?Ol Pikinini Blong Yu Oli Rere Blong Gobak Long Skul Bakegen?
1 Ol yangfala Kristin oli mas fesem bakegen ol trabol we oli stap kasem long skul. Maet samting ya i mekem se tingting blong olgeta i no stap kwaet mo maet oli fraet lelebet. Oli filim olsem from we oli save se bambae oli mas fesem sam moa trabol bakegen. Samfala bambae oli gat narafala fren mo nyufala tija. Ol yangfala Kristin oli luksave se evri yia, sam samting oli kam traem bilif mo lav blong olgeta long Jeova. ?Taswe, yufala yangfala, yufala i rere finis blong fesem skul yia we i stap fored long yufala? ?Mo yufala, papa mama, bambae yufala i mekem wanem blong halpem ol pikinini blong oli winim ol trabol we oli save kasem?
YUFALA I YUSUM BUKLET SCHOOL
2 Long 1983, Sosaete i prentem buklet School blong ol Kristin papa mama mo ol pikinini we oli go long skul. Sosaete i mekem buklet ya blong eksplenemgud long ol tija mo long olgeta we oli lukaot long ol skul, ol bilif mo tingting blong ol Wetnes blong Jeova long sam samting mo lafet we skul i mekem. Buklet ya i store long sam rul we ol Wetnes blong Jeova oli folem long laef blong olgeta.
3 Buklet ya i blokem plante trabol. Wan eksampel, wan mama we i Wetnes blong Jeova i harem we sam man we oli gat doti fasin bambae oli givim sam lesen blong seks long skul blong pikinini blong hem. Wetem buklet School, hem i talemaot tingting blong Baebol long saed ya, ale ol tija oli jenisim program blong skul blong gel blong hem.
4 Ol papa mama oli save mekem hat mo tingting blong pikinini i strong sipos oli toktok wetem olgeta, mo oli lukluk bakegen ol poen we oli stap long buklet ya. Ol papa mama oli mas tingbaot se pikinini blong olgeta i yang olsem wanem, mo bambae hem i go long wanem klas mo skul. Oli mas skelemgud ol poen ya bifo we oli lukluk bakegen ol gudfala poen we bambae pikinini i nidim long yia ya. (Prov. 14:15; 22:3) Papa mama, yufala i mas rerem pikinini blong yufala long ol trabol we hem i save kasem, mo yufala i mas soem long hem olsem wanem ol poen we yufala i talem long hem oli save halpem hem blong “wokbaot long ol gudfala rod nomo.”—Hib. 12:13.
5 Ol papa mama oli save halpem bigwan ol pikinini blong oli “rere blong givim ansa long ol man” we oli askem wanem tingting blong olgeta mo wanem hop blong olgeta. (1 Pita 3:15) Samtaem, maet oli go luk tija blong toktok wetem hem. Sam Kristin papa mama oli mekem olsem plante taem, mekem se oli save toktok gud wetem ol tija. Mo tu, taem ol papa mama oli gat fasin olsem, ol pikinini blong olgeta oli harem we oli stap kolosap long papa mama blong olgeta. Samfala papa mama oli go long ol miting wetem ol tija, ale samtaem oli kasem moa save long ol pikinini we i skul wetem pikinini blong ol, mo oli luksave ol samting we i save traem ol pikinini blong ol evri dei.—1 Pita 3:8.
6 I tru se long skul yia we i kam, bambae i gat sam smol fraet mo sam taem blong wari. Be nating, wan strong tingting i save halpem ol papa mama mo ol yangfala blong ‘mekem tingting blong olgeta i rere’ blong leftemap nem blong Jeova long skul yia we i kam.—1 Pita 1:13.