?Ol Pikinini Blong Yu, Oli Rere Blong Talemaot Bilif Blong Olgeta?

1. ?From wanem ol pikinini oli mas rere blong talemaot bilif blong olgeta?

¹ I gat ol samting long skul we oli traem ol pikinini blong yu, mo oli mekem olgeta oli harem nogud. Mo tu ol pikinini oli gat janis blong ‘talemaot trutok.’ (Jon 18:37, Nyutesteman wetem Ol Sam long Bislama) ?Olsem wanem? ?Oli rere blong talemaot bilif blong olgeta?

2. ?Ol pikinini oli mas save wanem blong oli rere blong talemaot bilif blong olgeta?

² ?Olsem wanem? ?Ol pikinini blong yu oli save se i minim wanem blong joen long ol lafet blong leftemap kantri mo ol hiten lafet? ?Mo oli kasem save se i rong blong joen long ol samting ya? ?Oli rere blong stanap strong taem narafala i pulum olgeta blong skul moa, blong gat boefren no gelfren, blong tekem strong dring, no ol drag olsem mariuana? ?No bambae oli talem nomo se jos blong olgeta i no agri long samting ya, no oli save olsem wanem blong talemaot bilif blong olgeta?—1 Pita 3:15.

3. ?Ol papa mama oli save yusum naet blong Famle Wosip olsem wanem blong rerem ol pikinini blong olgeta?

³ Yusum Naet Blong Famle Wosip: I tru se taem ol pikinini oli stap go long skul, yufala ol papa mama, yufala i storian finis wetem olgeta long saed blong ol trabol we oli stap kasem. Taem yufala i traehad moa blong tingbaot ol samting long skul we oli stap traem ol pikinini, bambae yufala i halpem olgeta, blong oli no fraet blong talemaot bilif blong olgeta. I gud we yufala i yusum naet blong Famle Wosip blong tokbaot ol samting ya wetem ol pikinini. Yufala i save askem long ol pikinini wanem samting we oli wari moa long hem, taem oli go long skul. Taem ol pikinini oli kam bigwan mo oli save moa samting, yufala evriwan i save tingtingbak long ol samting we yufala i tokbaot finis long ol yia we oli pas. (Sam 119:95) Yufala i save mekem sam pleplei, mo papa no mama i save mekem olsem we i wan tija, wan man blong givim advaes long ol studen, no wan studen. Yufala i save tijim ol pikinini blong yufala blong oli yusum Baebol blong givim ansa. Blong mekem olsem, yufala i yusum ol buk olsem Reasoning buk mo Ol Yangfala Oli Askem. Wan mama i yusum ol pleplei blong rerem ol pikinini blong hem, blong oli save toktok wetem ol niufala tija blong olgeta, mo blong talemaot long olgeta se oli Witnes blong Jehova.—Lukluk Wajtaoa Disemba 15, 2010, pej 3-5 long Inglis mo Franis.

4. ?Ol papa mama we oli waes, bambae oli mekem wanem?

⁴ Ol trabol we ol yangfala Kristin oli mas kasem long ol lasdei ya, oli stap kam “strong tumas.” (2 Tim. 3:1) Ol papa mama we oli waes, bambae oli traem tingting gud fastaem long ol trabol ya. (Prov. 22:3) Long yia ya, yufala i mas mekem evri samting blong halpem ol pikinini blong yufala, blong oli rere gud blong talemaot bilif blong olgeta.