Papa Mama—Trenem Pikinini Taem Oli Smol Yet
1 “Sipos yu tijimgud pikinini blong yu long fasin we i stret blong hem i folem, taem hem i kam bigman, bambae i no save gowe long hem.” (Prov. 22:6) ?Ol papa mama, sipos yu no wantem we pikinini blong yu i “gowe” long rod blong trutok, wetaem i stret blong statem trening blong hem? !Stat long taem we hem i smol yet!
2 Taem Pol i talem se Timoti i kasem tijing long saed blong spirit ‘taem hem i pikinini yet,’ hem i minim stat long taem we hem i wan bebi nomo. (2 Tim. 3:14, 15) From samting ya, Timoti i gruap i kam wan bigman long saed blong spirit. (Fil. 2:19-22) Ol papa mama, yufala tu i mas trenem ol pikinini blong yufala ‘taem oli smol yet’ blong oli ‘gruap wetem Jeova.’—1 Saml. 2:21, NW.
3 Givim Wota We Oli Nidim Blong Gru: Wan smol tri i nidim wota oltaem blong gru mo kam wan bigfala tri. I sem mak long saed blong ol pikinini. Nomata wanem yia blong olgeta, oli mas kasem oltaem trutok blong Baebol we i olsem wota. Long rod ya, oli save gru mo kam ol bigman long saed blong spirit we oli mekem wok blong God. Beswan rod blong tijim trutok long ol pikinini mo halpem olgeta blong kam klosap long Jeova, hemia blong mekem famle Baebol stadi oltaem. Be ol papa mama, yufala i mas tingbaot hamas taem we wanwan pikinini i save spenem blong lesin long stadi. Long saed blong ol smol pikinini, maet i moagud blong mekem plante sotfala stadi i bitim we yu mekem sam stadi nomo we oli longfala.—Dut. 11:18, 19.
4 Yu no mas ting se pikinini blong yu i smol tumas blong lanem samting. Talem ol stori blong ol man long Baebol. Letem olgeta oli dro ol pija no mekem pleplei blong ol stori blong Baebol. Yusum gud ol kaset mo video kaset, olsem ol kaset we Baebol drama i stap long olgeta. Maet yu mas jenisim famle stadi blong mekem i stret long ol pikinini we oli smol mo long ol pikinini we oli bigwan moa, mo mekem stadi i laenap wetem hamas save we ol wanwan pikinini oli naf blong kasem. Trening we yu givim long pikinini we i smol yet, bambae i sot mo isi. Be taem pikinini i gruap, hem i mas kasem trening we i bigwan moa, mo hem i mas lanem samting we i niu oltaem blong mekem hem i gru moa. Mekem we tijing blong Baebol i gat laef mo tijim ol defren samting oltaem. Sipos yu wantem se ol pikinini blong yu oli “wantem tumas” Tok blong God, ale yu mas mekem oli haremgud long stadi ya.—1 Pita 2:2.
5 Halpem Ol Pikinini Blong Joen Long Kongregesen: Putum ol mak we ol pikinini oli save kasem blong halpem olgeta blong gohed mo joen fulwan long kongregesen. ?Wanem faswan mak we maet yu putum? Wan papa mo mama we tufala i gat tu yangfala pikinini, tufala i talem se: “Faswan trening we tufala i bin kasem, hemia blong sidaon mo stap kwaet insaed long Haos Kingdom.” Biaen, yu save halpem ol pikinini blong ansa wetem prapa tok blong olgeta long ol miting, mo blong kasem mak we oli naf blong joen long Tiokratik Skul. Sam mak blong putum long wok blong prij, hemia blong seremaot traket, blong ridim wan vas, blong soemaot magasin, mo blong storian gud wetem man long haos.
6 Soem Wan Gudfala Eksampol: ?Evri dei ol pikinini blong yu oli harem we yu yu stap tokbaot Jeova mo yu prea long hem? ?Oli luk we yu stap stadi long Tok blong Hem, yu go long ol miting, yu joen long wok blong prij mo yu stap glad blong mekem ol samting we God i wantem? (Sam 40:8) Hemia i impoten tumas, mo i impoten tu we yu mekem ol samting ya wetem olgeta. Wan woman i tokbaot mama blong hem we i gat sikis pikinini mo olsem wanem hem i halpem olgeta blong gruap mo kam ol Witnes. Hem i se: “Wanem we i gat bigfala paoa long mifala, hemia eksampol we mama i soem long mifala—hemia i gat moa paoa bitim ol toktok.” Wan mama we i gat fo pikinini i talem se: “Tok ya ‘Putum Jeova long fasples’ hem i no jes wan toktok we mifala i savegud, be hem i wan fasin we i stap long laef blong mifala evri dei.”
7 Ol papa mama, stat trenem ol pikinini blong yu taem oli smol yet, mo tijim olgeta long ol trutok we oli stap long Tok blong God. Putum ol mak blong halpem olgeta blong oli gohed oltaem, mo mekem bes blong yu blong soem gudfala eksampol. !Bambae yu glad tumas sipos yu mekem olsem!