Ansa Long Wan Kwestin
◼ ?I stret we ol Witnes blong Jeova oli pasem ol tok we man i rikodem no raetemdaon, i go long ol narafala?
Ol tok we oli stanap long Baebol oli leftemap tingting blong yumi mo oli mekem yumi strong. (Wok 15:32) Taswe, i stret nomo we yumi wantem serem ol gudfala save ya long olgeta we oli no bin kam long miting. Tede, i gat plante niufala masin blong rikodem ol toktok mo miusik, mekem se i isi nomo blong man i rikodem wan tok long miting mo pasem i go long narafala. Samfala oli gat plante kaset no CD blong ol tok we oli rikodem, mo sam long ol tok ya oli rikodem plante yia finis. Oli letem ol fren blong olgeta oli lesin long ol kaset no CD ya, sipos no, oli rikodem ol tok ya long wan narafala kaset no CD, mo oli givim i go long ol fren ya. Oli mekem olsem from we oli ting se ol tok ya oli save givhan long ol fren blong olgeta. Sam narafala, oli go long Intenet mo oli wokem wan Web saet, ale oli putum tok blong ol brata long Web saet ya. Sipos wan man i wantem harem ol tok ya, hem i save rikodem olgeta tru long Intenet.
Long saed blong ol tok we yumi harem long ol miting, i stret nomo we yumi rikodem olgeta sipos yumi wan yumi wantem lesin long olgeta, no sipos yumi wantem lesin wetem famle blong yumi. Mo tu, ol elda oli save mekem plan blong ol brata oli rikodem ol tok, blong sam memba blong kongregesen we oli no save kam long ol miting, from we oli handikap no oli sik. Be i moa gud we yumi no pasem ol tok we yumi rikodem no we yumi raetemdaon, oli goraon long ol narafala.
Plante taem ol brata oli mekem tok blong olgeta i laenap wetem nid blong kongregesen blong olgeta. Taswe, taem yumi lesin long wan tok we narafala i rikodem, yumi no save from wanem brata ya i mekem tok ya, ale i isi nomo blong yumi kasem rong mining blong tok blong hem. Mo tu, bambae i had long yumi blong jekem se hu nao i givim tok ya, mo wetaem hem i givim. Long taem olsem, yumi no save trastem se save we brata ya i givim i laswan save we i kamaot, mo se i stret no nogat. (Luk 1:1-4) Mo tu, fasin ya blong pasem ol tok we man i rikodem no i raetemdaon i goraon long ol narafala, i save pulum samfala blong leftemap mo givim ona we i no stret long brata we i givim tok ya. Mo brata ya i save kam flas from.—1 Kor. 3:5-7.
Slef ya we i stret mo waes i wokhad blong givim save ‘we i naf long yumi,’ olsem kakae “long stret taem blong hem.” (Luk 12:42, NW) Hemia i min se, hem i mekem rod blong ol elda oli givim ol tok long ol kongregesen blong ol Witnes blong Jeova. Mo hem i mekem rod blong ol man oli save rikodem sam samting tru long Web saet ya jw.org. Yumi save trastem se slef ya we i stret mo waes wetem Hed Kampani blong hem, bambae oli givim olgeta samting we yumi nidim blong mekem bilif blong yumi i kam strong.—Wok 16:4, 5.