Yu Mas Trenem Ol Pikinini Blong Yu, Blong Oli Kam Ol Man Blong Talemaot Gud Nius
1. ?Ol Sam 148:12, 13 i pulum ol Kristin papa mama blong oli mekem wanem?
1 Jehova i askem long ol yangfala blong oli presem hem. (Sam 148:12, 13) Taswe, ol Kristin papa mama oli tijim ol pikinini blong olgeta long ol trutok blong Baebol mo long ol loa blong God long saed blong ol gudfala fasin. Be i no hemia nomo, oli trenem ol pikinini blong olgeta tu blong oli kam ol man blong talemaot gud nius. ?Ol papa mama ya oli mekem wanem blong sloslo, ol pikinini blong olgeta oli save kam ol man blong talemaot gud nius?
2. ?Gudfala eksampol blong ol papa mama i save halpem ol pikinini olsem wanem?
2 Papa Mama, Yutufala i Mas Soemaot Gudfala Eksampol: Jaj ya, Gideon, i talem long ol 300 man blong hem, se: “Bambae yufala i mas lukluk i kam long mi. Wanem samting we mi bambae mi mekem, yufala tu bambae i mas mekem olsem.” (Jaj. 7:17) Ol pikinini oli lukluk samting we papa mama blong olgeta oli mekem mo olgeta tu oli mekem sem mak. Wan papa i wok evri naet mo i kam hom long moning wantaem. Long Sarede moning, nating se hem i taed tumas, be hem i tekem ol pikinini blong hem oli go long wok blong prij. Papa ya i no talem wan toktok, be fasin blong hem i tijim ol pikinini ya se impoten samting long laef blong olgeta, hemia wok blong prij. (Mat. 6:33) ?Olsem wanem? ?Ol pikinini blong yutufala oli luk se yutufala i glad blong joen long ol defren haf blong wosip olsem prea, ridim Baebol, ansa long ol miting, mo prij? I tru se bambae yutufala i no save soemaot eksampol we i stret gud olgeta. Be sipos ol pikinini oli luk se yutufala i traehad blong mekem wok blong Jehova, bambae oli glad moa blong lesin taem yutufala i tijim olgeta blong oli wosipim Jehova.—Dut. 6:6-7; Rom 2:21, 22.
3. ?Wanem ol mak we sloslo, papa mama tufala i mas givhan long ol pikinini blong oli putum mo kasem?
3 Ol Mak We Sloslo Ol Pikinini Oli Save Kasem: Ol papa mama oli trenem ol pikinini blong olgeta bakegen mo bakegen, blong oli wokbaot, oli toktok, oli werem klos, mo blong oli mekem ol narafala samting bakegen. Taem ol pikinini oli kam bigwan, papa mama tufala i trenem olgeta blong oli kasem sam narafala mak bakegen. Sipos papa mama tufala i Kristin, tufala i givhan tu long ol pikinini blong tufala, blong oli putum mo kasem ol mak we oli joen wetem wosip blong olgeta. Mo taem tufala i halpem olgeta blong putum ol mak ya, tufala i tingbaot yia blong ol pikinini, mo samting we oli naf blong mekem. (1 Kor. 9:26) ?Olsem wanem? ?Yutufala i tijim ol pikinini blong yutufala, blong oli ansa long prapa toktok blong olgeta? ?Yutufala i tijim olgeta blong olgeta nomo oli rerem tok blong olgeta long Tiokratik Skul? (Sam 35:18) ?Yutufala i trenem olgeta blong oli joen long ol defren haf blong wok blong prij? ?Yutufala i pulum olgeta blong oli kasem mak ya blong baptaes mo mekem wok blong fultaem paenia? ?Yutufala i givhan long ol pikinini blong oli joen wetem ol man blong talemaot gud nius we oli glad long wok ya, mo we bambae oli leftemap tingting blong olgeta?—Prov. 13:20.
4. ?Taem ol pikinini oli smol yet mo papa mama tufala i stat blong trenem olgeta long wok blong prij, fasin ya i givhan long olgeta olsem wanem?
4 Man blong raetem Sam i talem se: “God, i stat long taem we mi mi yangfala, yu yu stap tijim mi, mo mi stap tokbaot yet ol bigfala wok ya blong yu.” (Sam 71:17) Papa mama, yutufala i mas stat blong trenem ol pikinini blong yutufala taem oli smol yet, blong oli kam ol man blong talemaot gud nius. !Ol gudfala fasin ya blong spirit we yutufala i givhan long olgeta blong gat, bambae oli givhan long olgeta taem oli kam bigman!—Prov. 22:6.