Yumi Witnes blong Jeova Oltaem
1. ?Yumi save lanem wanem long stori blong Jisas taem hem i prij long woman ya long wel?
1 Jisas i wokbaot plante aoa finis. Hem i taed mo i tosta. Ol disaepol blong hem oli go blong pem kakae, ale hem i sidaon blong spel long wan wel we i stap afsaed long taon blong Sameria. Jisas i no go long Sameria blong prij, be hem i pastru nomo long ples ya blong go long Galili, blong i gohed blong prij longwe. Nating se i olsem, hem i tekem janis blong prij long wan woman we i go blong kasem wota. (Jon 4:5-14) ?From wanem Jisas i mekem olsem? From we oltaem hem i “tru witnes ya we i no save tanem tok blong hem.” (Rev. 3:14, NW) Yumi tu, yumi folem fasin blong Jisas taem yumi Witnes blong Jeova oltaem.—1 Pita 2:21.
2. ?Olsem wanem yumi save rere blong tekem janis blong prij?
2 Rere: Yumi save rere blong tekem janis blong prij sipos yumi gat sam buk mo magasin wetem yumi. Plante pablisa oli holem ol traket oltaem wetem olgeta, mo oli givim long ol man we oli wok long ol stoa, long ples blong bensin, mo long ol narafala ples we oli mitim ol man. (Pri. 11:6) Wan sista we i stap wokbaot plante long ol narafala ples, i meksua se hem i gat wan smol Baebol mo buk ya Baebol Tijim, long hanbag blong hem oltaem, mo hem i traem blong statem wan storian wetem ol man we oli sidaon klosap long hem.
3. ?Olsem wanem yumi save statem wan storian?
3 Statem Wan Storian: Taem yumi tekem janis blong prij, i no nid blong ridim wan vas blong Baebol long stat blong storian. Taem Jisas i tekem janis blong prij long woman ya long wel, hem i no statem storian blong hem se hem nao i Mesaea, nogat. Jisas i askem wota nomo long woman ya, mo samting ya i pulum tingting blong hem. (Jon 4:7-9) Wan sista i faenem se fasin ya i givhan long hem blong statem wan storian taem samfala oli askem sipos hem i harem gud long wan lafet, maet lafet blong Krismas no Niu Yia. Sista ya i no ansa se hem i no joen long lafet ya from we hem i wan Witnes blong Jeova. Be hem i ansa se: “Mi mi jusum blong no mekem lafet ya.” Plante taem ansa ya i pulum man blong askem from wanem, ale sista ya i gat rod blong givim witnes.
4. ?From wanem vas blong Matiu 28:18-20 i gat paoa long yu?
4 Jisas i wok strong blong prij long ol man long wol ya mo i finisim gud wok ya blong hem. Be hem i intres bigwan yet long wok blong prij we i stap gohed tede long sem fasin we hem i mekem bifo. (Mat. 28:18-20) Taswe, olsem Jisas we i Nambawan Eksampol blong yumi, yumi tu yumi ol Witnes we yumi rere eni taem blong talemaot bilif blong yumi long fored blong ol man.—Hib. 10:23.