisim naoia from we maet i wan bigfala wok blong jenisim, we bambae i tekem plante taem, hadwok, mo mane. Be sipos i no hadwok tumas blong jenisim mo i no nidim bigfala mane, i gud we kongregesen i tingbaot blong jenisim. Sipos no, oli save jenisim long taem we oli makemaot finis blong mekem Haos Kingdom mo saen blong hem i kam niuwan bakegen.