?Olsem Wanem Blong Trenem Ol Niuwan Blong Oli Prij?
1. ?Yu yu harem olsem wanem long faswan taem we yu prij?
1 ?Yu yu tingbaot faswan taem we yu prij long ol haos wanwan? I klia se long taem ya yu yu fraet. Ating yu bin prij wetem pablisa ya we i tijim yu long Baebol, no wetem wan narafala pablisa, mo yu glad se hem i bin givhan long yu. Be naoia, yu yu wan man blong prij longtaem finis, mo yu naf blong givhan long ol niuwan mo trenem olgeta blong prij.
2. ?Ol niufala pablisa oli mas lanem wanem?
2 Ol niufala pablisa oli mas lanem blong statem storian wetem man blong haos, yusum Baebol, gobak visitim man, statem Baebol stadi mo gohed long stadi ya. Mo tu, oli mas lanem ol defren haf long wok blong prij, olsem prij long rod, mo long ol stoa mo ofis. Yu save givhan long olgeta blong oli kamgud long ol defren haf ya blong wok blong prij. Blong mekem olsem, yu save soemaot eksampol long olgeta mo yu save givim sam tingting tu.
3. ?Olsem wanem eksampol blong yumi i save halpem ol narafala?
3 Eksampol Blong Yu i Tijim Olgeta: Jisas i soemaot long ol disaepol blong hem olsem wanem blong prij. (Luk 8:1; 1 Pita 2:21) Taem yu mekem plan blong prij wetem wan niufala pablisa, i gud we yu rerem wan storian we i isi nomo, maet wan we i stap finis long smol buk ya Statem Wan Storian mo long Kingdom Wok Blong Yumi. Long rod ya, niufala pablisa ya tu i save yusum storian ya. Ale maet yu talem long hem se yu bambae yu toktok long faswan haos mo maet long seken haos tu, mo hem i lesin. Taem yutufala i aot long wan haos, mo yutufala i stap wokbaot i go long nekiswan, askem long pablisa ya sipos hem i ting se storian blong yu i save karem gudfala frut no nogat. Samting ya bambae i givhan long hem blong luk se i impoten blong wok wetem ol narafala long wok blong prij. Mo bambae i mekem se i isi long hem blong lesin long eni advaes we yu talem long hem afta we hem i storian wetem man.
4. ?Olsem wanem yumi save givhan long wan niufala pablisa afta we hem i storian wetem man blong haos?
4 Givim Sam Tingting: Jisas i talemaot sam save tu long ol disaepol blong hem, blong oli save olsem wanem blong prij. (Mat. 10:5-14) Yu tu yu save givhan long wan niufala pablisa long sem fasin. Taem hem i storian long man blong haos, lesin gud long hem. Biaen, taem yutufala i aot long haos ya, talem gudfala tok long hem from samting we hem i talem, nating sipos yu luk se hem i mestem sam samting. Bifo we yu givim sam tingting long hem long saed blong wan poen, maet yu wet fastaem blong luk sipos hem i stretem samting ya long nekis doa. Maet hem i fraet nomo. Tingbaot tu se long wok blong prij, wan pablisa i gud long wan samting be narafala pablisa i gud long defren samting. Mo tu, i gat plante kaen fasin blong mekem wok ya.—1 Kor. 12:4-7.
5. ?Yumi save talem wanem, taem yumi givim sam tingting long wan niufala pablisa?
5 Samtaem wan niufala pablisa bambae i askem long yu blong givim sam tingting long hem. Be nating se hem i no askem, i gud yet we yu givhan long hem. ?Olsem wanem blong mekem olsem wetem kaen fasin? Sam pablisa we oli prij plante, oli askem se: “?Mi save givim wan tingting long yu?”, sipos no: “?Wanem tingting blong yu long storian ya we yu gat wetem man blong haos?” Wan narafala rod, hemia blong talem se: “Taem mi mi jes kam wan pablisa, mi harem se i had long mi blong . . . , be samting we i givhan bigwan long mi se . . . ” Samtaem i gud we yutufala i lukluk Reasoning buk tugeta. I gud blong tokbaot wan poen nomo long tok blong hem. Sipos yu tokbaot tumas samting we hem i mas stretem wantaem, bambae hem i harem se i had tumas long hem.
6. ?Long saed blong wok blong prij, olsem wanem “naef i save sapenem naef”?
6 Naef i Save Sapenem Naef: Pol i talem long Timoti, we i stap talemaot gud nius oltaem, se hem i mas mekem wok ya blong tijim man i kam nambawan wok blong hem, mo hem i mas gohed gud. (1 Tim. 4:13, 15) Nating sipos yu yu prij plante yia finis, be yu mas gohed nomo blong traem kam gud moa. Taem yu prij wetem ol narafala pablisa, wetem olgeta ya tu we oli no prij plante yet, i gud yu traem lanem wan samting. Mo yu mas lukaot rod blong givhan long ol narafala wetem kaen fasin, antap moa ol niuwan, blong oli save rod blong talemaot gud nius.—Prov. 27:17.