?Mi Mi Mekem i Naf Long Wok Blong Prij?
1. ?Wanem tingting we wan gudfala Kristin i save gat?
1 ?Samtaem yu yu stap tingbaot kwestin ya? Maet yu no moa joen plante long wok blong prij, olsem yu stap mekem bifo. Maet hemia from we yu stap kam olfala, yu sik, no maet yu gat moa wok blong lukaot long famle. Ol samting ya oli mekem tingting blong yu i kam slak. Wan Kristin sista we i gat tri pikinini i raet se, samtaem hem i harem se hem i sem, from we hem i yusum plante taem mo paoa blong hem blong lukaot long famle blong hem, nao i no moa gat plante taem blong prij. ?Wanem bambae i givhan long yumi blong gat stret tingting?
2. ?Jeova i wantem yumi blong mekem wanem?
2 ?Jeova i Wantem Yumi Blong Mekem Wanem?: I sua se yumi evriwan i glad blong mekem moa long wok blong prij. Be oltaem, samting we yumi wantem mekem, i defren olgeta long samting we yumi naf blong mekem. Nating se i olsem, sipos yumi gat tingting ya blong wantem mekem moa long wok blong prij, hemia i soemaot se yumi stap traehad. Yumi mas tingbaot se Jeova i savegud wanem we yumi naf blong mekem. Hem i no save askem long yumi blong mekem moa, i bitim wanem we yumi naf blong mekem. (Sam 103:13, 14) ?Jeova i wantem yumi blong mekem wanem? Hem i wantem we yumi mekem bes blong yumi long wok blong hem, mo blong yumi mekem wok ya long ful laef blong yumi.—Kol. 3:23.
3. ?Olsem wanem yumi save jekemap ol traehad blong yumi long wok blong prij?
3 ?Wanem bambae i givhan long yumi blong faenemaot hamas wok we yumi wanwan i save mekem? Yumi save askem long Jeova blong i halpem yumi blong luklukgud long ol samting long laef blong yumi. (Sam 26:2) Yumi save trastem wan Kristin fren blong i givhan long yumi, sipos hem i bigman long tingting, i savegud yumi, mo hem i no fraet blong talem long yumi se yumi mas traem kamgud moa. (Prov. 27:9, futnot) Tingbaot tu se, tede olgeta samting long laef oli stap jenis, taswe i gud we yumi jekemap oltaem olgeta samting long laef blong yumi.—Efes. 5:10.
4. ?Wanem tingting we yumi mas gat long ol tok blong Baebol, we oli mekem yumi tingbaot wok blong prij oltaem?
4 ?Wanem Tingting Blong Yu Long Ol Tok We Yumi Kasem Oltaem?: Traem tingbaot wan resis. Ol man we oli stap wajem resis ya, plante taem oli stap singsingaot blong leftemap tingting blong hemia we i resis. Fasin ya i save givhan long ol man we oli resis blong oli kasem mak blong olgeta, be i no blong daonem tingting blong olgeta. Long sem fasin, ol tok blong Baebol, ol tok we oli kamaot long ol miting, mo ol tok insaed long ol buk blong yumi, oli leftemap tingting blong yumi, mo oli mekem yumi tingbaot bakegen se yumi mas wok ‘strong blong talemaot ol tok blong God.’ Yes ol tok ya oli blong givhan long yumi, be oli no givim tingting ya se ol traehad blong yumi oli blong nating nomo. (2 Tim. 4:2) Yumi save sua se taem yumi traehad blong mekem bes blong yumi long wok blong prij, Jeova bambae i no fogetem ‘ol wok ya we yumi mekem,’ mo bambae hem i stap tingbaot we ‘yumi lavem hem.’—Hib. 6:10.