Lanem Samting Long Ol Pablisa We Oli Gat Gudhan Blong Prij

Ol pablisa we oli gat gudhan blong prij, oli olsem wan sas presen long kongregesen. Samfala oli mekem wok blong Jehova blong plante yia. Sam narafala maet oli jes lanem blong gat gudhan long wok blong prij long sam yia we oli pas. Ol pablisa ya oli luk olsem wanem Jisas i stap lidim Kristin kongregesen long lasdei ya, taem hem i mekem wok blong prij i kam bigwan, mo i gat plante moa man oli kam long trutok. (Mat. 28:19, 20) Long wok blong prij, ol pablisa ya oli kasem “paoa ya we i bigwan tumas,” taem oli fesem ol traem long laef blong olgeta. (2 Kor. 4:7) Yumi save lanem plante gudfala samting long ol pablisa we oli gat gudhan long wok blong prij. Taem yumi gat janis blong prij wetem olgeta, bambae oli glad blong trenem yumi. (Sam 71:18) Taswe, yumi mas tekem janis blong lanem samting long olgeta. ?Olsem wanem yumi save mekem samting ya?

Long Wok Blong Prij. Ol niu pablisa no olgeta we oli no prij plante, oli save mekem moa long wok blong prij, taem oli kasem gudfala trening. Oli save kasem ol trening ya, taem oli folem ol pablisa we oli gat gudhan blong prij, mo oli luk olsem wanem ol pablisa ya oli prij. (Yu luk Wajtaoa blong 15 Februari 2015, aninit long haf ya “Gohed Blong Gat Strong Tingting Blong Prij,” mo yu luk smol stamba tok we i se “Yu Givhan Long Ol Niu Pablisa.”) ?Olsem wanem yu kasem gudfala samting taem yu prij wetem wan pablisa we i gat gudhan blong prij?

?Yu yu mekem plan blong prij wetem wan pablisa we i gat gudhan blong prij? Sipos pablisa ya i gat problem long helt, mo hem i no save wokbaot, maet yu save tekem Baebol stadi blong yu i go long haos blong pablisa, blong hem i save joen wetem yu long stadi. Afta long stadi, yu save askem hem blong i givim sam advaes long yu, we oli save givhan long yu blong kam wan gudfala tija.

Spenem Taem Wetem Olgeta: Sipos yu wantem save gud ol pablisa we oli gat gudhan blong prij, yu mas spenem taem wetem olgeta. Yu askem wan pablisa we i gat gudhan blong prij, blong hem i kam joen wetem yufala long famle wosip, mo yu save askem sam kwestin long hem. Sipos hem i gat problem long helt, maet yufala i save mekem plan blong mekem famle wosip long haos blong hem. Yu traem faenemaot olsem wanem hem i kam long trutok. ?Wanem ol blesing we hem i kasem? ?Wanem ol jenis we hem i luk? ?Wanem glad we hem i kasem taem hem i stap mekem wok blong Jehova?

Yu mas kasemsave mo skelem gud ol advaes we yu kasem long ol pablisa we oli gat gudhan blong prij. Olgeta, oli gat ol defdefren fasin blong tijim man long wok blong prij. (Rom 12:6-8) Samfala oli olfala moa, mo maet oli save spenem smol taem nomo wetem yumi. Nating se i olsem, yumi save lanem plante samting long olgeta from ol ekspiriens we oli gat, taem oli stap mekem wok blong Jehova.