?Olsem Wanem Blong Yusum Ol Rikoding?
1. Antap long ol buk, ?wanem narafala samting we i save givhan long yumi?
1 Plante man oli glad blong ridim ol tok long Websaet blong yumi, we i stret mo i givhan long olgeta. (Pri. 12:10) ?Olsem wanem? ?Yu yu stap yusum ol rikoding long Websaet blong yumi? Hemia wan isi rod blong lesin long ol save long Websaet ya. ?Ol rikoding ya oli givhan long yumi olsem wanem?
2. ?Olsem wanem blong yusum ol rikoding long stadi blong yumi wanwan mo famle wosip?
2 Stadi Blong Yumi Wanwan Mo Famle Wosip: Yumi save lesin long Baebol riding, ol magasin, mo ol buk blong yumi, taem yumi mekem wan trip i go samples, no taem yumi stap mekem ol smosmol wok blong yumi evridei. Olsem nao, yumi yusum gud taem blong yumi. (Efes. 5:15, 16) Long famle wosip, yumi save lesin long rikoding mo folem ol tok ya long prapa buk blong yumi. Yumi save yusum ol rikoding tu long stadi blong yumi wanwan, antap moa sipos yumi wantem kam gud moa blong rid, no yumi stap lanem wan lanwis.
3. ?Long teritori blong yumi, ol rikoding oli save givhan long hu?
3 Wok Blong Prij: Long teritori blong yumi, maet sam man oli bisi tumas blong rid, be oli glad blong lesin long ol rikoding. Maet yumi mitim wan man we i toktok defren lanwis, mo i glad moa blong lesin long ol tok blong Kingdom long prapa lanwis blong hem. (Wok 2:6-8) Long sam ples, fasin blong lesin i wan haf blong kastom blong olgeta, olsem ol man Mang blong Esia. Oli no raetemdaon histri blong olgeta, be oli pasem i go long ol yangfala blong olgeta, long ol toktok blong olgeta nomo. Mo oli no fogetem ol save we oli harem. Plante laen blong Afrika tu oli harem gud blong storian, mo long rod ya oli lanem plante samting.
4. ?Wanem ol kwestin we yumi mas tingbaot, blong givhan moa long ol man long teritori blong yumi?
4 Long teritori blong yu, ?yu ting se i gud blong plei wan rikoding long lanwis blong man we yu storian wetem hem? ?Yu save sanem wan rikoding long wan man long Imel? ?Yu save daonlodem rikoding blong wan buk i go long wan CD mo givim long man we i intres, wetem buk ya? Evri buk, buklet, magasin, mo traket, we yumi daonlodem mo givimaot long wok blong prij, yumi save kaontem long ripot blong prij. Ol rikoding ya oli blong yumi yusum long prapa stadi blong yumi wanwan mo long wok blong sakem sid blong trutok.—1 Kor. 3:6.