Yangfala—Yusumgud Jans Ya We Yu Gat Long Skul
1 ?Wanem filing blong yu long saed blong skul? Sipos skul i save givhan long yu blong kasem sam wok long laef blong yu long fyuja, ?yu yu gat strong tingting blong yusum fulwan olgeta samting we yu lanem long skul? ?Bambae yu yu yusumgud ol jans we yu gat long skul blong serem trutok wetem ol skul fren mo tija blong yu? Mifala i sua se yu wantem mekem bes blong yu long skul.
2 Kam Wan Gudfala Studen: Sipos yu reregud mo lesingud taem yu go long skul, bambae yu kasem ol blesing we oli stap longtaem. Yu mas traehad blong mekem ol homwok blong yu, be yu no mas letem ol wok blong skul oli blokem ol tiokratik wok.—Fil. 1:10.
3 Taem wan nyufala yia blong skul i stat, i gud blong ridim buklet ya Jehovah’s Witnesses and Education. Biaen, yu mo papa mama blong yu, yufala i mas givim wanwan kopi long ol tija blong yu. Talem long olgeta se eni kwestin we oli askem, bambae oli kasem ansa blong hem. Buklet ya bambae i halpem ol tija blong save moa long saed blong ol rul mo bilif blong yu, nao bambae oli wok wanples wetem yu taem yu stap folem ol tijing ya we yu bin lanem long Baebol. Mo tu, bambae buklet ya i mekem sua long ol tija se yu mo papa mama blong yu, yufala i wantem wok tugeta wetem olgeta taem oli stap halpem yu blong kasem edukesen we i save givhan long yu.
4 Kam Wan Gudfala Wetnes: Tingbaot skul blong yu olsem wan teritori we yu save tekem jans blong prij long hem. Bambae yu gat ol gudfala jans blong prij. Nambawan save blong yu long saed blong speret, we yu serem wetem ol narafala, ‘bambae i sevem yu wetem ol man we oli stap lesin long yu.’ (1 Tim. 4:16) Ol Kristin fasin blong yu mo fasin blong tekem jans blong prij, bambae oli givhan long yu mo long ol narafala tu.
5 Wan yangfala brata i tekem jans blong prij long ol studen we hem i skul wetem olgeta. Sam long olgeta we oli glad blong lesin long hem, hemia wan yangfala Katolik, mo wan yangfala we i no bilif se God i stap nao i stap jikim olgeta we oli bilif long God, wetem wan nara yangfala we i stap smok mo dring plante alkol. !Long evriwan we hem i prij long olgeta, i gat 15 yangfala we brata ya i halpem olgeta blong givim laef long Jeova mo tekem baptaes!
6 Taswe ol yangfala, gohed blong lanem moa samting mo wok gud blong givim wetnes long spesel teritori ya. Long rod ya, bambae yu haremgud long ol bigfala blesing we yu save kasem taem yu stap skul yet.