?Wanem Ya Watch Tower Bible and Tract Society?
Watch Tower Bible and Tract Society of Pennsylvania i wan asosiesen we i stanap long 1884 folem loa blong Pennsylvania, Amerika. Hem i no wan bisnes blong winim mane. Ol Witnes blong Jehova oli yusum asosiesen ya blong givhan long wok we oli mekem long fulwol, olsem wokem ol Baebol mo ol buk we oli eksplenem Baebol.
Asosiesen ya i talem se wok blong hem i long saed blong “skul, tijim ol man, mo givim ol samting olsem kakae mo klos long man we i kasem trabol.” Be bigfala wok i blong “prij mo tijim man long gud nius blong Kingdom blong God we Jisas Kraes i King blong hem.” Man i save joen long asosiesen ya nomo taem oli invaetem hem, mo samting ya i no dipen long hamas presen mane we hem i givim. Ol memba mo ol daerekta blong asosiesen ya oli givhan long Hed Kampani blong ol Witnes blong Jehova.
Ol Narafala Asosiesen We Oli Stanap Folem Loa
Antap long Watch Tower Bible and Tract Society of Pennsylvania, ol Witnes blong Jehova oli stanemap plante narafala asosiesen long ol defdefren kantri. Long nem blong olgeta, sam oli gat ol tok olsem “Watch Tower,” “Watchtower,” no maet tok ya i stap long narafala lanwis.
Ol defdefren asosiesen ya oli givhan long mifala blong mekem plante bigfala wok olsem:
Wokem ol buk. Mifala i wokem finis samwe long 253 milian Baebol. Mo ol buk blong mifala oli kamaot long bitim 1,050 lanwis. Long websaet ya jw.org ol man oli save ridim Baebol fri long Intenet long bitim 300 lanwis, mo oli save faenem ansa we Baebol i givim long ol kwestin olsem, “?Wanem ya Kingdom blong God?”
Ol Baebol Skul. Mifala i mekem plante defren skul blong tijim ol man long Baebol. Wan long olgeta i stat long 1943, hemia Wajtaoa Baebol Skul Blong Gilead. Kam kasem naoia, skul ya i trenem bitim 10,000 Witnes blong Jehova blong oli mekem wok blong misinari mo oli givhan long wok blong prij blong i gohed strong moa long fulwol. Mo evri wik, plante milian man we sam long olgeta oli no Witnes, oli kasem tijing long ol miting long ol kongregesen. Mo tu, i gat ol klas blong tijim ol man blong oli save rid mo raet, mo mifala i wokem wan buk long 136 lanwis blong tijim ol man olsem.
Givim Ol Samting Olsem Kakae Mo Klos Long Ol Man We Oli Kasem Trabol. Mifala i givim ol samting olsem kakae mo klos long ol man we oli harem nogud from sam bigfala trabol we i kasem olgeta. Maet hem i trabol we ol man nomo oli mekem, olsem long Ruwanda long 1994, taem oli traem kilimaot wan ful laen blong man, no maet hem i trabol we disasta i mekem, olsem taem graon i seksek bigwan long Haiti long 2010.
Nating se ol asosiesen ya oli givhan long mifala blong mekem plante bigfala wok, be wok blong mifala i no dipen long olgeta. God i givim wan wok long olgeta Kristin wanwan, hemia blong talemaot gud nius mo tijim ol man. (Matiu 24:14; 28:19, 20) Mifala i bilif se God i stap sapotem wok blong mifala, mo bambae hem i gohed blong ‘mekem i gru.’—1 Korin 3:6, 7.