?Yumi Tokbaot Wanem Long Ol Magasin?

Wajtaoa Septemba 1

“Bighaf blong ol jos oli tijim ol man se, oli mas lavem ol man we oli stap raonabaot long olgeta. [Yu save ridim Matiu 22:39.] ?Be long tingting blong yu, from wanem ol man oli stap seseraot? [Yu save letem man i ansa.] Wajtaoa ya i givim ansa long kwestin ya se, ?From Wanem Ol Man We Oli Mekem Wosip Long Tru God Oli Joengud?” Yu save soem haf we i stat long pej 15.

Wekap! Julae-Septemba

“?Long tingting blong yu, ol loa mo ol rul blong Baebol oli save halpem yumi blong winim ol problem long saed blong mane? [Yu save letem man i ansa, mo yu save ridim Prija 7:12.] I tru, mane i save givhan blong mekem laef blong yumi i gud, be waes blong God we i stap long Baebol, hemia nomo i save mekem laef blong yumi i stap gud olwe.” Yu save soem haf we i stat long pej 20.

Wajtaoa Oktoba 1

Yu save tokbaot wan nius we i mekem ol man oli harem nogud. Biaen yu save talem se: “?Yu yu stap tingbaot, from wanem ol man oli stap mekem samting we i nogud? [Yu save letem man i ansa.] Baebol i givim risen from wanem yumi save putum tingting blong yumi i go long wan gudfala laef long fiuja. [Yu save ridim 2 Pita 3:13.] Wajtaoa ya i talemaot wanem we Baebol i talem long saed blong stamba blong nogud fasin, mo olsem wanem God bambae i finisim ol nogud fasin ya.”

Wekap! Oktoba-Disemba

“Plante muvi we ol man oli lukluk, oli tokbaot ol devel, ol man blong mekem majik, mo wok blong kleva. ?Long tingting blong yu, ol devel oli stap? [Yu save letem man i ansa. Biaen yu ridim 1 Korin 10:20.] Wekap! ya i soemaot wanem we Baebol i talem long saed blong ol devel, mo olsem wanem yumi save blokem olgeta blong oli no spolem yumi.” Soem haf we i stat long pej 20.