Mekem Wok Blong Prij Wetem Olgeta Sol Blong Yu
Haf 3: Halpem Ol Narafala Blong Kam Gud Moa
1 Blong trenem ol man long wok blong prij, plante taem oli tokbaot fasin blong olfala brata ya Pol mo yangfala man ya blong bilif Timote olsem ol gudfala eksampel. (1 Korin 4:17) Pol i talem long Timote blong givim sem save mo trening we hem i kasem long Pol long ol narafala man. (2 Tim. 2:1, 2) Yumi mas folem sem rod ya tede long kongregesen.
2 Trenem Ol Narafala: Yumi luksave se tede long Vanuatu i gat 80 pablisa antap moa long namba we i stap long tri yia bifo. Taswe i nidim blong trenem olgeta. Plante long olgeta ya oli save kasem ol trening olsem from ol pablisa we oli gat plante ekspiryens finis. Bifo, wan sista i stap spenem wan no tu haoa nomo long wok blong prij long wan manis. Nao wan pablisa we i gat ekspiryens i halpem hem, mo biaen hem i gat gudhan blong toktok moa long ol doa. Bifo, hem i no tingting strong blong mekem wok blong prij, be naoia tingting ya i finis. Hem i kam wan pablisa we i gohed strong blong talemaot gud nyus. Naoia hem i kam wan paenia we i gat gudhan, taswe hem i luklukbak mo talem se: “Wanem mi nidim se oli save tijim mi blong toktok, nao taem oli mekem, mi stat blong laekem wok blong prij.”
3 Sipos yu yu wan elda, no wan man blong givhan, no wan paenia, no wan pablisa we i gat ekspiryens, ?olsem wanem yu save givhan long ol narafala blong gohed moa? Fas samting se talemaot long brata we i lukaot long Buk Stadi se yu wantem givhan long narafala pablisa.
4 Yu Mas Rere Mo Gat Plan: I gud yu mekem plan fastaem blong wok tugeta wetem narafala pablisa. Maet fren blong yu hem i fraet lelebet blong toktok, be bambae hem i glad blong wok wetem yu sipos yu stap rere blong halpem hem taem hem i nidim. (Ekles. 4:9) Yu save jusum ol teritori we ol man blong hem oli glad blong tokbaot Baebol. Samting ya i save givhan long nyuwan ya blong toktok mo bambae hem i save gat strong tingting blong mekem wok ya.
5 Blong gohed moa long trening, i gud blong tokbaot olsem wanem blong mekem visit long wan man we hem i intres. Blong mekem olsem yu save stanemap wan kwestin we yu save ansa long hem taem yu gobak. Mo meksua blong halpem pablisa ya we i no gat plante ekspiryens blong rere gud, mo go wetem hem long visit ya. Sipos man ya i wantem stadi mo nyufala pablisa ya i no save olsem wanem blong mekem, yu save mekem stadi ya fastaem. Biaen, taem nyufala pablisa ya i naf, yu save letem hem i mekem stadi ya.
6 Taem plante nyuwan oli stap joen long ogenaesesen, i klia nomo we oli nidim moa save long wok blong prij. Taswe olgeta we oli gat gudhan long wok blong prij oli mas givhan long ol nyuwan. Sipos yu mekem olsem long wan nyuwan, bambae samtaem hem i save kam “naf blong tijim ol narafala man bakegen long ol toktok ya.”—2 Tim. 2:2.